"რაც შეეხება იმ პრობლემებს, რაც რეგიონებში დამხვდა, დიდი ქალაქებისგან განსხვავებით, ხშირ შემთხვევაში, არჩევანი ან საერთოდ არ არის, ან ძალიან შეზღუდულია. შესაბამისად, იქ სადაც თავისუფალი არჩევანი არ არის, ყოველთვის გროვდება რაღაც პრობლემები. არა ერთხელ ვთქვი, რომ ძალიან გამაკვირვა იმან, თუ რამდენად არის რეგიონებში კონცენტრირებული ეს პრობლემები, საიდანაც გამოსავლის მოძებნა ძალიან რთულია. როგორც პაციენტები, ასევე სამედიცინო პერსონალი დეკლარირებულად აცხადებენ, რომ ითხოვენ ამა თუ იმ სამედიცინო დაწესებულების სახელმწიფოსთვის დაბრუნებას," _ ეს განცხადება ჯანდაცვის მინისტრმა დავით სერგეენკომ "გურია ნიუსთან" მინისტრად დანიშვნის პირველ თვეებში გააკეთა.
მაშინ, ქობულეთსა და ჩოხატაურში ექიმები არასათანადო პირობებსა და აუღებელ ხელფასებს აპროტესტებდნენ. პროტესტის ადრესატები კი კერძო სადაზღვევო კომპანიები გახლდათ. ამ თემების შესახებ "გურია ნიუსს" არაერთი სტატია აქვს გამოქვეყნებული.
რეგიონებში სადაზღვევო კომპანიების მონოპოლიების გარკვეულწილად შეზღუდვების შემდეგ, დღის წესრიგში დადგა საკითხი, თუ როგორ უნდა გაუწიონ კონკურენცია მცირე ზომის კლინიკებმა ისეთ დიდ კლინიკებს, როგორიცაა "ავერსი", "ალდაგი" დ. ა. შ. რომელთაც წლების განმავლობაში ბაზარზე წამყვანი პოზიცია ეკავათ და გაცილებით დიდი ფინანსური უზრუნველყოფა აქვთ.
ამის შესახებ კითხვა "გურია ნიუსმა" ჯანდაცვის მინისტრს დავით სერგეენკოს დაუსვა.
_ ბატონო დავით, ჩოხატაურის მაგალითზე მინდა გკითხოთ _ როგორ გადაწყდება კონკურენციის პრობლემა რეგიონებში? მაგალითად, ჩოხატაურში არის კლინიკა "მამქოლი", რომლის უკან საკმაოდ პროფესიონალი მედიკოსების გუნდი დგას და მოსახლეობაც კმაყოფილია მათი სერვისით, თუმცა, "ავერსი" თავისი ფინანსური რესურსით გაცილებით პრივილეგირებულ მდგომარეობაშია.
ზოგადად, სახელმწიფომ როგორ უნდა დაარეგულიროს კონკურენციის საკითხი მაშინ, როცა ბაზარზე ფაქტობრივად, მონოპოლისტები არსებობენ?
_ ამ შემთხვევაში სახელმწიფოს აქვს ორი მთავარი ინსტრუმენტი: პირველი ის არის, რომ უზრუნველყოს ყველა მოქალაქის სამედიცინო დაწესებულების თავისუფალი არჩევანი და მაგალითისთვის რომ შეგახსენოთ, ქობულეთში დანგრევის პირას მისული ძველი ტრადიციული საავადმყოფო სწორედ ამან დააყენა ფეხზე და უსერიოზულესი კონკურენცია გაუწიეს "ალდაგს", რაც ძალიან მიხარია არა "ალდაგის" კონკურენციის, არამედ ჯანსაღი კონკურენციის გამო.
მეორე ინსტრუმენტი, რის შექმნასაც ახლა ვცდილობთ, ხარისხის კონტროლია, რომ სახელმწიფომ გააკონტროლოს სამედიცინო ხარისხის მიწოდება როგორ ხდება. ასე რომ, ფინანსურ ნაკადებზე არაა ყველაფერი დამოკიდებული. აი, ეს ორი ქმედითი ინსტრუმენტი აქვს სახელმწიფოს და არცერთი კლინიკა არ დაიჩაგრება, _ თქვა მინისტრმა.
