ოზურგეთის მუნიციპალიტეტის ადმინისტრაციული შენობის პირველ სართულზე, საქართველოს პარლამენტის დეპუტატის, ზვიად კვაჭანტირაძის ბიუროს ოფისთან გასულ კვირას ხალხმრავლობა იყო.
_ დეპუტატი ზვიად კვაჭანტირაძე ამომრჩეველს ხვდება და ჩვენც ველოდებით, მაგრამ ზუსტად არ ვიცით, რომელ საათზე დაიწყება შეხვედრა. ჯერ სახლში ყოფილა და იქ მიუკითხავს რამდენიმე ადამიანს. ალბათ, ამის გამო ვერ მოვიდა დროზე, _ გვითხრეს დეპუტატის ბიუროსთან შეკრებილმა ადამიანებმა.
დაახლოებით, ათ წუთში ზვიად კვაჭანტირაძეც მოვიდა.
_ ბატონო ზვიად, ასეთი ხალხმრავლობა არ გვიკვირს გამგეობის ადმინისტრაციულ შენობაში, მაგრამ დღეს ეს ხალხი თქვენთან შეხვედრას ითხოვს.
_ ყველას შევხვდები და მოვუსმენ.
_ ეს ხომ არ განაპირობა იმ ფაქტმა, რომ ხშირად არ ჩამოდიხართ ოზურგეთში?
_ ახლა იცვლება მოსახლეობასთან შეხვედრის გრაფიკი და უფრო მეტად დამინახავთ. მე თუ არ ჩამოვდივარ, ჩემი ბიურო ძალიან აქტიურად მუშაობს და ყველა განცხადებას შემოსვლისთანავე მიგზავნიან.
_ როგორც თქვენმა ამომრჩეველმა გვითხრა, დღეს მიღება სახლშიც გქონდათ.
_ არა, არ ვადასტურებ მაგ ინფორმაციას. მე მაქვს ოზურგეთში ბიურო და აქ ხვდები ხალხს, _ გვითხრა ზვიად კვაჭანტირაძემ.
"რაფერაა საქმე, ჩაგირთო ბიძინამ დენი?"
დეპუტატის ბიუროში პირველი სტუმარი ზვიად კვაჭანტირაძეს ურეკში მცხოვრები, შაქრო ბარდაველიძე დახვდა, რომელსაც 7 წელია,შუქი არ აქვს.
შაქრო ბარდაველიძე: "აქ ყველა დასახმარებლად მოდის. მე ურეკში ვცხოვრობ და 7 წელია შუქი არ მაქვს. ძალიან მერიდება, მაგრამ დახმარება მჭირდება და ამის გამო მოვედი. ერთი პერიოდი შუქის ფულს არ ვიხდიდი, რადგან 17 წელია უსინათლო ვარ. სიკეთის მეტი ამ ცხოვრებაში არაფერი გამიკეთებია. ხელოვანი კაცი ვარ, ცნობილი ლოტბარი გიორგი სალუქვაძე ჩემი მასწავლებელი იყო.
მთავარი პრობლემა არის ის, რომ შუქი მჭირდება, რომ ტელევიზორი ჩავრთო და მოვუსმინო ახალ ამბებს. შვილთან ერთად ვცხოვრობ, ჩემი შვილი არ მუშაობს და ახლა სამი თვის პენსია გამოვიტანე ერთად. კვება ხომ გვინდა? მე წამლები მჭირდება. შუქი იმის გამო არ მაქვს, რომ ადრე გადახდის სხვა სისტემა იყო. როდესაც ინდივიდუალური მრიცხველები დაიდგა, ძველი მრიცხველის გადასახადი მოგვივიდა _ 800 ლარი მქონდა გადასახადი. 500 ლარი ყოფილმა გუბერნატორმა, ვალერი ჩიტაიშვილმა ჩამომაწერა, სააკაშვილისთვის ვაპირებდი წერილის გადაცემას, მაგრამ მან მითხრა, მე დაგეხმარებიო. ახლა სანამდე ეს 300 ლარი არ დაიფარება, ვიქნები შუქის გარეშე. "ნაცმოძრაობის" მხარდამჭერები მეუბნებიან, რაფერაა საქმე, ჩაგირთო ბიძინამ დენიო?!" _ თქვა შაქრო ბარდაველიძემ.
ტუნგო
ოზურგეთელმა გელა სიამაშვილმა ზვიად კვაჭანტირაძეს ტუნგოს ზეთის საწარმოს გაკეთების პროექტი წარუდგინა: "მაქვს ტუნგოს საწარმოს განვითარების პროგრამა. ბოლო შვიდი წელიწადია, ვოვა ცანავასთან და ზურაბ ძნელაძესთან ერთად დავამუშავეთ და უკვე ეს პროგრამა დაწერილია. ეს არ არის მხოლოდ ოზურგეთის და გურიის საკითხი, ეს არ არის დასავლეთ საქართველოს საკითხი. ტუნგო არ გაჩეხილა, რადგან სამშენებლო მასალად არ გამოიყენება და შეშადაც უვარგისია. კარგი იქნება ტუნგოს საწარმოს გაკეთება, რომლისთვისაც 1 500 000 ლარია საჭირო. დღევანდელი სიტუაცისთვის არ არის ეს დიდი თანხა და მინდა, რომ ეს საკითხი დაისვას. ჯერ, რა თქმა უნდა, მოხდეს ამ საკითხის შესწავლა და შემდეგ გაკეთდეს საწარმო. გიგლა აგულაშვილს, თემურ ჭყონიას და კიდევ სხვა თანამდებობის პირებს მივმართე. საკითხით კი დაინტერესდნენ, მაგრამ შედეგი არაფერი არ ყოფილა. ბოლო ორი წელია, არავისთან აღარ მიმიტანია წერილი, რადგან აზრი არ ჰქონდა. ბიზნესმენ ტარიელ ვასაძესთანაც ვიყავი უკრაინაში. მითხრა, რომ ჯერ საჭიროა ტუნგოს სინთეზური შემოწმება და შემდეგ ვნახოთო. ტუნგოს მთელ დასავლეთ საქართველოში აწარმოებდნენ, განსაკუთრებით, აჭარასა და აფხაზეთში, ასევე, ოზურგეთშიც. არც ისე დიდი თანხა არის საჭირო, რომ ამ ინვესტიციაში ფული ჩადონ. ტუნგოს აგრო ტექნიკა არ სჭირდება, გასხვლა არ სჭირდება და რაც მთავარია, რამდენიმე ათასი დამიანი საქმდება აკრეფაში. აქ მხოლოდ ოზურგეთზე არ არის საუბარი. ძალიან მინდა, ეს წერილი წაიკითხოთ და გადახედოთ. არც ერთი სახის საბრძოლო იარაღი, არც ერთი სახის მუსიკალური ინსტრუმენტი არ შეიძლება ვარგისიანად ჩაითვალოს, თუ ტუნგოს ზეთში არ იქნება დამუშავებული. 1500-დან 1800-მდე ღირს ერთი ტონა ტუნგოს ზეთი დღეს ბაზარზე. ყველა უნდა ჩაერთოს ამ საკითხში და ვფიქრობ, რომ მოგვარებადია" , _ ამბობს სიამაშვილი.
შენი ოზურგეთელია და შენ მონახეო
ოზურგეთის მუნიციპალიტეტში, სოფელ ნაგომარში მცხოვრები 60 წელს გადაცილებული ქალბატონი (ქალბატონის თხოვნით მის სახელს და გვარს არ ვახმოვანებთ) ვანო ჩხარტიშვილისგან ანაბრების დაბრუნებას ითხოვს: _ ბატონო ზვიად, ორ საკითხზე ვარ თქვენთან მოსული. უმამოდ გავზარდე ჩემი შვილები. მინდოდა, რომ მათთვის ყველაფერი მქონოდა. ხომ უნდა დადგეს ერთხელ და სამუდამოდ ეს საკითხი და მოგვარდეს ანაბრების პრობლემა? დავიწყე წერილების გაგზავნა, გამოვაგზავნე თქვენს სახელზეც, გავუგზავნე პრემიერ-მინისტრ ირაკლი ღარიბაშვილს და ბიძინა ივანიშვილს. შემდეგ გავიგე ფინანსთა მინისტრის ტელეფონის ნომერი და დავუკავშირდი. ხადურმა მითხრა, "შენი ოზურგეთელია და შენ მონახეო" _ სად ვნახო ვანო ჩხარტიშვილი?! შვილი მყავს უმძიმეს მდგომარეობაში _ ერთ წელიწადში 10 ოპერაცია გავუკეთეთ. სიმსივნე აქვს. მე იმის საშუალება არ გამაჩნია, დამატებითი მკურნალობა ჩავუტარო. ეს ოპერაციები სახელმწიფომ დააფინანსა, მაგრამ იმის გარდა ხომ არის საჭირო ცხოვრება? თუ რამეს მიშველით, მადლობელი ვიქნები.
ზვიად კვაჭანტირაძე ამომრჩეველს დახმარებას დაჰპირდა. როგორც ჩვენთვის გახდა ცნობილი, დეპუტატმა მოსახლეობასთან 6 საათი დაჰყო.
