მალე, სასწრაფო დახმარების სამსახურს 220 ახალი მანქანა ეყოლება და როგორც ჯანდაცვის სამინისტროში აცხადებენ, დაგვიანებების პრობლემაც, ამით ამოიწურება. 2015 წლის დასაწყისამდე ავტოპარკი შეივსება, ასევე გადამზადდებიან ექიმებიც და ექთნებიც. მისამართზე გასვლაც გეოგრაფიული ხელმისაწვდომობის პრინციპით მოხდება.
ამ დრომდე, რეგიონებში სასწრაფო სამედიცინო დახმარების მიწოდების პრობლემა ძირითადად განპირობებული იყო ავტოპარკის გაუმართაობით. მანქანების 80 % მუდმივად საჭიროებდა შეკეთებას. მწყობრიდან გამოსული ავტომობილების გამო, ფიქსირდებოდა მისამართზე დაგვიანების ფაქტები.
ჯანდაცვის სამინისტროში აცხადებენ, რომ განახლებული ავტოპარკის პირობებში მსგავსი შემთხვევები გამოირიცხება. შესაბამისად, გაუმჯობესდება სასწრაფო სამედიცინო დახმარების მიწოდების ხარისხი. სასწრაფოს ახალი მანქანები ეტაპობრივად შემოვა, 2015 წლის დასაწყისისთვის კი სრულად განახლდება ავტოპარკი და მთელი ქვეყნის მასშტაბით ყველა ძველი ავტომობილი ჩანაცვლდება ახლით.
"ყველაზე პირველი, რაც გავაკეთე მოსვლის დღიდან, ეს იყო საქართველოს მასშტაბით სასწრაფო დახმარების სადგურების მენეჯერებთან შეხვედრა. მეორე _ დავუკავშირდი შინაგან საქმეთა სამინისტროს 112-ის სამსახურს და იმ დღიდან ძალიან მჭიდროდ მიდის ჩვენი თანამშრომლობა
რაც ამ მაგიდაზე დოკუმენტები აწყვია, ამის ნახევარი ეძღვნება სასწრაფო დახმარებას" _ განაცხადა ჯანდაცვის მინისტრმა დავით სერგეენკომ "გურია ნიუსთან" ჯერ კიდევ 2013 წლის აპრილის თვეში.
სტატისტიკა _ სამედიცინო დახმარების სამსახური 2005-2011 წლებში
2005 წელს საქართველოს მთავრობამ გადაწყვიტა, საქართველოში სასწრაფო სამედიცინო დახმარების სამსახური უფასო ყოფილიყო. მის მენეჯმენტს ახორციელებდა სამინისტროს საქვეუწყებო სამსახური (ჯერ სოციალური დაზღვევის ერთიანი სახელმწიფო ფონდი, მერე ჯანდაცვის პროგრამების სააგენტო). თავის დროზე ჯანდაცვის სამინისტრომ ყველა რაიონისთვის შეისყიდა 130 ორხიდიანი "უაზის მარკის" და 20 "ჰიუნდაის" მარკის ავტომობილი. 2009 წელს კვლავ მოხდა ავტოპარკის განახლება. შეისყიდეს 60 უაზი. თუმცა, 2011 წელს გადაწყდა, სასწრაფოები (თბილისის გარდა) მმართველობაში გადასცემოდა კერძო სადაზღვევო კომპანიებს.
როგორც ჯანდაცვის სამინისტროში აცხადებენ, მთავარი პრობლემების ჩამონათვალი, რის გამოც აღნიშნული სამსახური ამ მდგომარეობამდე მივიდა, ასეთი იყო: " არასწორი გეოგრაფიული დაყოფა; ერთ რეგიონში მოქმედი რამდენიმე ოპერატორი კომპანია ქმნიდა მუნიციპალიტეტებს შორის გადაადგილების პრობლემას; არ იყო დაცული უახლოესი კლინიკის პრინციპი; სსიპ – "112"-ს უჭირდა როგორც შეტყობინების გადაცემა, ასევე შესრულების გაკონტროლება; GPS სისტემის არ ქონა, ალტერნატიული კავშირის (რადიოსადგურების) არ ქონა; სადაზღვევო კომპანიების მიერ 50% დაფინანსების გადარიცხვის სისტემატიური დაგვიანება; საწვავის მიწოდების დაგვიანება;
რაც შეეხება ავტოპარკინგს, ავტოპარკის მდგომარეობა ასეთი იყო: სულ ავტოპარკში 283 ავტომობილი იყო, აქედან კარგ მდგომარეობაშია 48, საშუალო მდგომარეობაშია 44, ცუდ მდგომარეობაში 159, ამორტიზებული 32.
ჯანდაცვის სამინისტროს მიერ მოწოდებული ინფორმაციით, რეგიონებში განთავსებული ოფისების საერთო მდგომარეობის სტატისტიკა ასე გამოიყურებოდა: კარგ მდგომარეობაში – 22; საშუალო მდგომარეობაში- 32; სარემონტო მდგომარეობაში -26; გამოუსადეგარ მდგომარეობაში – 4; კლინიკაში ინტეგრირებული -39;
საქართველოს შინაგან საქმეთა სამინისტროს საჯარო სამართლის იურიდიული პირის -"112"-ის მიერ მოწოდებული ინფორმაციის მიხედვით:
საქართველოს ადმინისტრაციულ-ტერიტორიულ ერთეულებში მომუშავე სასწრაფო სამედიცინო დახმარების სამსახურების მიერ გამოძახებებზე დაგვიანების ან მათი არგასვლის შესახებ თავისუფალი ბრიგადების არყოფნისა და ავტოპარკის გაუმართაობის გამო, შემდეგი მონაცემი ფიქსირდება:
"2013 წლის 1 ნოემბრიდან 22 ნოემბრის ჩათვლით დაფიქსირდა 35 376 გამოძახება. აქედან დაგვიანდა 3 656 შემთხვევაში არგასვლის მიზეზად 40 შემთხვევაში ავტომანქანების გაუმართაობა დასახელდა."
