"მსოფლიო, ნამდვილად ძალიან რთულ სიტუაციაში იმყოფება და ყველა ნიშანი არსებობს იმისა, რომ მორიგი ცივი ომის დაწყების საშიშროება არსებობს" – რეალური საფრთხე ჩვენი ჩრდილოელი მეზობლისგან თუ "კუნთების თამაში"?
მსოფლიო პოლიტიკური მოვლენების საფუძველზე, რუსეთის მხრიდან სხვადასხვა სახის "სამხედრო მანევრების" გათვალისწინებით, უცხოური მედია ბოლო რამდენიმე კვირაა აქტიურად საუბრობს მესამე მსოფლიო ომის დაწყების საშიშროებაზე.
შემთხვევა #1: გასულ კვირას, ლონდონმა გამოაქვეყნა რუსული ბომბდამშენების ფოტო, რომლებმაც ბრიტანეთის საჰაერო სივრცე დაარღვიეს.
დიდი ბრიტანეთის თავდაცვის სამინისტროს მიერ დემონსტრირებულ ფოტოებზე აღბეჭდილია რუსული ბომბდამშენები "ტუ 95", რომლებიც გაერთიანებული სამეფოს საჰაერო სივრცეში მანევრირებენ.
შემთხვევა #2: ჰოლანდიის თავდაცვის სამინისტროს პრესსამსახურმა გაავრცელა განცხადება, რომ ჰოლანდიურმა ავიაგამანადგურებლებმა გზა გადაუღობეს რუსულ სამხედრო თვითმფრინავს:
"ორმა ჰოლანდიურმა გამანადგურებელმა _ F16, რომლებიც ნატო-ს საპატრულო სამხედრო ძალების შემადგენლობაში აკონტროლებენ საჰაერო სივრცეს ბალტიის რეგიონში, გზა გადაუღობეს რუსულ სამხედრო-სამგზავრო თვითმფრინავს.
მანამდე რუსულმა თვითმფრინავმა დაარღვია ესტონეთის და ლიტვის საჰაერო სივრცე, ჩვენი გამანადგურებლების გამოჩენის შემდეგ კი კალინინგრადის მიმართულებით გაფრინდა", _ ნათქვამია ჰოლანდიური უწყების განცხადებაში.
შემთხვევა #3: ნატო-ს გენერალურმა მდივანმა, იენს სტოლტენბერგმა განაცხადა, რომ ნატო-ს ჯარებმა 100-ჯერ შეაჩერეს რუსული თვითმფრინავები, რომლებიც ალიანსის წევრი ქვეყნების საჰაერო სივრცეში შეიჭრნენ.
გარდა ამისა, ნატო ამტკიცებს, რომ რუსული საჰაერო ძალების აქტივობა მეტად გაძლიერებულია.
"ალიანსის ძალებმა 28-29 ოქტომბერს შეამჩნიეს რუსეთის სამხედრო თვითმფრინავების ოთხი ჯგუფი, რომლებიც მანევრირებდნენ ბალტიის, ჩრდილოეთის, შავი ზღვების და, რამდენადაც საკვირველი არ უნდა იყოს, ატლანტიკის ოკეანის თავზე."
შემთხვევა #4: შვეციის სამხედრო ძალებმა გაავრცელეს ინფორმაცია, რომ სკანდინავიის ნახევარკუნძულის მიმდებარე წყლებში, რუსული სამხედრო წყალქვეშა ნავი შეამჩნიეს .
"იგი შევიდა შვეციის აკვატორიაში და ამ ქვეყნის სამხედრო ძალების რეაქციის შემდეგ გაუჩინარდა."
აღსანიშნავია, რომ ყველა ზემოთ ჩამოთვლილ შემთხვევას, რუსეთის თავდაცვის სამინისტრო კატეგორიულად უარყოფს.
პარალელურად, ჩრდილოატლანტიკურმა ალიანსმა, რუსეთის საზღვართან საკუთარი ჯარების რაოდენობა გაზარდა.
როგორც სტოლტენბერგი აღნიშნავს, "რუსეთი ისევ აგზავნის უკრაინის საზღვართან იარაღს, არტილერიას, ჯარებს, ტანკებს და რაკეტებს".
თუმცა, ნატო-ს გენერალური მდივანი არ ფიქრობს, რომ მსოფლიო ახალი ცივი ომის მიჯნაზეა, მაგრამ იქვე დასძენს, რომ დასავლეთი აღარ აპირებს რუსეთთან იმ თანამშრომლობას, რომელიც ბოლო წლებში ყალიბდებოდა.
მესამე მსოფლიო ომის საშიშროება რომ არსებობს, არ უარყოფს პოლიტოლოგი თამარ კიკნაძე. თუმცა, მისივე თქმით, ნაკლებადაა მოსალოდნელი დასავლეთი და რუსეთი პირდაპირ საომარ მოქმედებებზე გადავიდნენ.
"მსოფლიო ნამდვილად ძალიან რთულ სიტუაციაში იმყოფება და ყველა ნიშანი არსებობს მორიგი ცივი ომის დასაწყისისთვის, მაგრამ არამგონია დასავლეთი და რუსეთი პირდაპირ საომარ მოქმედებებზე გადავიდნენ.
თუმცა მნიშვნელოვანია ის, რაც ახლა უკრაინაში ხდება, ეს ქვეყანა ძირითადად, დასავლეთისა და რუსეთის დაპირისპირების ძალიან მნიშვნელოვანი კერაა.
უკრაინაში მიმდინარე მოვლენებს, ნაწილობრივ პროვოკაციის სუნი უდის. ზოგჯერ სახელმწიფო გადატრიალებები მიღებულია როგორც ლეგიტიმური. ამ შემთხვევაში, უკრაინაში, არასამართლებრივი პროცესები წავიდა.
ამასთან, პროვოკაციული იყო ის ნაბიჯი, როცა ახალმა მთავრობამ მოსვლისთანავე რუსული ენა აკრძალა, არადა აქ მცხოვრებთა თითქმის ნახევარი, სწორედ რუსულენოვანია", _ ამბობს "გურია ნიუსთან" საუბრისას კიკნაძე,
მისივე თქმით, ვინაიდან ზემოთ მოყვანილ ფაქტებზე ჯერ არანაირი დასკვნები არ არსებობს და რუსეთიც უარყოფს, "ეს უფრო ანტირუსული კამპანიის ნაწილია".
პოლიტოლოგი დასავლეთის მხრიდან რუსეთისთვის სანქციების დაწესების თემასაც ეხება და აღნიშნავს, რომ მათ ნაცვლად იმისა, პუტინისთვის მდგომარეობა შეერყიათ, აბსოლუტურად საპირისპირო მიიღეს.
"სანქციების მიზანი იყო რაღაცნაირად პუტინის მდგომარეობა შეერყია თავის სამშობლოში, მაგრამ შედეგი არის აბოსლუტურად საპირისპირო, რადგან ვინც რუსების ბუნებას იცნობს, იცის, რომ მათ ურჩევნიათ ნაკლები ჭამონ და ნაკლებად უზრუნველყოფილები იყვნენ, მაგრამ დიადი ქვეყანა ჰქონდეთ.
ამას ზოგიერთი დასავლური სოციოლოგიური გამოკითხვების შედეგიც უსვამს ხაზს – რუსეთის პრეზიდენტის რეიტინგი 88%-ა", _ ამბობს კიკნაძე "გურია ნიუსთან".
რუსეთის მხრიდან ცივი ომის დაწყებას, კრემლისთვის არამომგებიანს უწოდებს პოლიტოლოგი ნიკა ჩიტაძე, რომელიც თვლის, რომ ჩრდილოელი მეზობელი მხოლოდ მისი ძალების დემონსტრირებას ცდილობს, რეალურად კი მსგავსი საფრთხე არ არსებობს.
"რუსეთისგან ყველაფერი მოსალოდნელია, მაგრამ მესამე მსოფლიო ომის დაწყება მეეჭვება რომ აწყობდეს. რუსეთს უნდა ძალის დემონსტრირება, შანტაჟი სამხედრო ბერკეტების გამოყენებით, კუნთების თამაში".
ჩიტაძე "გურია ნიუსთან" იმ ფაქტორებზე საუბრობს, რის გამოც რუსეთმა მსგავს მოქმედებას თავი უნდა აარიდოს და სადაც ძირითად როლს, ეკონომიკური მდგომარეობა თამაშობს.
"ამერიკის თავდაცვის ბიუჯეტი, დაახლოებით, 600 მილიარდ ამერიკულ დოლარს შეადგენს, როცა რუსეთის თავდაცვის ბიუჯეტი 80 მილიარდ ამერიკულ დოლარს არ აღემატება.
მნიშვნელოვანია ისიც, რომ ნატო-ს წევრი და პარტნიორი სახელმწიფოების მთლიანი შიდა პროდუქტი, 16 ტრილიონ ამერიკულ დოლარს აღემატება, ამერიკის 13 ტრილიონს, ანუ დაახლოებით, 30 ტრილიონ დოლარს შეადგენს ნატო-ს წევრი ქვეყნების მშპ, როცა რუსეთის, 1 ტრილიონ დოლარს ოდნავ აღემატება.
ამას ემატება ის სანქციები, რომელიც დასავლეთმა რუსეთის წინააღმდეგ აამოქმედა – ნავთობის ფასები ეცემა, რუსეთის სავალუტო რეზერვები კი 450 მილიონ დოლარს შეადგენს, როცა ადრე 600 მილიონ დოლარს აღემატებოდა.
თუნდაც ეკონომიკური, თუნდაც სამხედრო ფაქტორები, ეს ყველაფერი გვაძლევს საფუძველს ვიფიქროთ, რომ რუსეთი მხოლოდ შანტაჟს მიმართავს, მისი ეკონომიკური და სამხედრო პოტენციალი კი რეალურად უფრო სუსტია, ვიდრე დასავლეთის მთლიანობაში", _ ამბობს "გურია ნიუსთან" ჩიტაძე.
პოლიტოლოგი ყურადღებას იმაზეც ამახვილებს, რომ მესამე მსოფლიო ომის დაწყების შემთხვევაში, რუსეთი მოკავშირის გარეშე დარჩება.
"რუსეთი და ჩინეთი შანხაის ორგანიზაციის თანამშრომლობის წევრები არიან, მაგრამ ჩინეთი ვერ გამოდგება როგორც რუსეთის სამხედრო პარტნიორი.
რუსეთს ომის დაწყება არ უნდა აწყობდეს, რადგან პირველ რიგში, ამით თვითონ დაზარალდება, რადგან მოკავშირე არავინ ეყოლება. წინააღმდეგობას კი ნატო-ს 28 წევრი სახელმწიფოსგან მიიღებს. "
