საქართველოს პრეზიდენტმა გიორგი მარგველაშვილმა "ელექტრონული კომუნიკაციის შესახებ" კანონში განხორციელებულ ცვლილებებს ვეტო დაადო, რაც ნიშნავს, რომ შსს-ს ოპერატიულ-ტექნიკურ დეპარტამენტს ფარული მოსმენა-მიყურადების და ასევე, კომუნიკაციის მაიდენტიფიცირებელი ინფორმაციის შენახვის უფლება აღარ ექნება.
ცნობისთვის, არასამთავრობო სექტორი საქართველოს პრეზიდენტ გიორგი მარგველაშვილს, "ელექტრონული კომუნიკაციის შესახებ" კანონში განხორციელებულ ცვლილებებზე ვეტოს დადებას ურჩევდა.
განსხვავებული პოზიცია ჰქონდა პარლამენტის თავმჯდომარე დავით უსუფაშვილს, რომელიც მარგველაშვილს "ელექტრონული კომუნიკაციის შესახებ" კანონში განხორციელებული ცვლილებების ხელმოწერისა და გამოქვეყნების თხოვნით მიმართავდა.
იგივე პოზიციას იზიარებდა პარლამენტის იურიდიულ საკითხთა კომიტეტის თავმჯდომარე ვახტანგ ხმალაძე, რომელიც მიიჩნევდა, რომ პრეზიდენტის მხრიდან ვეტოს დადება არასწორი იქნებოდა.
შეგახსენებთ, "ელექტრონული კომუნიკაციის შესახებ" კანონში ცვლილებები პარლამენტმა 65 მომხრე, 31 – წინააღმდეგი დაამტკიცა.
