ვარკეთილის პოლიციის უფროსს ვახო ჩოფლიანს, ამავე პოლიციის სამმართველოს უფროსის მოადგილეს გიორგი კობაურს და ვარკეთილის მასივის პოლიციის ინსპექტორ-გამომძიებელს ლაშა სხირტლაძეს "თავისუფალი დემოკრატების" წევრი, "ქართული ოცნების" ახალგაზრდული ფრთის ყოფილი წარმომადგენელი გიორგი ხურციძე ცემაში ადანაშაულებს. როგორც ხურციძე აცხადებს, ის გუშინ მეგობართან ერთად პოლიციის მაღალჩინოსნებმა ფოტოს გადაღებისთვის უკანონოდ დააკავეს და რამდენიმე საათის განმავლობაში განყოფილებაში ჰყავდათ.
"გურია ნიუსი" გიორგი ხურციძეს ესაუბრა, რომელიც ჩვენთან ინცინდენტის დეტალებს ჰყვება:
_ გიორგი, სად მოხდა ინცინდენტი პოლიციასა და თქვენს მეგობარს შორის?
_ გუშინ, შუადღისას, ვარკეთილში მეგობრებთან ერთად ვიყავი მანქანით. იქედან რომ წამოვედით, ჩემმა მეგობარმა ავტომობილი გამაჩერებინა რამდენიმე წუთით და იქვე გადავიდა საქმეზე. ამ დროს მას პოლიციის რამდენიმე თანამშრომელი მიუახლოვდა. პატრულის თანამშრომლები არ იყვნენ. მე და კიდევ ერთი მეგობარი მანქანაში ვიჯექით და ვუყურებდით როგორ საუბრობდნენ. ცოტა ხანში ჯიკაობა დაუწყეს და მანქანაში ჩასმას უპირებდნენ. გადავედი მანქანიდან და ვიკითხე რა ხდებოდა. რამდენიმე წუთში ვარკეთილის პოლიციის სამმართველოს უფროსის მოადგილე გიორგი კობაური მოვიდა. როგორც ჩანს, მასთან დარეკვა თავად ამ პოლიციელებმა მოასწრეს. კობაურს ვკითხე რა ხდებოდა, რაზეც ძალიან უხეშად მიპასუხა: შენ არ გელაპარაკები საქმე ამასთან მაქვსო, მეგობარზე მიმითითა. გვერდზე გავიწიე, დაახლოებით 3 მეტრის მოშორებით და ვუსმენდით. საუბარი გააგრძელეს, ჩემი მეგობარი ეკითხებოდა, რისთვის გააჩერეს, რაც წინააღმდეგობის გაწევად ჩაუთვალეს და სამმართველოში გადაყვანას უპირებდნენ. სხვა მიზეზი პოლიციელებს არ დაუსახელებიათ.
_ თქვენ რის გამო გადაგიყვანეს პოლიციის სამმართველოში?
_ საუბრის დროს, უცებ გამოიხედა კობაურმა და მე და ჩემს მეგობარს შეურაცხყოფა მოგვაყენა: დაიშალეთ თქვენი დედა მ…….. ნო.. ამ გინებაზეც არ მომიხდენია რეაგირება გარდა იმისა, რომ ტელეფონი ამოვიღე და ფოტო გადავუღე, რის შემდეგაც მხეცებივით მეცნენ, ჩამტენეს მანქანაში და ტელეფონის წართმევა დამიპირეს, რომელსაც არ ვაძლევდი. მცემეს ისე, რომ დაზიანებები არ დამტყობოდა, სულ მუცელში და ნეკნებში მირტყეს და ტელეფონიც წამართვეს, რომლიდანაც გადაღებული ფოტო წამიშალეს. 5 საათი მაყურყუტეს სამმართველოში, იქ კიდევ მცემეს. ცემაში მონაწილეობდნენ ზემოთ აღნიშნული გიორგი კობაური და ასევე ვარკეთილის მასივის პოლიციის ინსპექტორ-გამომძიებელი ლაშა სხირტლაძე.
მისვლისთანავე პოლიციის უფროსი ვახო ჩოფლიანი მოვიდა და იკითხა რაზე ვიყავით დაკავებულები. უთხრეს, რომ მათ წინააღმდეგობა გავუწიეთ, ვუხსნიდი, რომ არანაირი წინააღმდეგობა არ გაგვიწევია და პოლიციამ ძალით ჩაგვტენა მანქანაში. მეგონა, ადამიანურად გაიგებდა, მაგრამ მოვიდა და მითხრა: შე დედა …. წინააღმდეგობას როგორ უწევ ჩემს თანამშრომლებსო და მანაც ხელი გამარტყა. ჩოფლიანს ისიც ვუთხარი, რომ პოლიტიკური პარტია "თავისუფალი დემოკრატების" წევრი ვარ, ესეც არ გაითვალისწინეს.
ამის შემდეგ წამიყვანეს ნარკოლოგიურში შემოწმებაზე, მაგრამ წამლის მოხმარება რომ არ დამიდგინდა, ამაზე კიდევ უფრო გაღიზიანდნენ.
"კაპეზედან“ რომ გამომიყვანეს, მამაჩემი დამხვდა, რომლისთვისაც უთქვამთ, არაფერი დაუშავებია, ფოტო რომ არ გადაეღო, არ წავიყვანდითო. ასეთი რამ შეიძლება ნებისმიერ ადამიანს შეემთხვეს, ამიტომ დავწერე საჯაროდ სტატუსი, რომ პრევენცია და რეაგირება მაინც მოხდეს. ტყუილუბრალოდ რომ არ სცემონ და დაიჭირონ უდანაშაულო ადამიანები.
_ წარდგენილი გაქვთ თუ არა ბრალი და როდის იქნება სასამართლო პროცესი?
_სასამართლო მექნება, თუმცა როდის, ეს არ ვიცი. გამომძიებლის ზარს ველოდები. ჯერჯერობით არც გამომძიებელს დაურეკავს. ხელწერილი დამაწერინეს, რომ გამომძიებლის პირველივე ზარზე გამოვცხადდები. ბრალის წარდგენა, როგორც ვიცი, 24 საათის განმავლობაში უნდა მოხდეს. ვადა დღეს, დღის 5 საათზე გადის. რას მედავებიან ისიც არ ვიცი წესიერად. არავითარი წინააღმდეგობა არ გამიწევია. ტელეფონი რატომ უნდა მიმეცა ვერ ვხვდები.
_მიმართეთ თუ არა შინაგან საქმეთა სამინისტროს გენერალურ ინსპექციას?
_ შსს-ს გენერალურ ინსპექციაში საქმის კურსში არიან, თუმცა განცხადება ჯერ არ დამიწერია. უახლოეს პერიოდში ვაპირებ, უწყებას ოფიციალური განცხადებით მივმართო. ამიტომ დამატებით დეტალებზე ვერ ვსაუბრობ. ეს არის ის ინფორმაცია, რაც შემიძლია ამ ეტაპისთვის გითხრათ.
_ არა, არც მე ვარ ნასამართლევი და არც ჩემი მეგობარი. სხვა, უცხო პიროვნებაც რომ დამენახა ანალოგიურ სიტუაციაში, მივიდოდი და ვიკითხავდი რა ხდებოდა. ხმაც არ ამომიღია, უბრალოდ, ფოტო გადავიღე. სულ ეს იყო. ერთადერთხელ, 2012 წლის აგვისტოში დამაკავეს და რამდენიმე დღში გამათავისუფლეს. 5 აგვისტოს ბიძინა ივანიშვილის შეხვედრა იყო ბათუმში მე გახლდით შუახევის საორგანიზაციო ჯგუფის ხელმძღვანელი, სადაც ჩვენს ახალგაზრდულში "კუდი"-ს მიერ ჩასმული აგენტი გამოვავლინე, რომელსაც მანქანაში ჩამწერი აპარატურა ჰქონდა, გახსოვთ, ალბათ, რა პერიოდი იყო, არჩევნებისთვის ვემზადებოდი, ყველგან "ნაციონალური მოძრაობის" წევრები იყვნენ თანამდებობებზე და იმის მაგივრად, რომ გამოძიება დაწყებულიყო, მე დამაპატიმრეს.
ვფიქრობ, ეს პოლიციელებიც „ნაციონალების“ დროიდან შემორჩენილი კადრები არიან. „ქართულ ოცნებაშიც“ და თანამდებობებზეც არიან მსგავსი ადამიანები, რომლებმაც, შესაძლოა, საბოტაჟი მოაწყონ. ჩემი მხრიდან, ამ ფაქტის გახმაურებაც იმას ემსახურება, რომ პრევენციული ღონისძიებები გატარდეს და ეს ადამიანები დაკავებულ თანამდებობებს ჩამოშორდნენ.
