საქართველოს სოფლის მეურნეობის ყოფილმა მინისტრმა, ამჟამად საქართველოს პარლამენტის აგრარულ საკითხთა კომიტეტის თავმჯდომარემ, 2014-2015 წლებში 221 000 დოლარის ქონება შეიძინა, მათ შორის 2 საცხოვრებელი სახლი, 2 მიწის ნაკვეთი, არასაცხოვრებელი ფართი და ბინა. ამის შესახებ ოთარ დანელიას ქონებრივ დეკლარაციაშია აღნიშნული, რომელიც საჯარო სამსახურის ბიუროს ვებ-გვერდზე გამოქვეყნდა.
დოკუმენტის თანახმად, ყველა შეძენილი ქონება ოთარ დანელიას 100%-იან საკუთრებაშია.
კერძოდ, დანელიამ 2015 წელს 145000,00-დოლარიანი 161,84 კვ.მ-ის ფართობის ბინა შეიძინა თბილისში, რევაზ თაბუკაშვილის 14 ნომერში. ამავე წელს, 10000,00-დოლარად ასევე იყიდა 265,00 კვ.მ-ის ფართობის საცხოვრებელი სახლი დაბა შინდისში. ამავე წელს, ამავე სოფელში კიდევ ერთი უძრავი ქონება, 5000,00-დოლარად ღირებული 600,00 კვ.მ-ის ფართობის მიწის ნაკვეთიც აქვს შეძენილი. მანამდე, ერთი წლით ადრე ოთარ დანელიამ 2014 წელს, 61 000-დოლარად დაბა შინდისში 265,00 კვ.მ-ის ფართობის საცხოვრებელი სახლი და კიდევ ერთი, 602,00 კვ.მ-ის ფართობის მიწის ნაკვეთი შეიძინა.
ამავე წელს, ოთარ დანელიას 20000,00-დოლარად 35,00 კვ.მ-ის ფართობის არასაცხოვრებელი ფართიც აქვს შეძენილი თბილისში, ტექნიკური უნივერსიტეტის მიმდებარე ტერიტორიაზე.
რაც შეეხება მოძრავ ქონებას, დოკუმენტის თანახმად, ოთარ დანელიას მეუღლემ, მერი ჩიქობავამ, 2017 წელს, გაცვლით მსუბუქი ავტომანქანა BMW შეიძინა.
ქონებრივი დეკლარაციის თანახმად, გასულ წელს, ოთარ დანელიას საქართველოს სოფლის მეურნეობის მინისტრი პოსტიდან 8 თვის განმავლობაში( 01.01.2016 08.09.2016) 51419,00 ლარის შემოსავალი აქვს მიღებული, ხოლო საქართველოს პარლამენტიდან აგრარულ საკითხთა კომიტეტის თავმჯდომარის პოსტიდან ერთ თვეში (18.11.2016 31.12.2016) _ 7648,75 ლარი.
მის მეუღლეს, მერი ჩიქობავას კი, შსს-ს საპატრულო პოლიციიდან, სადაც ის კადრების სამმართველოში მუშაობს, მთელი წლის განმავლობაში 14080,00 ლარი აქვს მიღებული.
დეკლარაციის შევსების მომენტში კი, ოთარ დანელიას ,,საქართველოს ბანკის“ მიმდინარე ანგარიშზე 1800,00 ლარი ჰქონდა; ამავე ბანკის საკრედიტო ანგარიშზე – 900,00 ლარი, საბავშვო ანაბარზე კი – 8000,00 დოლარი. ხოლო რესპუბლიკა ბანკის მიმდინარე ანგარიშზე- 122,00 დოლარი, “ლიბერთი ბანკის” მიმდინარე ანგარიშზე კი – 32,00 ლარი ერიცხებოდა.
გარდა ამისა, ოთარ დანელიას ნაღდი ფულის სახით 21000,00 დოლარი და 2000,00 ევრო ჰქონდა.
დეკლარაციის თანახმად, ოთარ დანელია შპს „Mega Construction“-ის პარტნიორია (თანაპარტნიორები: გიორგი ბორაშვილი, ვასილ რუხაძე), თუმცა ამ შპს-დან ისევე როგორც შპს „Sky Motors“-იდან, სადაც დანელია ასევე პარტნიორია (თანაპარტნიორი – ალექსანდრე ნასარიძე, გიორგი სამადაშვილი, ნიკოლოზ პოპანდოპულო) მას შემოსავალი მიღებული არ აქვს.
ამავე დოკუმენტიდან ირკვევა, რომ ოთარ დანელიას სახელზე 2014 წელს აღებული 185000,00-დოლარიანი იპოთეკური სესხია, რომელსაც ვადა 2029 წელს ეწურება, ხოლო გასული წლის განმავლობაში „რესპუბლიკა ბანკისთვის“ 22800,00 დოლარი აქვს გადახდილი.
რაც შეეხება წინა წლების შემოსავლებს, 2015 წელს – საქართველოს სოფლის მეურნეობის სამინისტრო მინისტრის პოსტიდან 75000.00 ლარი მიიღო, ამავე თანამდებობიდან 2014 წელს – 32231.21 ლარი, ხოლო ამავე წელს მინისტრის პირველი მოადგილის პოსტიდან – 14605.76 ლარი, შსს-ს მომსახურების სააგენტო სააგენტოს დირექტორი პოსტიდან – 23493.07 ლარი; ამავე უწყების საფინანსო-სამეურნეო დეპარტამენტის დირექტორის მოადგილის პოსტიდან კი – 744.68 ლარი.
2013 წელს ოთარ დანელიას შემოსავალი შსს-ს საფინანსო-სამეურნეო დეპარტამენტის დირექტორის მოადგილის თანამდებობიდან – 81070.84 ლარი, სს „სილქნეტიდან“, სადაც ის შიდა კონტროლის და სტანდარტიზაციის დირექტორის მოადგილის თანამდებობა ეკავა ასევე იყო დირექტორთა საბჭოს წევრი – 24375.00 ლარი მიიღო. შ.პ.ს. „დეტიდან“ კი, გენერალური დირექტორის თანამდებობიდან 5250.00 ლარი აქვს მიღებული.
2012 წელს ოთარ დანელიას შემოსავალი სს “სილქნეტიდან”, სადაც მას შიდა კონტროლის და სტანდარტიზაციის დირექტორის მოადგილის პოსტი ეკავა – 97500.00 ლარი, ხოლო კერძო საკონსულტაციო მომსახურებიდან 5000.00 ლარი მიიღო.
