გუშინწინ ევროპის 2016 წლის საფეხბურთო პირველობის მორიგი შესარჩევი შეხვედრები გაიმართა.
საქართველოს ეროვნულმა გუნდმა სტუმრად გიბრალტარი კი დაამარცხა, მაგრამ ჩვენი ნაკრების მთავარ მწვრთნელს – თემურ ქეცბაიას, ალბათ ეს მოგება აქტივში არ ჩაეწერება. ვინც ამ მატჩს ტელევიზიით უყურა, დამერწმუნება, რომ ქართველებს უფრო დიდი ანგარიშით უნდა მოეგოთ, რომ არა მთავარი მწვრთნელის მიერ არჩეული, უკვე მთელი ქვეყნის გულშემატკივრების მიერ "გაშაყირებული" თავდაცვითი სისტემა.
ბოდიშს მოვიხდი ქეცბაიას წინაშე. ამ პიროვნებას ქართული ფეხბურთის განვითარების საქმეში დიდი წვლილი აქვს შეტანილი. თემური ჩინებული მოთამაშე გახლდათ და საქართველოში "ტყავის ბურთოსანი" ეს მოთამაშე ყველას უყვარდა.
მოგვიანებით ფეხბურთელი ქეცბაია მწვრთნელი გახდა. არ შეგახსენებთ მის მიერ გაწვრთნილი კვიპროსის "ანართოსისის" გმირობებს ევროპის ჩემპიონთა ლიგაზე. ეს ის გუნდია, რომელმაც წინა საუკუნის 70-იანი წლების მეორე ნახევარში, ერევანში, "არარატთან" 0:9 წააგო.
ეს "დავარდნილი" გუნდი ქართველმა თემურმა ჩემპიონთა ლიგის ჯგუფურ ეტაპზე გაიყვანა.
მოგვიანებით ქეცბაია საქართველოს საფეხბურთო ნაკრების თავკაცად დაინიშნა. სამწუხაროდ, თავი იქ ამოყო, სადაც ცივილურ სამყაროში მცხოვრები მოქალაქეები არ ხვდებიან. ეს ქვეყანა საქართველოა და თემურ ქეცბაია ამ პატარა რეგიონის უპირველესი საფეხბურთო გუნდის თავკაცი გახდა.
არ მინდა თემურ ქეცბაიას კრიტიკოსთა რიგებში გავერთიანდე, მაგრამ ერთს კი ვიტყვი: ქართველი გულშემატკივარი ძალიან მომთხოვნია. უფრო მეტსაც გეტყვით. როდესაც ჩვენი ქვეყნის ფეხბურთის ფედერაციამ იურიდიული დამოუკიდებლობა მოიპოვა, დარწმუნებული ვიყავი, რომ მსოფლიოსა და ევროპის პირველობების ფინალურ ეტაპებზე უპრობლემოდ ვიასპარეზებდით.
სამწუხაროდ, რეალობა საწინააღმდეგო აღმოჩნდა. ვერც დავით ყიფიანმა, ვოვა გუცაევმა, ალექს ჟირესმა, "ფულის მომპოვებელმა" კლაუს ტოპმიულერმა, არგენტინელმა კუპერმა და ბოლოს, ქეცბაიამ წარმატება ვერ მოგვიპოვა.
შეიძლება ვებ-გვერდის მკითხველების უმრავლესობამ გამაკრიტიკოს, მაგრამ ბატონი ალექსანდრე ჩივაძე საქართველოს ეროვნული გუნდის ისტორიაში ყველაზე წარმატებული მთავარი მწვრთნელი ბრძანდება. ამ ადამიანს ინგლისთან, თბილისში წაგებული შეხვედრა არ აპატიეს. მკითხველმა გაიხსენოს, რამდენ საშინაო მატჩში დამარცხდა ჟირესი, გუცაევი და "ფულისმშოვნელი" კლაუს ტოპმიულერი?
საქართველოს ეროვნულმა გუნდმა გიბრალტარის სრულიად უსუსური გუნდი კი დაამარცხა, მაგრამ, ალბათ, ჯობია სიმართლეს თვალში შევხედოთ: ჩვენი სათაყვანებელი მობურთალი "ბიჭები" პატივისცემას არ იმსახურებენ!!! მაპატიეთ, ბიჭებო, ამ გამონათქვამისთვის, მაგრამ მე და ჩემი არაერთი ახლობელი, საქართველოს ნაკრების თამაშებს აღარ ვუყურებთ.
შევეცადე მოკლედ გამომეთქვა ჩემი პირადი აზრი. ბატონო თემურ, მართლა გირჩევ რომ წახვიდეთ _ დიდი ავტორიტეტი გაგაჩნიათ და ამ დაფასებას წყალში ნუ გადაყრით!
არ ინერვიულოთ, ბატონო თემურ. თქვენ შემდეგ ნაკრებს "ვინმე" ჩაიბარებს. ამ ადამიანსაც დიდი ალბათობით, ცოტა ხანში გადადგომისკენ მოუწოდებენ.
საქართველოს ეროვნული გუნდი ის "ორგანიზაციაა", რომელსაც პიროვნების "გაფუჭება" აქტიურად შეუძლია!
