გურიაში საკმაოდ ბევრი მიუსაფარი ადამიანი ცხოვრობს და "გურია ნიუსს» თითქმის ყოველდღე მიმართავენ სიღატაკის ზღვარს ქვემოთ მყოფი ადამიანები.
ოზურგეთის მუნიციპალიტეტის სოფელ შრომაში პენსიონერი ანგელინა მეცხვარიშვილი გაუსაძლის მდგომარეობაში ცხოვრობს. მისთვის დახმარება არც ერთ ხელისუფლებას არ გაუწევია. სოფლის რწმუნებულის, მაყვალა დარჩიას თქმით, ასეთ კატასტროფულ მდგომარეობაში მყოფი ოჯახი მეტი არ ეგულება.
იქ მისულებს მართლაც უკიდურესი ყოფა დაგვხვდა: უსახური ქოხმახი და 74 წლის ქალბატონი, რომელსაც ზამთარში, წვიმისა და თოვლის ქვეშ, ზაფხულში კი მორიელებთან ერთად სძინავს. მისი ყოველდღიურობა უმძიმესია, მეზობლების ნაამბობი კი _ მტკივნეული და შემაშფოთებელი.
საცხოვრებელ ფიცრულს ერთი პატარა სარკმელი აქვს; "ოთახში» ერთი საწოლი, ძველი მაგიდა და პატარა ღუმელი დგას.
ანგელინა მეცხვარიშვილი: _ჩემს "სახლში" არ შეისვლება, დასალაგებელია, დასაწმენდია, ან რა დავალაგო? აქ ვცხოვრობ. აბა, სახლი და კარი რომ მქონდეს, ვინმეს კი არ ვთხოვდი დახმარებას. მე საჭმელს და სასმელს არავის ვთხოვ, ვირჩენ თავს. სახლი 20 წელია, რაც დამეწვა. სიმართლის მთქმელს ენას აჭრიანო, ამბობენ. მე მაგის არ მეშინია _ მანდარინის კრეფაზე აქედან ურეკში, რამდენიმე კილომეტრს ფეხით დავდიოდი, თხილს ვკრეფ და საჭმელს ვყიდულობ. არ მშია. მარტოხელა, გამწარებული ქალი ვარ _ შვილი მკვდარი მყავს, მას ობლები დარჩა. იმის ნატვრაში და ოცნებაში ამომხდება სული, რომ ჩემს ობოლ შვილიშვილებს ჩემთან ღამეს ვერ ვათევინებ. ამ ზამთარს თუ გავიტანდი, არ მეგონა. რამდენჯერ მივმართე გამგებელს, ვინ იცის. დამპირდნენ, გიყიდიან სახლსო და ვარ მეც დაპირებებში და მოლოდინში. აქ ვათევ ღამეს. ამ ზამთარში რა უნდა ვქნა? თქვენც ხედავთ, რა მდგომარეობაა! აღარ შემიძლია აქეთ-იქით ამდენი სიარული!
ოზურგეთის მუნიციპალიტეტის სოფელ შრომის რწმუნებული მაყვალა დარჩია: _ ჩვენ შევთავაზეთ ამ ქალბატონს, რომ ცემენტს, ბლოკს, "არმატურას" მივცემდით და შეეძლო, ჩაედგა ეზოში პატარა სახლი, მაგრამ მაშინ უარი განაცხადა _ არავინ მყავს პატრონი და ვერ ავაშენებო. შემდეგ გვთხოვა, სახლი მიყიდეთ გამზადებული და დავდგამო. ჩვენც მოვნახეთ სახლი, მაგრამ გამგეობამ ვერ იყიდა _ დამპალი იყო ფიცრები და, ფაქტობრივად, ისევ იმ მდგომარეობაში აღმოჩნდებოდა, რა მდგომარეობაშიც ახლა არის. ახლა კიდევ ვნახეთ 2 000 ლარად რაღაც პატარა სახლი, ისევ იმავე სოფელში, ორმეთში, მაგრამ ეს იყო ისეთ დროს, რომ გამგეობამ ვეღარ შეიძინა. ამიტომ შევჩერდით. ახლა ისევ დავსვამ ამ საკითხს _ მართლაც კატასტროფულ მდგომარეობაშია ეს ქალბატონი და ოდა-სახლი, რომელიც იყიდება ორმეთში _ ხის სახლი, ორი ოთახით _ აუცილებლად უნდა შეუძინონ მას. სოფელს არ აქვს ბიუჯეტი, რომ სახლი ავუშენოთ, ამიტომ ვართ მოლოდინის რეჟიმში და იმედი მაქვს, რომ დავეხმარებით. აღვნიშნავ იმასაც, რომ სოფელი შრომა ოზურგეთის მუნიციპალიტეტში სიდიდით მეორე სოფელია და ასეთი გაჭირვებული აქ მეტი არავინ ცხოვრობს.
