ამ წუთებში გურიაში სტიქია მძვინვარებს. ყველაზე მეტად დაზარალდა სოფელი შემოქმედი, რომელიც მთლიანად დატბორილია. სკოლიდან ბავშვების ევაკუირება მოხდა. ადიდდა და კალაპოტიდან გადმოვიდა მდინარე ბჟუჟი, რომელმაც ჯებირები წაიღო. ფაქტობრივად, სოფლიდან ქალაქისკენ დამაკავშირებელი სამანქანო გზა აღარ არის. წყალმა დატბორა სკოლის შენობაც. მოსახლეობა გარეთ ვერ გამოდის. როგორც ადგილობრივები ამბობენ, მსგავსი შემთხვევა არ ახსოვთ. ადგილზე გასულები არიან ადგილობრივი ხელისუფლების წარმომადგენლები.
ასევე დატბორილია ქუჩები ოზურგეთში.
ოზურგეთის მუნიციპალიტეტის გამგებლის, მერაბ ჭანუყვაძის თქმით, მაქსიმალურად ცდილობენ, რომ შეინარჩუნონ სიმშვიდე.
"ადგილზე იმყოფება სამაშველო სამსახურები, რომლებმაც სტიქიის ზონიდან მოსახლეობისა და ბავშვების ევაკუაცია დროულად მოახდინა. საგანგაშო არაფერია, ველოდებით წვიმის გადაღებას. მსგავსი სიტუაციაა კიდევ ერთ სოფელში – ცხემლისხიდში. იქაც დროულად ვახდენთ მობილიზაციას", _ გვითხრა ჭანუყვაძემ.
