საქმე იმაშია, რომ საკრებულოს ფრაქცია "ქართული ოცნება-თვისუფალი დემოკრატების" წევრმა დეპუტატებმა, კოალიციის გარეთ ყოფნა ისურვეს და საკრებულოს აპარატს, უმრავლესობის დატოვების შესახებ წერილით მიმართეს.
აღნიშნულს მარტვილის საკრებულოს ფრაქცია "ქართული ოცნება-თავისუფალი დემორკატების" თავმჯდომარე გია გვილავა "გურია ნიუსთან" საუბრისას ადასტურებს.
"პარტიამ დატოვა უმრავლესობა და ჩვენც ასე უნდა მოვქცეულიყავით. მიმართვა დავუტოვეთ საკრებულოს აპარატს და ხვალ, სხდომაზე ამის შესახებ ოფიციალურად განვაცხადებთ.
რა თქმა უნდა, არ ესიამოვნათ ჩვენი გადაწყვეტილება, მაგრამ ჩვენ მხოლოდ ხელის ამწევად ვერ დავრჩებოდით უმრავლესობაში. თავი დავანებოთ იმას, რომ ჩვენს ლიდერს გამოეკიდნენ და რაღაცეებს არასწორად აბრალებენ, კოალიციამ თავის დებულებასაც უღალატა.
მაგალითად მოგიყვანთ მარტვილში შექმნილ მდგომარეობას – გვქონდა მოლაპარაკება, რომ სამსახურის უფროსებად კოალიციის წარმომადგენლები დაინიშნებოდნენ, თუმცა გამგებელმა 12 სამსახურის ახალი უფროსი დანიშნა და აქედან ყველა მხოლოდ პარტია „ქართული ოცნების“ წარმომადგენელია", _ უთხრა "გურია ნიუსს" გვილავამ და დასძინა, რომ არაა გამორიცხული კოალიციამ ახალი უმრავლესობის შესაქმნელად მოლაპარაკებები სხვა დეპუტატებთან აწარმოოს.
მარტვილის მუნიციპალიტეტის საკრებულოს ფრაქცია "დემოკრატიული მოძრაობის" თავმჯდომარე ირინა გადელია, ჩვენთან საუბრისას ამბობს, რომ „თავისუფალი დემოკრატების“ არც ამ და არც მათი ლიდერის გადაწყვეტილებასა და განცხადებებს მხარს არ უჭერს.
"ესენი რომ წავიდნენ რა? კოალიცია უმრავლესობის შესაქმნელად ალტერნატიულ გზებს მოძებნის. სავარაუდოდ, ნაციონალებში და ვიღაც-ვიღაცეებში კიდევ, ისევე როგორც პარლამენტში", _ ამბობს გადელია.
უმრავლესობასთან რაიმე სახით თანამშრომლობას გამორიცხავს საკრებულოს ფრაქცია "ერთიანი ნაციონალური მოძრაობის" თავმჯდომარე ზაალ გოროზია.
როგორც გოროზია "გურია ნიუსთან" ამბობს, ამაზე ფიქრიც კი ვინმეს მხრიდან, აბსურდულია და მისი ფრაქციის არცერთი დეპუტატი მსგავს შემოთავაზებას არათუ დათანხმდება, არც მოისმენს.
ცნობისთვის, მარტვილის მუნიციპალიტეტის საკრებულოს უმრავლესობას კოალიციაში შემავალი პარტიებიდან მოხვედრილი 19 დეპუტატი ქმნიდა. ოპოზიციაში იყო 17 დეპუტატი. აქედან 9 "ერთიანი ნაციონალური მოძრაობიდან", 6 კი "დემოკრატიული მოძრაობიდან".
მას შემდეგ, რაც ხვალ "თავისუფალი დემოკრატები", ოფიციალურად გააკეთებენ განცხადებას უმრავლესობისა და კოალიციის დატოვების შესახებ, მარტვილის მუნიციპალიტეტის საკრებულოში, კოალიცია 16 დეპუტატით დარჩება, რაც ნიშნავს, რომ კოალიცია უმრავლესობას დაკარგავს.
