ირმა ინაშვილის პასუხი ირაკლი მამალაძეს: “სამარცხვინო კომენტარია”

2014 წლის 16 სექტმბერს "გურია ნიუსში" გამოქვეყნდა სტატია სათაურით:"ირაკლი მამალაძე: "მიქიაშვილს ნათქვამი აქვს, რომ თანხებს "პატრიოტთა ალიანსიდანაც" რიცხავენ", სადაც საუბარი იყო საყდრისის გადარჩენის საზოგადოებრივი კომიტეტისა და   ჟურნალისტ ნინო მიქიაშვილის შორის დაპირისპირების შესახებ.

კომიტეტის წევრებმა 9 სექტემბერს გააკეთეს ბრიფინგი, სადაც განაცხადეს, რომ ისინი წყვეტენ კარვების აქციას და სასამართლოს გზით აპირებენ ბრძოლას საყდრისის დასაცავად. ნინო მიქიაშვილმა თანამებრძოლები დეზინფორმაციის გავრცელებაში დაადანაშაულა 

"სამარცხვინო კომენტარია. "საქართველოს პატრიოტთა ალიანსი" საყდრისის თემის წამოწევისთანავე აქტიურად ეწეოდა საყდრისის გადარჩენისათვის საჭირო საქმიანობას, რასაც ახლაც და მომავალშიც გავაგრძელებთ. თუ თქვენ გსურთ ჩვენი ჩამოცილება საყდრისის გადარჩენის პროცესიდან, ეს ძალიან სასაცილო და ბრიყვული მიზანია, რადგან რაც მეტი ადამიანი, მოძრაობა, პარტია, თუ სახელმწიფო სტრუქტურა დაიცავს საყდრისს, გააშუქებს ამ უმწვავეს პრობლემას და იზრუნებს ჩვენი მემკვიდრეობის დაცვაზე, მით უკეთესი. ისე, გაგახსენებთ, როდის და ვინ წამოწია საყდრისის თემა. ეს თემა პირველად გააშუქეს ქალბატონებმა ნატა თარხან-მოურავმა, ნანი ჭანიშვილმა, ნინო მიქიაშვილმა, ანა მარგიანმა, "ობიექტივის" ეთერიდან და სწორედ "ობიექტივი" გითმობდათ ეთერს თქვენც, თვეების მანძილზე. ახლაც ღიაა "ობიექტივის" ეთერი ყველა იმ რესპონდენტისთვის, რომლისთვისაც საქართველოს კულტურული და ისტორიული მემკვიდრეობის დაცვა უმთავრესი ამოცანაა. სწორედ "ობიექტივმა" ჩაწერა პირველი ინტერვიუ ბატონ შტოლნერთან და გააცნო საზოგადოებას მისი პოზიცია. არ მესმის, თქვენი არაადეკვატური რეაქცია "საქართველოს პატრიოტთა ალიანსის" მიმართ, თქვენს კომენტარში ჩვენი დისკრედიტაციის მცდელობას ვხედავ, რაც, ასევე, სასაცილოა, რადგან დასამალი არაა, რომ ვმონაწილეობდით და ვმონაწილეობთ საყდრისის დაცვის პროცესში და ნებართვის აღებას არავისგან ვაპირებთ, არც თქვენგან, არც – სხვებისგან! მეტიც, კიდევ ერთხელ ვუსვამ ხაზს, რომ საყდრისის სატკივარის შესახებ ფართო საზოგადოებას სწორედ ჩვენ, "საქართველოს პატრიოტთა ალიანსის" წევრები ვაწვდიდით დეტალურ ინფორმაციას. მომავალშიც სერიოზული მოქმედებები გვაქვს დაგეგმილი, როგორც საქართველოში, ისე უცხოეთში. არავითარი პოლიტიზირება შუაში არ არის. მე ჯერ ჩემი ქვეყნის მოქალაქე ვარ და მერე- "საქართველოს პატრიოტთა ალიანსის" გენერალური მდივანი და ნებისმიერ პროცესში ჩავერევი, რომელიც საფრთხეს უქმნის ჩემი სამშობლოს ეროვნულ ინტერესებს. ეს ერთი. მეორე- ჩემთვის და ჩვენთვის, გაუგებარია, რატომ ახსენებს "გურია ნიუსის" რესპონდენტი მაინც და მაინც "საქართველოს პატრიოტთა ალიანსს", როგორც პოლიტიკურ პარტიას, რომელიც ჩართული იყო ( ვადასტურებ, რომ ვართ ჩართული და მომავალშიც ვიქნებით ჩართულნი) საყდრისის გადარჩენის პროცესში. რამდენადაც ჩემთვის ცნობილია, საყდრისის მცველებს სოლიდარობა სხვა პოლიტიკურმა პარტიებმა და მათმა ლიდერებმაც გამოუცხადეს და მე ამაში ცუდსა და მიუღებელს ვერაფერს ვხედავ. მცდარი წარმოდგენაა, თითქოს პოლიტიკური პარტია ქვეყნისთვის უნიშვნელოვანესი საკითხების გახმაურებასა და გადაწყვეტაში არ უნდა მონაწილეობდეს. რომელ სახელმძღვანელოში წაიკითხეთ ეს, იქნებ მიკარნახოთ?! მე აქამდეც ვმონაწილეობდი ჩემი ქვეყნისთვის მნიშვნელოვან პროცესებში და, მგონი, ნებართვა თქვენგან არ ამიღია,- წავსულიყავი, თუ არა აფხაზეთის ომში, დავპირისპირებოდი, თუ არა სააკაშვილის რეჟიმს ბოლო 10 წლის განმავლობაში, დამეცვა, თუ არა პატიმრების სიცოცხლე და ჯანმრთელობა მაშინ, როცა მათ აწამებდნენ… და ა.შ. ასე რომ, თქვენ ვერ დამიშლით, ვიყო ჩემი სამშობლოს ნაწილი. ეს კარგად დაიმახსოვრეთ.

არ ვიცი, რა კარვები აიღეთ და რა – დატოვეთ. დარწმუნებული ვარ, ნინო მიქიაშვილი დარჩენილ ნივთებს გამოგიგზავნით. დღეს საყდრისს იცავს ნინო მიქიაშვილი, ირაკლი ლომიძე და ჩვენი პარტიის ახალგაზრდული მოძრაობის წევრები, რომლებიც, ძირითადად, ბოლნისელები არიან და ძალიან სწორია, რომ საყდრისის მცველებად რჩებიან. მეოთხე- დასამალი არაა ფაქტი, რომ საყდრისის ზოგიერთმა "მცველმა", "ბრძოლის" პროცესში ძალიან ბევრი საერთო გამოძებნა კომპანიასთან "RMG" და სწორედ იმ ხალხთან დაიწყო ქეიფი და დროსტარება, რომლებმაც საყდრისის ნაწილი უკვე დაანგრიეს. კარგი იქნება, თუ ნინო მიქიაშვილი ღიად დაწერს და ისაუბრებს ამ თითქოსდა "მცველების" "მოღვაწეობაზე". და ბოლოს, მეხუთე – "ჩორტის" ჩაგდება ჩვენი და ჩემი სტილი არ არის. თუ სათქმელი მაქვს, საჯაროდ და პირდაპირ ვეუბნები ოპონენტებსაც, მტრებსაც და ახლობლებსაც. კიდევ ერთხელ გწერთ: ჩვენი პარტიის დისკრედიტაციის მცდელობას ვხედავ და ამის საშუალებას, უბრალოდ, არ მოგცემთ. არც მართალნი ხართ და არც ობიექტურნი. მზად ხართ, დაიცვათ საყდრისი? დაიცავით ისე, როგორც შეგიძლიათ, დაიცავით თქვენი წილი საქართველო. სხვების ლანძღვას და კრიტიკას შეეშვით." _ აცხადებს ირმა ინაშვილი.