FactCheck.ge პოლიტიკოსთა განცხადებებში ფაქტობრივი სიზუსტის დადგენის ყოველკვირეულ მიმოხილვას აქვეყნებს. ფაქტ-მეტრმა სხვადასხვა გადამოწმებულ ფაქტზე, 17–დან 24 ოქტომბრამდე რამდენიმე კვლევა გამოაქვეყნა.
ყველაზე პოპულარული სტატია, ვებგვერდზე მნახველთა რაოდენობის მიხედვით, ფინანსთა მინისტრის, ნოდარ ხადურის განცხადებას ეხებოდა. ხადურის თქმით, "2012 წლის 1 ოქტომბრის შემდეგ არცერთ მინისტრს სამსახურებრივი მანქანა არ შეუცვლია".
ფაქტ-მეტრმა მინისტრების სამსახურებრივ ავტომანქანებთან დაკავშირებული სიტუაცია გამოიკვლია და ინფორმაციის მისაღებად 19–ვე სამინისტროს მიმართა. ამ თემაზე შინაგან საქმეთა და საგარეო საქმეთა სამინისტროებს ინფორმაცია ამ დრომდე არ მოუწოდებიათ.
რაც შეეხება სხვა სამინისტროებს, მათ მიერ მოწოდებული მონაცემების მიხედვით ფინანსთა მინისტრის განცხადება ბოლომდე ზუსტად ვერ ჩაითვლება, რადგან სამსახურებრივი ავტომობილი 5 სამინისტროში შეიცვალა, ხოლო მინისტრების უმრავლესობა კვლავ წინა ხელისუფლების მმართველობის პერიოდში შეძენილი ავტომობილებით გადაადგილდება. თუმცა, აღსანიშნავია, რომ 2012 წლის 1 ოქტომბრიდან დღემდე არცერთ მინისტრს საბიუჯეტო სახსრებით ახალი ავტომობილი არ შეუძენია.
შესაბამისად, ნოდარ ხადურის განცხადება მეტწილად სიმართლედ შეფასდა.
გასულ კვირას ფაქტ–მეტრმა საპარლამენტო უმცირესობის წევრის, ზურაბ ჯაფარიძის განცხადებებიც გადაამოწმა. მათგან ერთ–ერთი მთავრობის ხარჯებს ეხებოდა. ჯაფარიძის თქმით, "მთავრობა, ეს ბიუროკრატია, რომელიც ახლა არის ხელისუფლებაში გადასახადის გადამხდელებს შარშან დაუჯდათ 138 მილიონით მეტი, წელს ექვს თვეში უკვე დაუჯდათ 130 მილიონით მეტი… მომავალ წელს ბიუროკრატიის ხარჯები იქნება 323 მილიონით მეტი, ვიდრე 2012 წელს".
კვლევის შედეგად გაირკვა, რომ 2012 წლიდან დღემდე სახელმწიფო ბიუჯეტიდან შრომის ანაზღაურებაზე გაწეული და დაგეგმილი ხარჯები მართლაც გაიზარდა. კერძოდ, 2013 წელს 138 მლნ ლარით. 2014 წლის გეგმით, ზრდა 269 მლნ ლარს შეადგენს, ხოლო 2015 წლის ბიუჯეტის პროექტით შრომის ანაზღაურებაზე 1 372 მლნ ლარია გამოყოფილი, რაც 323 მილიონით მეტია 2012 წლის ანალოგიურ მონაცემზე.
თუმცა, უნდა აღვნიშნოთ, რომ აღნიშნულ ხარჯებში შედის როგორც მთავრობის წევრებზე, ასევე თავდაცვაზე, საზოგადოებრივი უსაფრთხოებაზე და წესრიგზე, განათლებაზე და სხვა საჯარო მომსახურებაზე გამოყოფილი შრომის ანაზღაურება და მისი მხოლოდ მთავრობის ხარჯებად შეფასება არამართებულია.
ამ კონტექსტის გათვალისწინებით, ზურაბ ჯაფარიძის განცხადება მეტწილად მცდარად შეფასდა.
ზურაბ ჯაფარიძის კიდევ ერთი განცხადება სოციალური უზრუნველყოფის ბიუჯეტს ეხებოდა. დეპუტატის თქმით, "2013 წელს "ნაციონალურ მოძრაობას“ სოციალურ ხარჯებზე დაგეგმილი ჰქონდა დაახლოებით 182 მლნ ლარით მეტი, ვიდრე "ქართულმა ოცნებამ“ დახარჯა“.
ფაქტ–მეტრმა გაარკვია, რომ 2013 წლის სახელმწიფო ბიუჯეტის შესრულების მონაცემებით, წლის განმავლობაში სოციალურ უზრუნველყოფაზე 2 083 მილიონი ლარი დაიხარჯა. რაც შეეხება პარლამენტში წინა მთავრობის მიერ წარდგენილ 2013 წლის სახელმწიფო ბიუჯეტის პროექტს, მისი მიხედვით სოციალური უზრუნველყოფის დაფინანსებაზე 2 272 მილიონი ლარი იყო განსაზღვრული. შესაბამისად, წინა მთავრობის მიერ წარდგენილ ბიუჯეტის პროექტთან შედარებით, 2013 წელს სოციალურ უზრუნველყოფაზე 189 მილიონი ლარით ნაკლები დაიხარჯა.
ფაქტ–მეტრის დასკვნით, ზურაბ ჯაფარიძის ეს განცხადება სიმართლეა.
გასულ კვირას ფაქტ–მეტრმა საპარლამენტო უმრავლესობის წევრის, გიგლა აგულაშვილის განცხადებაც გადაამოწმა. პარლამენტში გამოსვლისას აგულაშვილი აღნიშნავდა, რომ "მიმდინარე წელს უკვე შეიმჩნევა საექსპორტო პროდუქციის [ღვინის] 62%-ით ზრდა. თუ გასული მთელი წლის მონაცმებით 47 მილიონი ბოთლი იქნა ექსპორტზე გატანილი, უკვე წელს, 9 თვეში 43 მილიონი ბოთლი იქნა ექსპორტირებული".
ღვინის ეროვნული სააგენტოს მონაცემებით, 2014 წლის 9 თვეში (იანვარ-სექტემბერი) ღვინის ექსპორტმა 42.8 მლნ. (0.75 ლ.) ბოთლი შეადგინა, რაც წინა წლის შესაბამისი პერიოდის ანალოგიურ მაჩვენებელთან შედარებით 62%-ით მეტია. ღვინის ექსპორტმა თანხაში 137.1 მლნ. აშშ დოლარი შეადგინა, რაც 2013 წლის შესაბამისი პერიოდის ანალოგიურ მაჩვენებელს 64%-ით აღემატება.
2013 წელს ექსპორტზე გასული ღვინის მოცულობამ 35.9 მლნ. ლიტრი, ანუ 47.9 მლნ. ბოთლი შეადგინა. ღვინის ექსპორტიდან მიღებული შემოსავალი 129.5 მლნ აშშ დოლარს უდრიდა, რაც 2012 წლის შემოსავალს 195.2%-ით აღემატებოდა.
ფაქტ–მეტრმა დაასკვნა, რომ გიგლა აგულაშვილის განცხადება სიმართლეა.
ფაქტ–მეტრმა საპარლამენტო უმრავლესობის კიდევ ერთი წევრის, ზვიად ძიძიგურის განცხადებაც გადაამოწმა. ძიძიგური აცხდებდა, რომ საქართველოში "სიკვდილიანობის მაჩვენებელი 2012 წლის ჩათვლით მუდმივად იზრდებოდა. 2013 წელს ეს მაჩვენებელი, მათ შორის ბავშვთა სიკვდილიანობის მაჩვენებელი, შემცირდა".
საკითხის კვლევის შედეგად აღმოჩნდა, რომ სტატისტიკის ეროვნული სამსახურის მონაცემებით, 2013 წელს 1000 კაცზე სიკვდილიანობის მაჩვენებელი 0.2 პროცენტული პუნქტით შემცირდა. თუმცა, 2012 წლის ჩათვლით სიკვდილიანობის მაჩვენებელი ნამდვილად არ ყოფილა მუდმივად ზრდადი, როგორც ამას ზვიად ძიძიგური აცხადებს. 2001-2013 წლების სტატისტიკური მონაცემების მიხედვით, შეინიშნებოდა როგორც ზრდის, ასევე კლების ტენდენციები. რაც შეეხება ბავშვთა სიკვდილიანობას, 2013 წელს ეს მაჩვენებელიც შემცირდა, თუმცა 2001-2013 წლების სტატისტიკური მონაცემები ცხადყოფს, რომ ის ყოველწლიურად მცირდებოდა.
ზემოთ მოცემულ ინფორმაციაზე დაყრდნობით ფაქტ–მეტრმა ზვიად ძიძიგურის განცხადება მეტწილად მცდარად შეაფასა.
