საწებელიც და შეჭამანდიც
ადვილი, ძალიან გემრიელი და ბევრნაირი კერძის მოსამზადებლად შესანიშნავი _ ასეთია პომიდვრის საწებელი ბულგარული წიწაკით.
საჭირო მასალა ერთი ულუფისთვის:
5 კილოგრამი პომიდორი, 2 კილოგრამი წითელი ბულგარული წიწაკა, კილონახევარი ხახვი, ერთი ჩაის ჭიქა ზეთი, ერთი ღვინის ჭიქა ხმელი ქინძი, ამდენივე უცხო სუნელი და შაქარი. მარილი და წიწაკა გემოვნებით.
ავიღოთ კარგად დამწიფებული წითელი პომიდორი, გავფცქვნათ, წვრილად დავჭრათ ან გავატაროთ და 10 წუთი ვადუღოთ. მერე მასში ჩავყაროთ არც ისე წვრილად დაჭრილი ბულგარული, ალყად დაჭრილი ხახვი და დაბალ ცეცხლზე ვადუღოთ მანამ, სანამ ხახვის ხელით გასინჯვისას არ მივხვდებით, რომ ის მოხარშულია. შემდეგ დავამატოთ ზეთი, სუნელები და შაქარი მითითებული რაოდენობით, მარილი და დაფქული მწარე წიწაკა გემოვნებით (შეგიძლიათ, მწარე წიწაკა საერთოდ არ უქნათ). დავამატოთ 10 აბი დაფშვნილი ასპირინი და ვაცალოთ 5 წუთით დუღილი. შემდეგ ცხლად ჩავასხათ ქილებში და მოვხუფოთ. გახსოვდეთ, ახლა კონსერვების კეთების სეზონია და მიუხედავად მრავალი სახეობის საწებლის არსებული რეცეპტისა, აღნიშნული ერთ-ერთი საუკეთესოა იმ კუთხით, რომ შეჭამანდის და საწებლის სახითაც გამოიყენებთ და მრავალ კერძს (ტოლმა, "სოუზი", ბორშჩი, სუპი, გუფთა, ჩიჟი-პიჟი) მისი მეშვეობით უგემრიელესს გახდით. ჩემი გამოცდილებით, ეს რეცეპტი ყველაზე საუკეთესოა კერძების დასამზადებლად და შესანახადაც ძვირი არ გვიჯდება. ამიტომ, ყოველ შემოდგომაზე დიდი რაოდენობით ვაკეთებ და ვინახავ ზამთრისთვის. საუკეთესოა, აუცილებლად გააკეთეთ!
ბულგარული წიწაკის შეჭამანდი
თუ საწებელს მეტი რაოდენობის პომიდორი სჭირდება, აქ პირიქითაა, ბულგარული წიწაკა სჭარბობს.
საჭიროა: 5 კილოგრამი წითელი ბულგარული, სამი კილოგრამი პომიდორი, 2 კილოგრამი ხახვი, ერთი ჩაის ჭიქა შაქარი, ერთი ღვინის ჭიქა ხმელი ქინძი, ამდენივე შაქარი და ძმარი. მარილი და მწარე წიწაკა გემოვნებით.
კარგად დამწიფებული პომიდორი გავატაროთ და ვადუღოთ 10 წუთით. შემდეგ ჩავყაროთ მასში ალყა-ალყად დაჭრილი ბულგარული და ხახვი. იდუღოს და როცა ხახვი მოიხარშება, მზადაა. ამის შემდეგ დავამატოთ ქინძი, შაქარი, ზეთი და ძმარი მითითებული რაოდენობით, წიწაკა და მარილი გემოვნებით. მოვურიოთ. წამოდუღდეს. დავამატოთ 10 აბი დაფშვნილი ასპირინი. ცოტა ხანს კიდევ იდუღოს და ცხლად მოვხუფოთ. თუ პორციას გავაორმაგებთ, ყველაფერთან ერთად, ასპირინიც გააორმაგეთ. ძალიან გემრიელი და ადვილად ხელმისაწვდომი ბოსტნეულით აკეთებთ. ბლომად გამოდის, იაფი გიჯდებათ! შეინახეთ და მიირთვით ზამთარში!
