ირაკლი ალასანიას გადაყენებით, პრემიერ-მინისტრმა ქვეყნის ეროვნულ უსაფრთხოებას მნიშვნელოვანი დარტყმა მიაყენა, – ასეთ შეფასებას აძლევს "სპეცსამსახურების საქმიანობაზე საზოგადოებრივი კონტროლის საქართველოს ცენტრის“ თავმჯდომარე ბესო ალადაშვილი თავდაცვის მინისტრის გადაყენებას.
"ბუნებრივია ქვეყნის უსაფრთხოებაზე ალასანიას გადაყენება გავლენას მოახდენს, რადგან აქ უკვე საუბარია არა ერთ პიროვნებაზე, არამედ კოალიციის შემადგენელი ნაწილისთვის მთლიანად გამოცლაზე.
ბუნებრივია, ამას მოჰყვება მისი მოადგილეების გამოცვლა, რაც ქვეყანაში პოლიტიკური კრიზისის ტოლფასია. ეს არის ეროვნული უსაფრთხოებისთვის მნიშვნელოვანი დარტყმა, რადგან ქვეყანა კარგავს სტაბილურად განვითარებადი ქვეყნის იმიჯს უკვე მერამდენედ. ეს იქნება მნიშვნელვანი პრობლემა ასოცირების ხელშეკრულების ხელმოწერის წინ. ვერავინ ვერ დამალავს ამას, რაც არ უნდა მოინდომოს. გუშინ ორივე მხარის გამოსვლებში იყო ემოციური შეფასებები. თუმცა არ ვიცით, რა მოხდა ორშაბათის შეხვედრაზე, რაც ამ მოვლენებს წინ უძღოდა. ორშაბათამდე მხოლოდ ერთი სისხლის სამართლის საქმე იყო აღძრული, თუმცა, გუშინ გავიგეთ, რომ ამას ზვავისებურად მოყვა კიდევ ორი საქმე თავდაცვის სამინისტროს თანამშრომლების წინააღმდეგ. აქ არის საძიებელი, რატომ მოხდა ეს“, _ აცხადებს ალადაშვილი.
მისივე განმარტებით, თავდაცვის უკვე ყოფილმა მინისტრმა ირაკლი ალასანიამ მნიშვნელოვანი მინიშნებები გააკეთა და მიმდინარე მოვლენებში ხაზი რუსეთის კვალს გაუსვა.
"ვფიქრობ, ალასანიას ინტერვიუ ბევრ საფიქრალს გვაძლევს. მას აქვს სპეცსამსახურებში მუშაობის ძალიან დიდი გამოცდილება და გააკეთა ძალიან სერიოზული მინიშნება. მან აღნიშნა, რომ ეს არის ერთი სერიოზული გეგმის ნაწილი, რომელიც უკრაინიდან დაიწყო და მთელს პოსტსაბჭოთა სივრცეში ვრცელდება, ეს იქნება მოლდოვა თუ საქართველო. ალასანიამ ხაზი გაუსვა, რუსეთის კვალს.
კოალიციაში სიტუაციის გამწვავება და დაძაბულობა ხელს პირდაპირ აძლევს რუსეთს. ეს საკითხი საკმაოდ სერიოზულად განსახილველი და შესასწავლია“, – განუცხადა ალადაშვილმა "გურია ნიუსს“.
