22 წლის გოგო, ქუთაისში, კლინიკა „ბომონდში“, სავარაუდოდ, მშობიარობას გადაჰყვა, _ ინფორმაცია „გურია ნიუსს“ გარდაცვლილი ს. კ.–იას ახლობელმა დაუდასტურა.
მისი თქმით, ჩვილი გადარჩა, თუმცა, ექიმებმა დედის გადარჩენა ვერ შეძლეს.
„ვიწვით ამ ულამაზესი, სიცოცხლით სავსე გოგოს ტრაგედიით. როგორც ვიცი, საკეისროს იკეთებდა _ ჩვილი გადარჩა, თავად კი დაიღუპა“, _ უთხრა „გურია ნიუსს“ გარდაცვლილის ახლობელმა.
როგორც ირკვევა, ქალი სამტრედიის მკვიდრია. მომხდართან დაკავშირებით, კლინიკა „ბომონდმა“ განცხადება გაავრცელა:
„პირველ რიგში, გვინდა გამოვხატოთ ჩვენი ღრმა მწუხარება და მივუსამძიმროთ გარდაცვლილის ოჯახს. ასევე, გვსურს გამოვეხმაუროთ სოციალური ქსელის სხვადასხვა გვერდის საშუალებით გავრცელებულ ინფორმაციას იმასთან დაკავშირებით, რომ „კლინიკა ბომონდში“ შემოყვანილი 21 წლის გოგონა “მშობიარობას გადაყვა”.
სრული პასუხისმგებლობით ვაცხადებთ, რომ აღნიშნული ინფორმაცია სიმართლეს არ შეესაბამება _ პაციენტი კლინიკაში მიმდინარე წლის 20 ივნისს, მეუღლის მიერ, მოყვანილ იქნა მძიმე მდგომარეობაში.
მას ჩაუტარდა გადაუდებელი საკეისრო კვეთა. ახალშობილი გადაყვანილია კლინიკის ახალშობილთა ინტენსიური თერაპიის განყოფილებაში. ყველა ჩატარებული სამედიცინო ღონისძიების მიუხედავად, თანმხლები დაავადების გამო, მელოგინის გადარჩენა ვერ მოხერხდა.
აღნიშნულ ფაქტთან დაკავშირებით მიმდინარეობს გამოძიება. „კლინიკა ბომონდი“ თანამშრომლობს გამოძიებასთან. კლინიკა მოუწოდებს საზოგადოებას და დაინტერესებულ მხარეებს, დაელოდონ გამოძიების დასრულებას და საქმეზე ობიექტური გარემოებების დადგენას“, _ ნათქვამია კლინიკა „ბომონდის“ განხადებაში.
