“მინდოდა ჩამოვსულიყავი და ჩემი თვალით მენახა რა მოხდა გურიაში”

საქართველოს პრემიერ-მინისტრმა, ირაკლი ღარიბაშვილმა ოზურგეთის მუნიციპალიტეტის, სოფელ შემოქმედში წყალდიდობისგან დაზარალებული, ნატო გუდავაძის საცხოვრებელი სახლი მოინახულა, მანამდე კი ის ადგილობრივი ხელისუფლების წარმომადგენლებთან ერთად, მდინარე ბჟუჟის სანაპიროზე არსებულ სიტუაციას გაეცნო.

"ჩვენ ჩვენი საქმე გამოგვაჩენს, ყველას დავეხმარებით და მოსახლეობისთვის აუცილებლად დავეხმარებით. მინდოდა ჩემი თვალით მენახა, რაც მოხდა გურიის რეგიონში და ასევე აჭარაში. მინდა აღვნიშნო კიდევ ერთხელ შტაბის ეფექტური მუშაობა, ადგილობრივი მთავრობის, ოზურგეთის გამგებლის. ისინი 24 საათის განმავლობაში მუშაობდნენ და არცერთი ოჯახი არ დარჩა ყურადღების გარეშე, ეს არის აღნიშვნის ღირსი. ზარალი იქნება დათვლილი და ყველა ოჯახი, რომელსაც რაიმე სახის ზიანი მიადგა ამის კომპენსირება მოხდება. სახელმწიფო გამოყოფს ამის თანხებს.

დღეს დილით ოზურგეთის მუნიციპალიტეტისთვის 6 000 000 ლარი გამოვყევით და ამის გარდა თუ სადმე, რომელიმე ოჯახი დაზიანდა და ზარალი მიადგა, რა თქმა უნდა მათაც დავეხმარებით. გასულ წელს 48 000 000 ლარი გამოვყავით კომპენსირებისთვის და წელს 40 000 000 ლარის ოდენობით მოხდება კომპენსაციების დარიგება", _ განაცხადა პრემიერ-მინისტრმა მედიასთან საუბრის დროს.

"გურია ნიუსი" დაინტერესდა გაიცემა თუ არა კომპენსაციები ჩოხატაურის და ლანჩხუთის მუნიციპალიტეტებში.

_ბატონო ირაკლი წყალდიდობა იყო ლანჩხუთში და ჩოხატაურში, აქ როგორ მოხდება დახმარება მოსახლეობისთვის?

_ ყველა სამსახური არის მობილიზებული. სტიქიიდან ერთ საათში მოხდა ყველა სამსახურის მობილიზება. დასავლეთ საქართველოში არის შტაბი შექმნილი, ჩემი წარმომადგენელი არის მომაგრებული, მინდია ჯანელიძე, რომელიც ადგილზე უწევს კოორდინაციას იმ სამუშაოებს, რომელიც უკვე მიმდინარეობს გურიის რეგიონში. ეს არის უპრეცედენტო შემთხვევა ამ რეგიონისთვის, რომელიც სტიქიამ მიაყენა. ზარალი უკვე დათვლილია და ყველა ადამიანი დაკმაყოფილდება