ოფიციალური დოკუმენტების საფუძველზე, ოზურგეთის მუნიციპალიტეტში, ყოფილ თანამშრომლებზე, საკრებულოში, ივნისში 17 525 ლარის ოდენობის პრემია, ხოლო მუნიციპალიტეტის გამგეობაში – 9 910 ლარი გაიცა.
ოზურგეთის მუნიციპალიტეტის საკრებულოს ყოფილ თავმჯდომარეს – 2360, მუნიციპალიტეტის ყოფილ გამგებელს, პრემიის სახით 24 ივნისს, ასევე 2360 ლარი ჩაერიცხათ.
"ოზურგეთის მუნიციპალიტეტის საკრებულოს მუშაობის შედეგებში შეტანილი თითოეული საჯარო მოხელის პირადი წვლილისა და საპასუხისმგებლო ფუნქციური დატვირთვის გათვალისწინებით, მიეცათ პრემია, ერთი თვის თანამდებობრივი სარგოს ოდენობით, საკრებულოს შემდეგ თანამდებობის პირებსა და საჯარო მოსამსახურეს", _ წერია ჩვენს მიერ საკრებულოში გამოთხოვილ ოფიციალურ დოკუმენტში, რომელსაც ხელს საკრებულოს ყოფილი თავმჯდომარე ავთანდილ სურგულაძე აწერს.
ყოფილ საშტატო თანამშრომლებს ორი თვის კომპენსაცია მისცეს, ხოლო ხელშეკრულებით აყვანილებს, რომლებსაც უფლება არ ჰქონდათ კომპენსაციის მიღების, პრემიები დაურიგდათ .
"გვაინტერესებს, რა კრიტერიუმით არჩევენ თანამშრომლებს, რომლებსაც პრემიები დაურიგეს?", _ ამბობენ განაწყენებული თანამშრომლები.
მათი თქმით, პრემიების გაცემა გასაიდუმლოებულად მოხდა.
ოზურგეთის მუნიციპალიტეტის საკრებულოში თანამშრომლებზე გაცემული პრემიების სია ასე გამოიყურება:
ავთანდილ სურგულაძე, საკრებულოს თავმჯდომარე – 2360 ლარი, ავთანდილ მექვაბიშვილი, საკრებულოს თავმჯდომარის მოადგილე – 1615 ლარი, თამაზ სალუქვაძე, საკრებულოს ეკონომიკური განვითარების, ინფრასტრუქტურისა და ურბანიზაციის კომისიის თავმჯდომარე -1280 ლარი, კობა ხაბალაშვილი, საფინანსო -საბიუჯეტო კომისიის თავმჯდომარე – 1280 ლარი, ირინე საჯაია, განათლების, კულტურის, სპორტის, ახალგაზრდულ საქმეთა, ჯანმრთელობისა და სოციალურ საკითხთა კომისიის თავმჯდომარე – 1280 ლარი, ვალერიან გირკელიძე, სოფლის მეურნეობის, გარემოს დაცვისა და ბუნებრივი რესურსებით სარგებლობის კომისიის თავმჯდომარე – 1280 ლარი, თეიმურაზ მოქია, ფრაქცია "ერთობის" თავმჯდომარე, – 1280 ლარი, ლევან ნინიძე, ფრაქცია "ქართული ოცნების" თავმჯდომარე, -1280 ლარი, ხვიჩა კილაძე, ფრაქცია "მაჟორიტარების" თავმჯდომარე, – 1280 ლარი, კახა ღლონტი, ფრაქცია "ქრისტიან -დემოკრატების" თავმჯდომარე, -1280 ლარი, მიხეილ გოგოტიშვილი, ფრაქცია "ერთიანი ნაციონალური მოძრაობა ძლიერი თვითმმართველობას" თავმჯდომარე. -1280 ლარი, მერაბ მჟავია, საკრებულოს სამანდატო, საპროცედურო და იურიდიულ საკითხთა კომისიის თავმჯდომარე – 1280 ლარი, ლაშა თავაძე აპარატის საქმისწარმოების, საორგანიზაციო და იურიდიულ საკითხთა განყოფილების უფროსი _ 750 ლარი.
ავთანდილ სურგულაძემ, "გურია ნიუსთან" პრემიების დარიგებასთან დაკავშირებით, რამდენიმე დღის წინ, ასეთი კომენტარი გააკეთა:
"კი, ბატონო, პრემიები დარიგდა გარკვეულ თანამშრომლებზე, ვინც თავი გამოიჩინა სტიქიის დროს.
იმ თანამშრომლებმა, რომლებმაც თავი გამოიჩინეს საქმიანობით, პრემიები დაურიგდათ. მათ არაორდინალურ სიტუაციაში უხდებოდათ სამუშაოს შესრულება, აქედან გამომდინარე ვისზეც ჩათვალა გამგეობამ საჭირო, წერილი გამოგვიგზავნა და გავეცით პრემია", _ გვითხრა სურგულაძემ.
მუნიციპალიტეტის გამგეობაში, ივნისში, ყოფილ თანამშრომლებზე დარიცხული პრემიის სია ასეთია:
კონსტანტინე შარაშენიძე, ყოფილი გამგებელი – 2360 ლარი, ფილიპე ცელაძე- 450 ლარი, გოჩა აბაშმაძე- 450 ლარი, ავთანდილ ჩხაიძე- 450 ლარი, რევაზ გუდაძე- 450 ლარი, ბადრი თოიძე- 450 ლარი, შოთა ქილიფთარი- 450 ლარი, ნინო სალუქვაძე- 450 ლარი, ნია მეგრელიშვილი- 450 ლარი, ალექსანდრე ცეცხლაძე- 450 ლარი, ლელა დვალიშვილი- 400 ლარი, გიორგი ნიკოლაიშვილი-450 ლარი, დავით ხავთასი- 450 ლარი, ტარიელ ჩხარტიშვილი- 450 ლარი, თეა სურგულაძე- 450 ლარი, სოსო სადრაძე- 450 ლარი, ბადრი კვირკველია- 450 ლარი, აბსეალომ სარიშვილი-400 ლარი.
აღნიშნულ ფაქტთან დაკავშირებით კი "გურია ნიუსთან" კომენტარი გააკეთა იურისტმა ლევან ალაფიშვილმა, მისი თქმით, აღნიშნული ფაქტით, საგამოძიებო ორგანოები დაუყონებლივ უნდა დაინტერესებულიყვნენ.
"ეს არის სამართლებრივი კანონდარღვევა, ფაქტი სახეზეა, უდიერი და თავხედური დამოკიდებულება გადასახადის გადამხდელთა ფულის მიმართ – ვინც ასე მოექცა ბიუჯეტის ფულს! იმიტომ, რომ ხელფასი, პრემია და ა.შ. არის შესრულებული სამუშაოს და წახალისების ფორმა და არა ვიღაცის გაჩერების ფორმა, ანუ თანამშრომლებს მისცეს პრემია და ხელფასები არაფრისთვის. ანუ რა გასცეს, როგორ გასცეს? ეს საკითხი, რომ სამართალდამცავი ორგანოების მიერ მოძიებისა და მსჯელობის საგანი რომ გახდეს, ძალიან ბევრ კითხვაზე მოუწევთ პასუხის გაცემა იმ პირებს რომლებმაც ეს გადაწყვეტილება მიიღეს. ჩემი აზრით, აღნიშნული ფაქტით საგამოძიებო ორგანოები დაუყონებლივ უნდა დაინტერესდნენ."
