პოლიციის მიერ ფოტოს გადაღებისთვის ნაცემი, "თავისუფალი დემოკრატების" წევრის, გიორგი ხურციძის წინააღმდეგ თბილისის საქალაქო სასამართლომ საქმის წარმოება შეწყვიტა.
როგორც ხურციძე ამბობს, "სასამართლოს გამამართლებელი განაჩენი დასტურია იმისა, რომ ტყუილუბრალოდ, უკანონოდ ვიყავი დაკავებული“.
შეგახსენებთ, რომ შემთხვევა 2014 წლის 4 ოქტომბერს მოხდა, გიორგი ხურციძე მეგობართან ერთად პოლიციის წინააღმდეგობის გაწევისთვის ვარკეთილში დააკავეს.
როგორც ხურციძე "გურია ნიუსთან“ ინტერვიუში აცხადებდა, ვარკეთილის პოლიციის უფროსმა ვახო ჩოფლიანმა, ამავე პოლიციის სამმართველოს უფროსის მოადგილემ გიორგი კობაურმა და ვარკეთილის მასივის პოლიციის ინსპექტორ-გამომძიებელმა ლაშა სხირტლაძემ მას ფოტოს გადაღებისთვის თავისუფლება უკანონოდ აღუკვეთეს და პოლიციის სამმართველოში სცემეს კიდეც.
შემთხვევიდან მეორე დღეს გიორგი ხურციძემ შინაგან საქმეთა სამინისტროს გენერალურ ინსპექციას მიმართა, თუმცა, მისივე ინფორმაციით, საქმე გამოსაძიებლად საქართველოს მთავარ პროკურატურაშია გადაგზავნილი.
რაც შეეხება გიორგი ხურციძის მიერ პოლიციისთვის წინააღმდეგობის გაწევის ბრალდებას, სასამართლო გადაწყვეტილებით, არ დადასტურდა.
როგორც "გურია ნიუსს“ თბილისის საქალაქო სასამართლოში განუცხადეს, მოსამართლე ნანა დარასელიამ დღეს საქმის შეწყვეტის გადაწყვეტილება მიიღო. თუმცა, რა გახდა საქმის შეწყვეტის საფუძველი, სასამართლოს დასაბუთებული გადაწყვეტილების გამოქვეყნების შემდეგ გახდება ცნობილი.
