"გურია ნიუსის" წყაროს ინფორმაციით, 14 სექტემბერს გვიან ღამით, მაღალი სიჩქარით მომავალი ავტომობილი ბორცვებს შეეჯახა, მძღოლმა საჭე ვერ დაიმორჩილა და ძვირადღირებული "მერსედესი" დააზიანა.ოზურგეთში, 13 სექტემბერს, საღამოს საათებში, ქალაქის ტერიტორიაზე არსებული საჯარო სკოლების წინ, ქალაქის მერიის ინიციატივით, შესაბამისმა სამსახურებმა ხელოვნური ბორცვები მოაწყვეს და სკოლებთან მისასვლელი გზების ორივე მხარეს დააყენეს მაუწყებელი საგზაო ნიშნები, რაც, რა თქმა უნდა, აუცილებელია ბავშვთა უსაფრთხოებისთვის.
გამონაკლისი არ ყოფილა ქალაქ ოზურგეთის ცენტრში, მერაბ კოსტავას ქუჩაზე მდებარე, საპატრიარქოსთან არსებული წმინდა გაბრიელ ეპისკოპოსის სახელობის სამრევლო სკოლა. რა თქმა უნდა, აქაც, სკოლის მისასვლელ გზაზე, გზის ორივე მხარეს დააყენეს სიჩქარის შემზღუდველი (3, 24) მაფრთხილებელი (ბავშვები 1, 21) და ხელოვნური ბორცვის აღმნიშვნელი საგზაო ნიშნები. სამრევლო სკოლასთან ხელოვნური ბორცვების დაგებას პირადად ესწრებოდნენ და თვალყურს ადევნებდნენ საპატრულო პოლიციის ეკიპაჟები.
როგორც "გურია ნიუსს" კოსტავას ქუჩის მცხოვრებლებმა უთხრეს, სამრევლო სკოლა, რომელიც ამავე ქუჩაზე, ე.წ. "ზვანის" ტერიტორიაზე მდებარეობს, არის ყველაზე მეტად დატვირთული ავტოტრანსპორტის მოძრაობით და ბორცვებისა და ნიშნების მოწყობა მართლაც დროული იყო.
15 სექტემბერს, დილით, სკოლის დაწყებამდე რამდენიმე საათით ადრე, სასულიერო სკოლასთან, ქალაქის შესაბამისმა სამსახურებმა, შემაფერხებელი ბორცვი გზის სავალი ნაწილის ორივე მხარეს დაჩქარებული ტემპით აიღეს.
აღების პროცესს პირადად ესწრებოდა და თვალყურს ადევნებდა ქალაქის მერიის ერთ-ერთი სამსახურის უფროსი ვლადიმერ სალუქვაძე. ჩვენი წყაროს ინფორმაციით, პირადად სალუქვაძეს დაევალა რამდენიმე საათის წინ დაგებული ხელოვნური ბორცვის აღება ცენტრალური გზის ამ მონაკვეთზე და 15 სექტემბერს, გამთენიისას შეუდგა კიდეც მუშაობას.
რა გახდა სამრევლო სკოლასთან, ცენტრალურ ტრასაზე დაგებული ხელოვნური ბორცვის აღების მიზეზი?
"გურია ნიუსის" წყაროს ინფორმაციით, 14 სექტემბერს გვიან ღამით, მაღალი სიჩქარით მომავალი ავტომობილი ბორცვებს შეეჯახა, მძღოლმა საჭე ვერ დაიმორჩილა და ძვირადღირებული "მერსედესი" დააზიანა.
ჩვენი ინფორმაციით, ავტომანქანას კახი კალაძის ახლო მეგობარი, ოზურგეთის მერის მძახალი, წარმოშობით ოზურგეთელი, ბიზნესმენი, ილა კეჭაყმაძე მართავდა.
წყაროს ინფორმაციით, ამის შემდეგ, კეჭაყმაძემ შესაბამის პირებს დაურეკა და დაგებული ბორცვის სასწრაფოდ აღება მოითხოვა.
ჩვენ კეჭაყმაძესთან დაკავშირებას შევეცადეთ, თუმცა, მან სატელეფონო ზარებს არ უპასუხა (თუ ბიზნესმენს საკუთარი პოზიციის დაფიქსირება მოუნდება, "გურია ნიუსი" მის მოსაზრებას მკითხველს აუცილებლად გააცნობს).
ინფორმაციას იმის შესახებ, რომ დაგებული ბორცვის აღების მიზეზი ავტოსაგზაო შემთხვევა იყო, სამრევლო სკოლის დირექტორი ნინო გოგეშვილიც ადასტურებს.
ნინო გოგეშვილი, საპატრიარქოსთან არსებული წმინდა გაბრიელ ეპისკოპოსის სახელობის სამრევლო სკოლის დირექტორი: მე ვესწრებოდი ხელოვნური ბორცვების მოწყობას. დააგეს 13 სექტემბერს. ჩვენ რამდენჯერმე ოფიციალურად ვთხოვეთ მუნიციპალიტეტის გამგეობას, რომ მალე მოეწყო მსგავსი ხელოვნური ბორცვები, რადგან სასწავლო წელი იწყებოდა და ადრე ორჯერ შემთხვევაც გვქონდა _ ბავშვს დაეჯახა ავტომობილი. ახლა თავიანთი ინიციატივით დააგეს. ყველა სკოლასთან მოაწყვეს, ძალიან გვიხაროდა. მე მეგობრობის ქუჩაზე ვცხოვრობ, არის საბავშვო ბაღი, სადაც არ არის ასეთი ინტენსიური მოძრაობა, მაგრამ იქაც დააგეს. რა მოხდა, ნამდვილად არ ვიცი, ზუსტი ინფორმაცია არ მაქვს, რატომ მოხდა მეორე დღესვე მისი აღება ასე დაჩქარებულად. მოვედი 15 სექტემბერს სკოლაში და გზაზე უკვე აღარ იყო ბორცვი. სასწავლო პროცესი რომ დაიწყო, იმ დღეს გავიგეთ, რომ სწრაფად მიმავალი ავტომანქანა გადაბრუნდა, სხვა არაფერი ვიცი. დაგებას ესწრებოდა საპატრულო პოლიციაც და სხვა შესაბამისი სამსახურები, სპეციალურ ფორმებში იდგნენ და თვალყურს ადევნებდნენ. ამ გზაზე სატვირთოებიც დადის, ცენტრალური ტრასაა. სხვას ვერაფერს გეტყვით, _ გვითხრა ნინო გოგეშვილმა.
აღნიშნული ტერიტორია წარმოადგენს დასახლებულ პუნქტს. ურეკიდან ქალაქ ოზურგეთის შემოსასვლელში, გზაზე დაყენებულია შესაბამისი საგზაო ნიშანი, რომლის მიხედვითაც მძღოლები ვალდებული არიან, შეზღუდონ სიჩქარე 60 კმ/სთ-მდე. ხოლო სასულიერო სკოლასთან მისვლამდე საკმაო მანძილზე დაყენებულია 1,21 საგზაო ნიშანი (ბავშვები) და სიჩქარის შემზღუდველი/ ამკრძალავი ხელოვნური ბორცვის საინფორმაციო ნიშანი.
მოძრაობის წესების დაცვით მომავალი მძღოლები, სკოლასთან მისვლამდე ორივე მხრიდან წინასწარ ხედავენ საგზაო ნიშანს და ყოველგვარი დაზიანების გარეშე გადადიან ბორცვებზე.
როგორც აღნიშნულ საკითხში კომპეტენტური პირები "გურია ნიუსთან" ამბობენ, სამრევლო სკოლასთან ყველაზე მეტად საჭიროა ბორცვების არსებობა, ვინაიდან სკოლის მიმდებარე ტერიტორიაზე ბევრი კომერციული და არაკომერციული ფართია და, შესაბამისად, გადატვირთული მოძრაობაა.
ქალაქ ოზურგეთის მერიაში აღნიშნულთან დაკავშირებით ასეთ კომენტარს აკეთებენ: "ახალი სასწავლო წლის დაწყებასთან დაკავშირებით ქ. ოზურგეთის მერის სკოლებში ვიზიტის დროს, პედაგოგების და ადმინისტრაციის ერთ-ერთი მთავარი მოთხოვნა გახლდათ, მოსწავლეთა უსაფრთხოების მიზნით, სკოლის მიმდებარე ტერიტორიებზე დამონტაჟებულიყო გზის შემაკავებელი ბარიერები. მერიამ გაითვალისწინა მათი მოთხოვნა და ქალაქის ყველა სკოლასთან გაკეთდა ასფალტის ბარიერები, თუმცა, საპატრულო პოლიციის მიერ მიღებული მითითების საფუძველზე, რომელიც პირველხარისხოვან ქუჩაზე ტრანსპორტისთვის შემაფერხებელი საგზაო ბარიერის მოწყობას ზღუდავს, წმ. გაბრიელ ეპისკოპოსის სახელობის სამრევლო სკოლის წინ აღნიშნული ბარიერი აღებული იქნა, სამომავლოდ კი, უსაფრთხოების მიზნით, იგეგმება გამაფრთხილებელი ნიშნულებისა და შუქნიშნების მონტაჟი".
შსს პრესსამსახური ხელოვნური ბორცვების აღებასთან დაკავშირებით ამბობს, რომ ხელოვნური ბორცვები "სტანდარტებს არ შეესაბამებოდა".
"გურია ნიუსი" დაუკავშირდა "სერვისცენტრის" დირექტორ ვლადიმერ სალუქვაძეს. სალუქვაძემ აღნიშნა, რომ ეს საკითხი მის კომპეტენციაში არ შედის, ვისი დავალებით და რა მიზეზით მოხდა ხელოვნური ბორცვის აღება და, შესაბამისად, პასუხს ამაზე ვერ გაგვცემს. სალუქვაძის თქმით, ის მხოლოდ 15 სექტემბერს, დილას ადრე, ქალაქის, როგორც სხვა ქუჩებს, ასევე, სამრევლო სკოლის ტერიტორიას ასუფთავებდა.
