ჩოხატაურის #1 ბაგა-ბაღს რეაბილიტაცია მიმდინარე წლის ზაფხულში ჩაუტარდა. 2014 წლის 25 აგვისტოს, ჩოხატაურის მუნიციპალიტეტის გამგეობის ინსპექტირების ჯგუფმა მიღება-ჩაბარების საბოლოო აქტს მოაწერა ხელი, რომლის თანახმადაც, 2014 წლის 25 აგვისტოს ჩაიბარეს შპს "შემოქმედმშენსა" და ჩოხატაურის მუნიციპალიტეტს შორის 2014 წლის 11 ივნისს გაფორმებული #160 ხელშეკრულებით გათვალისწინებული შესრულებული სამუშაოები.
შესრულებული სამშენებლო სამუშაოების ჩამონათვალის თანახმად, მოეწყო წყალსაწრეტი ღარები, მილები და ძაბრები, შეკეთდა არსებული იატაკი ლამინატის მოსაწყობად, დაიგო ლამინატი, მეთლახი, მოაბათქაშეს შიდა კედლების დაზიანებული ნაწილი ქვიშა-ცემენტით და შეიღება წყალემულსიის საღებავით, ჩაისვა ახალი კარები.
ეს ყველაფერი ქაღალდზე, რეალობა კი აბსოლუტურად სხვაა _ დაგებულ ლამინატზე გავლა თითქმის შეუძლებელია _ არასწორად, უხარისხოდ დაგებული იატაკი თვალში საბავშვო ბაღში შესვლისთანავე მოგხვდებათ. "პლინტუსები" ალაგ-ალაგაა მიკრული, სამზარეულოში გაზის გამათბობელს მილი შეერთებული არ აქვს. კარგი მდგომარეობა არც საპირფარეშოებშია.
#1 ბაგა-ბაღის დირექტორი მარინა დოლიძე ამბობს, რომ უხარისხოდ შესრულებული სამუშაოების შესახებ საქმის კურში ყველა ჩააყენა:
_ ძალიან ცუდი ხარისხითაა სამუშაოები შესრულებული. ახალჩასმული კარი უკვე გაფუჭებულია, რამდენიმე ადგილზე სამუშაოები დაუსრულებელია. გვპირდებიან, რომ გააკეთებენ, თუმცა, როდის, არავინ იცის. ამბობენ, რომ თანხა ცოტა იყო და რაც თანხაში ჩაჯდა სამუშაო, ის გააკეთეს. თავად ხედავთ, რაც არის გაკეთებული, _ ამბობს დოლიძე.
ამ რეალობის ფონზე, მიმდინარე წლის 1 სექტემბერს, მას შემდეგ, რაც ინსპექტირების ჯგუფმა საბავშვო ბაღის "რეაბილიტირებული" შენობა შენიშვნების გარეშე ჩაიბარა, სსს დაწესებულება "მომავლის" დირექტორი ნინო ბარამიძე ჩოხატაურის მუნიციპალიტეტის გამგებელს ირაკლი კუჭავას წერს, რომ შესრულებულ სამუშაოებზე პრეტენზია არ გააჩნიათ.
თუმცა, ბარამიძე ჩვენთან საუბრისას ამბობს, პრეტენზიები ბევრი აქვს და ამის შესახებ ყველა საქმის კურშია:
_ მე რა შემეძლო? რა თქმა უნდა, ვიცი, რომ პრობლემებია, თუმცა, წერილში, რომელიც გამგებელს მივწერე, აღნიშნული მაქვს, რომ შესრულდა ხარჯთაღრიცხვით გათვალისწინებული სამუშაოები. რა თანხაც იყო, იმ თანხით გაკეთდა.
_ ქალბატონო ნინო, წერილში წერთ, რომ შესრულებულ სამუშაოებზე პრეტენზია არ გაგაჩნიათ…
_ ჩემი პრეტენზიები ყველგან დავაფიქსირე. ჩემს გარდა, კომისიამ ჩაიბარა სამუშაოები. ვიცი, რომ პრობლემაა, მაგრამ ეს არის ის, რაც გამოყოფილ თანხაში გაკეთდა.
იმას, რომ #1 ბაგა-ბაღში სამუშაოები უხარისხოდ არის შესრულებული, ჩვენთან საუბრისას ადასტურებს ინსპექტირების ჯგუფის ხელმძღვანელი, გამგეობის ქონების მართვის სამსახურის უფროსი ვლადიმერ ლომთათიძე. მისი თქმით, "პრობლემა არსებობს, სამუშაოც უხარისხოდ შესრულდა, თუმცა, ეს არის ის, რისი გაკეთებაც ჩოხატაურში იციან"(?!).
ვლადიმერ ლომთათიძეს ვერ გვპასუხობს კითხვაზე, რატომ ჩაიბარა ობიექტი მაშინ, როცა სამუშაოები არ იყო დასრულებული და უფრო მეტიც _ ნაწილი უხარისხო იყო. მხოლოდ იმას ამბობს, რომ "ასე ხდება და ბევრ შემთხვევაშია მსგავსი პრობლემა"(?!).
_ რა ვქნათ, სულ არ ჩავიბაროთ?! _ გაოცებული გვეკითხება ლომთათიძე.
_ უხარისხოდ შესრულებული სამუშაო უნდა ჩაიბაროთ?
_ ჩოხატაურში ასეთი მუშები არიან, მეტი არ იციან და რა ჩვენი ბრალია(?!).
_ ბატონო ვლადიმერ, ბიუჯეტიდან გამოყოფილ თანხაზე ხომ ვსაუბრობთ? თქვენი სიტყვებიდან გამოდის, რომ ყველა სამუშაო ასე სრულდება, ეს თქვენთვის პრობლემა არ არის და ყალბ დოკუმენტზე აწერთ ხელს?
_ ყალბი რატომაა?! სამუშაო ხომ შესრულდა?!
_ სამუშაოები ხარისხიანად არის შესრულებული?
_ ხელშეკრულების თანახმად, მშენებელი კომპანია ვალდებულია, თუ რაიმე გაფუჭდა, სამი წლის განმავლობაში შეაკეთოს.
_ და რაც უკვე გაფუჭებულია?
_ მე რატომ მთხოვთ პასუხს?! კომისიის წევრები სხვებიც არიან(?!).
_ თქვენ ხომ კომისიის თავმჯდომარე ხართ. რატომ ჩაიბარეთ მსგავსი ობიექტი?
_ ის, რაც არის ახლა გაკეთებული, ჩვენი შენიშვნების შემდეგ გაკეთდა. რომ გითხრათ, ასპროცენტიანია, არ არის ასე. როგორც შეეძლოთ, ისე გააკეთეს. როგორც იციან ლამინატის გაკეთება, ისეა გაკეთებული. პრობლემაა კი, მაგრამ მე რა ვქნა, რა ვუყო? ჩაქუჩით ხომ არ მივადგები გასაკეთებლად?
_ კომისიის თავმჯდომარემ რომ ცუდად შესრულებულ სამუშაოზე კარგი დასკვნა არ უნდა გასცეს ამას ჩაქუჩი სჭირდება?
_ თქვენ მოგწონთ თქვენი რედაქციის შენობა?
_ რედაქციის შენობა ბიუჯეტის ფულით არ კეთდება. თქვენთან, სახლში, მსგავსად შესრულებულ სამუშაოში მუშას ხელფასს გადაუხდით?
_ არა.
_ მაშინ ხალხის ფულს რატომ იხდით? ამას ხომ ფასადური რემონტიც არ ჰქვია…
_ მე ეს საკითხი დავსვი. ყველამ იცოდა.
_ მაშინ რატომ ჩაიბარეთ ობიექტი?
_ მეტი არ იცის ამ ხალხმა კეთება და რა ვქნათ, _ აკონკრეტებს ლომთათიძე.
შპს "შემოქმედმშენის" ხელმძღვანელი გია შილაკაძე ამბობს, რომ არსებული პრობლემები მისთვის უცნობია:
_ უპრობლემოდ ჩაიბარეს, არანაირი პრეტენზია არ გამოუთქვამთ.
_ ბატონო გია, "გურია ნიუსმა" ობიექტი დაათვალიერა და იქ ძალიან ბევრი პრობლემაა.
_ სიმართლე გითხრათ, ეს სამუშაოები მე არ შემისრულებია. ჩოხატაურში ავიყვანე ქვეკონტრაქტორი კომპანია და მან გააკეთეს.
_ ოფიციალურ დოკუმენტებზე თქვენი ხელმოწერააა.
_ სახელმწიფოსთან მე მქონდა ურთიერთობა, თუმცა, ის კომპანია, რომელიც ასრულებდა სამუშაოს, ჩოხატაურშია. მე ხელმძღვანელი მივიყვანე გამგეობაში, მათ ყველა იცნობს, ისინი აკეთებენ პროექტებს და პრობლემა თუ იყო, ჩემთვის არ უთქვამთ, _ გვითხრა შილაკაძემ, თუმცა ქვეკონტრაქტორი კომპანია არ დაგვისახელა: გავარკვევ ყველაფერს და დაგირეკავთო.
ამ საუბრის შემდეგ შილაკაძე არ დაგვკავშირებია. უფრო მეტიც, არც ჩვენს სატელეფონო ზარებს უპასუხა.
როგორც გავარკვიეთ ქვეკონტრაქტორი კომპანია, რომელსაც "ჩოხატაურის გამგეობაში ყველა იცნობს" "ჯორჯიან კომპანი"-ა.
_ რა არის უხარისხოდ შესრულებული? ყველაფერი კარგადაა. ერთ კარებს "ზამოკი" მოტყდა და ჩავსვამთ. ადრე, რაც შენიშვნა მოგვცეს, გავითვალისწინეთ და არანაირი პრობლემა არ არის. ჩვეულებრივად ჩავაბარეთ ობიექტი, _ გვითხრა "ჯორჯიან კომპანის" დირექტორმა, ვალერიან კაკულიამ.
აღსანიშნავია, რომ შპს "შემოქმედმშენს", #160 ხელშეკრულების ფარგლებში, რომლის ხარჯთაღრიცხვის ჯამური ღირებულება 181 111 ლარს შეადგენს, #1 ბაგა-ბაღის, #2 ბაგა-ბაღის, სოფელ ამაღლების საბავშვო ბაღის, სოფელ იანეულის საბავშვო ბაღის და სოფელ სამების საბავშვო ბაღის სარეაბილიტაციო სამუშაოები უნდა შეესრულებინა. ამ დრომდე მხოლოდ ორი ბაღია ჩაბარებული _ #1 და #2 ბაგა-ბაღები.
"გურია ნიუსი" უახლოეს მომავალში სხვა საბავშვო ბაღებში არსებულ სიტუაციებსაც გაგაცნობთ.
