ე.წ. ჯარისკაცების მოწამვლის საქმეში ბრალდებული პირები თბილისის საქალაქო სასამართლომ დღეს აღკვეთის ღონისძიების გარეშე დატოვა. პროცესზე პროკურატურა ბრალდებულების: თავდაცვის სამინისტროს გენშტაბის სამედიცინო დეპარტამენტის უფროსის მედეა ბეთაშვილის, მასთან ერთად ბრალდებული ოთარ ჯეჯეიას, მიხეილ ბასტაევის, თორნიკე ხუბუას, ლაშა გელოვანის და აკაკი გიორგაძის მიმართ გირაოს შეფარდებას ითხოვდა.
ყველა პირთან მიმართებაში, გარდა თორნიკე ხუბუასი, პროკურატურამ 10 000-ლარიანი გირაოს შუამდგომლობა დააყენა, ხუბუას შემთხვევაში კი მისთვის აღკვეთის ღონისძიების სახით 2 000 ლარის შეფარდება მოითხოვა. თუმცა, სასამართლომ ბრალდებულ პირებს აღკვეთის ღონისძიება არ შეუფარდა.
ბრალდებულებმა, გირაოს თანხების დასახელების შემდეგ, საკუთარი პოზიციების დაფიქსირებისას განაცხადეს, რომ აღნიშნული თანხის გადახდას ვერ უზრუნველყოფდნენ, შესაბამისად, მოსამართლემ მიიღო გადაწყვეტილება, რომ ყველა მათგანი აღკვეთის ღონისძიების გარეშე დაეტოვებინა, წინასასამართლო სხდომა კი აღნიშნულ საქმეზე 24 დეკემბერს ჩაინიშნა.
დაცვის მხარის ადვოკატი ნოდარ თოფურიძე "გურია ნიუსთან“ საუბრისას აცხადებს, რომ "სასამართლო პროფესიონალურად, მიუკერძოებლად და სამართლიანად მოიქცა“.
"დღეს სასამართლომ აღკვეთის ღონისძიების საკითხი განიხილა და მიიჩნია, რომ დაცვის მხარის შუამდგომლობა უფრო საფუძვლიანია, ვიდრე პროკურატურის. ჩვენ მოვიყვანეთ ევროპული სამართლის პრეცენდენტები“, _ ამბობს თოფურიძე.
დასაბუთებულია თუ არა პროკურატურის ბრალდება და რამდენად მყარი მტკიცებულებები დევს საქმეში, ადვოკატი შეფასებისგან თავს იკავებს.
"ამ ეტაპზე თავს შევიკავებ შეფასებისგან, განხილვის ეტაპს დაველოდოთ. დაცვას თავისი სტრატეგია აქვს, ამიტომ წინასწარ ვერ ვისაუბრებ“, _ ამბობს თოფურიძე.
ადვოკატი იმედოვნებს, რომ სააპელაციო სასამართლო საქალაქოს გადაწყვეტილებას ძალაში დატოვებს.
"დარწმუნებული ვარ სააპელაციო სასამართლო თავის სიმაღლეზე იდგება და საქალაქო სასამართლოს გადაწყვეტილებას ძალაში დატოვებს, გაითვალისწინებს როგორც სახელმწიფოში მოქმედი სამართლის ნორმებზე დაფუძნებულ არგუმენტებს, ასევე ევროკონვენციის პრეცენდენტებსაც“, _ აცხადებს ადვოკატი.
მისივე თქმით, პროკურატურის ის პოზიცია, რომ შესაძლოა ბრალდებულებმა ზეწოლა მოახდინონ მოწმეებზე, უსაფუძვლოა, რაც ასევე არ გაითვალისწინა სასამართლომ.
"ბრალდებულებს ბრალი ორი კვირაა წარდგენილი აქვთ, თუმცა ისევ თავიანთ თანამდებობებზე მუშაობენ. ამ პერიოდის განმავლობაში, არცერთი წინაპირობა ან ფაქტი, რომ ამთ მოწმეებზე ზეწოლას განახრციელებენ, ან მომავალში აპირებენ ამას, მის შანსი ობიექტურად არ არსებობს“, _ აცხადებს თოფურიძე.
აღსანიშნავის ისიც, რომ როგორც საქმის პროკურორმა არჩილ ტყეშელაშვილმა პროცესის დასრულების შემდეგ განაცხადა, პროკურატურა გირაოს შეფარდებას ბრალდებულებისთვის იმ მოტივით ითხოვდა, რომ მათი უმრავლესობა ამ დრომდე მუშაობს თავდაცვის სამინისტროში და არსებობს მოწმეებზე ზეწოლის, მტკიცებულებების განადგურების საფრთხე. პროკურატურა აპირებს, რომ დღევანდელი გადაწყვეტილება სააპელაციო წესით გაასაჩივროს.
ამავე თემაზე:
მთავარი პროკურატურამ შეიარაღებული ძალების რამდენიმე მაღალჩინოსანს ბრალი წარუდგინა
