"ბატონო პრემიერო, "ნაციონალურმა მოძრაობამ" ჩვენი კომპანიის, ისე როგორც სხვა ათასობით კეთილსინდისიერი გადამხდელის, წინააღმდეგ ბრძოლა ხელისუფლებაში მოსვლისთანავე დაიწყო.
პარლამენტარმა დავით ბეჟუაშვილმა ყველაფერი გააკეთა, რომ ჩვენი კომპანიის აქციების 100 % ხელში უკანონოდ ჩაეგდო. პროცესში, რომელიც 2003 წლიდან დაიწყო, ჩართული იყო საქართველოს ყოფილი პრეზიდენტის მიხეილ სააკაშვილის ძმა – დავით სააკაშვილი, მაშინდელი გენერალური პროკურორი ზურაბ ადეიშვილი, ფინანსური პოლიციის მაშინდელი უფროსი დავით კეზერაშვილი, კახეთის მაშინდელი გუბერნატორი პეტრე ცისკარიშვილი… მათი მოადგილეები, სხვადასხვა რანგის ჩინოვნიკები, კუდის თანამშრომლები, პროკურორები, ადვოკატები და მოსამართლეები…
2006 -2007 წლებში კი კომპანიის წინააღმდეგ ბრძოლა, აქციონერებისა და თანამშრომლების დაპატიმრებით, მათთვის აბსურდული ბრალდებების წარდგენით, კომპანიისთვის მილიონობით ლარის დაკისრებით და კომპანიიდან ჩვენი, კეთილსინდისიერი მფლობელების, საბოლოო გამოძევებით დასრულდა. კომპანია ამ დრომდე პარლამენტარ დავით ბეჟუაშვილის მფლობელობაში რჩება. " _ საქართველოს პრემიერ – მინისტრს, ირაკლი ღარიბაშვილს, სააქციო საზოგადოება "ავტოგაზის" ყოფილი აქციონერები ღია წერილით მიმართავენ და მათ საქმეზე რეაგირების მოხდენას თხოვენ.
"ქართული ოცნების ხელისუფლებაში მოსვლის შემდეგ, ჩვენ, სამხრეთ კავკასიაში ავტოგაზგასამართი ბიზნესის პიონერებს, იმედი გაგვიჩნდა, რომ წლობით ნაშენებ, მაგრამ "ხელის ერთი მოსმით" წართმეულ კომპანიას დავიბრუნებდით. ჩვენ, ჩვენს აქციონერებს და გულშემატკივრებს, ეს, სამართლიანობის განცდას და მომავლის რწმენას დაგვიბრუნებდა.
ჩვენს მდგომარეობაში უამრავი ბიზნესმენია. ქონება, მათაც უკანონოდ ჩამოართვეს, წილები იძულებით დაათმობინეს, დააპატიმრეს თავად ან მათი ოჯახის წევრები, ზოგიერთი მათგანი არაადამიანურად აწამეს… და ყველა მათგანი შველას ახალი ხელისუფლებისგან ელის.
გვესმის, რომ საგამოძიებო ორგანოების მხრიდან, ეს დიდ ძალისხმევას და რესურსს მოითხოვს. სამართალდამცავებს ამ საქმეზე შესაბამისი მოქმედებები უკვე დაწყებული აქვთ, რაც სამართლიანობის აღდგენის იმედს კიდევ უფრო გვიმყარებს. ჩვენის მხრიდან კი კომპანიის ამჟამინდელ უკანონო მფლობელთან, კომპრომისულ გადაწყვეტილებამდე მისასვლელად მოლაპარაკებაც ვცადეთ. თუმცა, დავით ბეჟუაშვილის შუამავალმა გიორგი ქოიავამ (ამჟამად მას ბრალად ფულის გათეთრება ედება და სასამართლოს განაჩენს ელოდება), რომელიც ბეჟუაშვილზე წილების გადაფორმებას ჩვენგან წლების განმავლობაში ითხოვდა, განგვიცხადა, რომ არც გამოძიებას და მითუმეტეს ჩვენს მცდელობას აზრი არ აქვს – გიორგი ქოიავას თქმით მას და დავით ბეჟუაშვილს "ქართული ოცნების" ლიდერებისგან, თავად ბიძინა ივანიშვილისგანაც კი, ხელშეუხებლობის გარანტია აქვთ.
დიდ იმედს ვიტოვებთ, რომ ეს სიმართლეს არ შეესაბამება და დავით ბეჟუაშვილს მსგავსი სახის განცხადებების გაკეთება, ბიზნესწრეებში რეპუტაციის ასამაღლებლად სჭირდება. მისი რეპუტაცია ხომ, წარსული საქმიანობიდან გამომდინარე, კატასტროფულად შებღალულია და სრულიად სამართლიანადაც – ყველა წესიერმა ბიზნესმენმა იცის, რომ დავით ბეჟუაშვილი სააკაშვილის ბიზნესტერორის ერთ – ერთი მთავარი კოორდინატორი გახლდათ.
ბატონო პრემიერო, რადგან მოლაპარაკებების მცდელობის ყველა რესურსი ამოვწურეთ, ჩვენს პრობლემაზე საუბარი საჯაროდ გადავწყვიტეთ. ადამიანები, რომლებმაც წლების განმავლობაში აგურ-აგურ ნაშენები ბიზნესი წაგვართვეს, მათგან ზოგი საკანონმდებლო ორგანოში აგრძელებს მოღვაწეობას, ზოგი აღმასრულებელ ხელისუფლებაში და ზოგიც სამართალდამცავ ორგანოებში…
გთხოვთ, ყურადღებით გაეცნოთ ჩვენს საქმეს და შესაბამისად უპასუხოთ ჩვენს და ჩვენს გარშემო მყოფი ადამიანების მოლოდინებს, ვისაც სამართლიანობის აღდგენის პირობა მოთმინების და მომავალში იმედით ყურების ძალას აძლევს.
პატივისცემით სააქციო საზოგადოება ავტოგაზის ყოფილი აქციონერები:" წერილს ხელს აწერენ: თენგიზ მაჭავარიანი; გია ღოღობერიძე; გიორგი გერსამია; ოთარ გერსამია; ზურაბ ლილუაშვილი; ირაკლი ნიკოლაიშვილი; გიორგი ერისთავი; დავით ბერაძე.
ვრცელ მასალას ამ თემასთან დაკავშირებით "გურია ნიუსი" მოგვიანებით შემოგთავაზებთ.
