"ვიცე-მერის ადგილი ნამდვილად ინახება ღირსეული ადამიანისთვის", _ უთხრა "გურია ნიუსს" ქალაქ ოზურგეთის ახლად არჩეულმა მერმა, ბეგლარ სიორიძემ. საინტერესოა, ვინ არის ეს ღირსეული ადამიანი. ამ მიზნით ჩვენ არაერთ კანდიდატს გავესაუბრეთ.
თვე-ნახევარია უკვე, რაც ქალაქ ოზურგეთს მერი ჰყავს. ქალაქის მერიაში თითქმის ყველა სამსახურს ჰყავს უფროსი, გარდა ადმინისტრაციული სამსახურისა, ვაკანტურია ასევე, ვიცე-მერის პოსტიც.
"გურია ნიუსის" წყაროს ინფორმაციით, ვიცე-მერის პოსტი ბეგლარ სიორიძემ რამდენიმე ადამიანს შესთავაზა, თუმცა, უარი მიიღო. ჩვენი წყაროს ინფორმაციით, ამ პოსტზე სამუშაოდ შეთავაზება ჰქონდათ, "ახალგაზრდა პედაგოგთა კავშირის" წარმომადგენელ ლევან მჟავანაძეს, რესურსცენტრის ხელმძღვანელ ლელა იმედაშვილს, ოზურგეთის მუნიციპალიტეტის საკრებულოს ყოფილ თავმჯდომარე ავთანდილ სურგულაძეს, "ვითიბი ბანკის" ოზურგეთს ფილიალის უფროს ბიძინა სალუქვაძეს. ამ ადამიანებმა მსგავსი გადაწყვეტილების მიღებაზე უარი განაცხადეს.
ჩვენ ვესაუბრეთ თითოეულ მათგანს. ისინი საჯაროდ და ღიად საუბრისგან თავს იკავებენ და აღნიშნულ საკითხზე კომენტარს არ აკეთებენ.
ლელა იმედაშვილი ინფორმაციას არ ადასტურებს.
აღსანიშნავია ის ფაქტი, რომ თავად ბეგლარ სიორიძე კატეგორიულად უარყოფს გახმაურებულ ინფორმაციას შეთავაზებების შესახებ. მისი თქმით, ეს კანდიდატები არც განხილულა.
გამონაკლისი მხოლოდ ლევან მჟავანაძე აღმოჩნდა, რომელმაც დაგვიდასტურა ინფორმაცია, იმის შესახებ, რომ მას ნამდვილად შესთავაზეს ვიცე-მერის პოსტი. თუმცა, მან ჩვენს მიერ დასმულ კითხვაზე, რატომ თქვა უარი შეთავაზებაზე, მჟავანაძემ გვიპასუხა, რომ ის არასამთავრობო სექტორში თავს უფრო კარგად გრძნობს, არის წარმატებული.
"გურია ნიუსის" კითხვაზე, განიხილებოდა თუ არა ვიცე-მერის პოსტზე ლევან მჟავანაძისა და ლელა იმედაშვილის კანდიდატურები, ქალაქ ოზურგეთის მერი კატეგორიულად უარყოფს.
_ არც ლევან მჟავანაძის და არც ლელა იმედაშვილის კანდიდატურა არ განხილულა ვიცე–მერის პოსტზე.
_ბატონო ბეგი, საზოგადოებას აინტერესებს რატომ ჭიანურდება ვიცე–მერის დანიშვნა? ან მიზანმიმართულად ხომ არ ხდება ეს ყველაფერი, რადგან ეს პოსტი ინახება ერთ-ერთი კონკრეტული პირისთვის, ლელა თავართქილაძისთვის? ჩვენი წყაროს ინფორმაციით, მას სურს ეს პოსტი, თუმცა ის "ზევით" დაბლოკეს...
_ჩვენ ვცდილობთ კადრების შერჩევის საკითხს მაქსიმალურად ფრთხილად მივუდგეთ. ამიტომ აქ სიჩქარე, ალბათ, არ გვარგებს, მე მინდა რომ ეს თანამდებობა მთლიანად აკმაყოფილებდეს იმ სტანდარტებს, რასაც პროფესიონალი ადამიანი პასუხობს და რომელიც ბოლომდე მოერგება ოზურგეთის მოთხოვნებს.
მე არ ვარჩევ ადამიანებს, მათი წარსულის მიუხედავად, უბრალოდ, ჯერ არ გამოჩნდა ასეთი ადამიანი და ამაში საგანგაშო არაფერია. ადგილი ნამდვილად ინახება ღირსეული ადამიანისთვის. რაც შეეხება ჩვენს მეგობრობას, არ მგონია, ოზურგეთში ეს საკითხი ვინმეს აღელვებდეს. აქ იმდენი პრობლემაა, სჯობს, უფრო სერიოზულ თემებს მივხედოთ და ნაკლებად დავკავდეთ ასეთი უინტერესო ინფორმაციებით.
არჩევნებში მე უამრავი ადამიანი მეხმარებოდა არა იმიტომ, რომ მათ თანამდებობები უნდოდათ, არამედ ისინი რეალურად აფასებდნენ, ჩვენს ქალაქს რა უფრო გამოადგებოდა.
_ რატომ არ დანიშნეთ ადმინისტრაციული სამსახურის უფროსი?
_რაც შეეხება ადმინისტრაციის უფროსს, აქაც იგივე პასუხი მექნება, რაც ვიცე–მერთან დაკავშირებით. არ ვჩქარობთ, რადგან ჯერ არსებული გუნდით ვუმკლავდებით ყველაფერს და მე ვამაყობ იმ პროფესიონალი და ღირსეული კადრებით, რომლებმაც დაიკავეს ადგილები ოზურგეთის მერიაში.
