15 წლის ნაგროვები კოლექცია ავტომუზეუმის ქუჩაზე დაბინავდა და თბილისობას უამრავ სტუმარს ელოდება…
კერძო კოლექციონერმა, ქართველმა ბიზნესმენმა, გიორგი მამულაშვილმა, რარიტეტული ავტომობილების პირველი მუზეუმი დააარსა საქართველოში, რომლის გახსნასაც 25 ოქტომბერს, თბილისობაზე შეგიძლიათ დაესწროთ… სწორედ ამ დღეს არის დაგეგმილი მუზეუმის ოფიციალური გახსნაც, რომელსაც თბილისის მერი, საკრებულოს წევრები და უამრავი სხვა მოწვეული სტუმარი დაესწრება.
გია მამულაშვილის კოლექციაში "ნაცეკასმდივნარი" და "რიგითი" მცირელიტრაჟიანი წითელ-ყვითელი მანქანები ერთად იწონებენ თავს. მათ შორისაა: უნიკალური "ზილ-115", ბრონირებული ავტომობილი, რომელსაც პოლიტბიუროს წევრები დაჰყავდა, ამის გამო მას ზედმეტი სახელი – "წევრმზიდი" შეარქვეს. ამ მოდელის მხოლოდ 106 მანქანა გამოვიდა საბჭოთა კავშირში, გიორგი მამულაშვილის ავტომუზეუმის ექსპონატი კი რიგით 102-ე გახლავთ: მას გვერდს ედუარდ შევარდნაძის "ნაცეკასმდივნარი" "ჩაიკა" – "გაზ-014" უმშვენებს; ასლან აბაშიძის ნაქონი "ჩაიკა" "გაზ-13"-იც იქვეა; სხვა ავტომობილებიც: "ვაზ-21"-ის ბაზაზე გაკეთებული პირველი სასწრაფო დახმარების მანქანა, "გაზ-22"; "გაზ-12", "ზიმი"; 1933 წელს გამოშვებული პირველი საბჭოთა პიკაპი, "გაზ-4", რომელიც მეორე მსოფლიო ომის დროს თითქმის მთლიანად განადგურდა და დღეისთვის თითზე ჩამოსათვლელი ექსპონატებიღა დარჩა; "ჟიგული 01"; "ჟიგული 03"; "ზაპოროჟეცები": ზაზ- 965, ზაზ- 966, ზაზ -968, ზაზ- 989; "გაზ-20"; "მოსკვიჩი 401"…
ყველა ის მანქანა, რომელიც 15 წლის ნაგროვებ კოლექციაში მოხვდა, ქარხნული ნაწილებითაა გაცოცხლებული.
თბილისის ერთ-ერთ უსახელო ქუჩას კი, რომელზეც გია მამულაშვილმა თავისი კოლექცია დააბინავა, საკრებულოს გადაწყვეტილებით უკვე მიენიჭა ავტომუზეუმის სახელწოდება.
გია მამულაშვილი: "საკრებულომდე ეს ამბავი ბატონმა შალვამ მიიტანა, რისთვისაც დიდი მადლობა მინდა გადავუხადო, მისი მხარში დგომის გარეშე მე ამ საკითხებს ნამდვილად ვერ მოვაგვარებდი; ასევე დიდი მადლობა საკრებულოს ყველა წევრს და მერიის თანამშრომლებს, ჩემს მეგობრებს და ყველას, ვინც მხარი დამიჭირა… ყველას ველოდებით თბილისობაზე"
როგორც გია მამულაშვილმა "გურია ნიუსს" განუცხადა, მუზეუმში მალე იმის შესაძლებლობაც იქნება, რომ სხვა, მის მსგავს ავტომოყვარულებსაც დაეხმაროს საყვარელი ავტომობილების "გაცოცხლებაში". მუზეუმის ტერიტორიაზე უკვე შენდება სპეციალური სამუშაო "ბოქსები", სადაც ნებისმიერ მსურველს შეეძლება, საკუთარ რარიტეტულ ავტომობილს დაუბრუნოს პირვანდელი სახე.
გია მამულაშვილი, ავტომუზეუმის მფლობელი
გაზ 014, ედუარდ შევარდნაძის ცეკას მდივნობისდროინდელი "ჩაიკა"
მუზეუმის კიდევ ერთი მშვენება
გაზ 013 _ "ჩაიკა"
ზილ 001, ჯავშნიანი ავტომობილი, რომელსაც პოლიტბიუროს წევრები დაჰყავდა,
ამიტომ მას ზედმეტსახელი _ "წევრმზიდი" შეარქვეს
მოსკვიჩი 402 _ მუზეუმის პირველი ბინადარი
გაზ 005 _ პირველი საბჭოთა პიკაპი რესტავრაციის პროცესშია
გაზ 20 _ "პობედა"
გაზ 21 _ "ვოლგა". მესამე გამოშვება, ლუქსი
გაზ 22 _ "ვოლგა"
გაზ 24 _ "ვოლგა"
გაზ 69
"ზაპოროჟეცი" შეზღუდული შესაძლებლობების მქონე პირებისთვის
ვაზ 01 _ "ჟიგული"
"ზაპოროჟეცი"
ზაზ 966 _ "ზაპოროჟეცი"
ზაზ 968 _ "ზაპოროჟეცი"
