"დამეხმარეთ, მომეშველეთ, მაპოვნინეთ, გამაგებინეთ ვინ არის ჩემი შვილის მკვლელი ! 31 წლის გოგო მომიკლეს, ორი მცირეწლოვანი ბავშვი ობლად დატოვეს, ბავშვები ყოველ ღამე ტირიან, დედა ენატრებათ, სული გვტკივა და პასუხის გამცემი არავინ გვყავს! სად ვეძებოთ სამართალი?" _ ასე მოგვმართავს მანანა აბრალავას დედა, ლიზა გაბისონია.
14 ოქტომბერს თურქეთში "ქემალ – ფაშაზე" მომხდარი ავტოსაგზაო შემთხვევის შედეგად, ოზურგეთის მუნიციპალიტეტის სოფელ გურიანთაში მცხოვრები 31 წლის მანანა აბრალავა დაიღუპა. მას ორი მცირეწლოვანი შვილები დარჩა. დაღუპულის დედა და ბებია, სახელმწიფოსგან შველას ითხოვს, ოჯახმა დახმარებისთვის " გურია ნიუსს" მიმართა.
"გამწარებული დედა ვარ, ვინ მომიკლა შვილი არ ვიცი, რუსმა, თურქმა, ქართველმა, არაფერი არ ვიცით ამის შესახებ, განცხადება დაწერილი გვაქვს, არავინ ყურადღებას არ გვაქცევს, ორ დღეში 40 იქნება ჩემი შვილის, ის მაინც ხომ უნდა ვიცოდე გამწარებულმა დედამ, შვილი ვინ მომიკლა? კი ბატონო ავარია იყო, მაგრამ ასე უნდა გაიაროს ყველაფერმა? ვისი ბრალი იყო, ვინ იყო დამნაშავე, აღძრულია თუ არა სისხლის სამართლის საქმე, რა მანქანა დაეჯახა, დიდი, პატარა, ხომ უნდა ვიცოდე?
ოზურგეთის მუნიციპალიტეტის გამგებელმა დაგვეხმარა, იმაში რომ მკვდარი სახლში ჩამოგვისვენა, ჩვენი სოფლის დეპუტატმაც, ნახეთ როგორ სახლში ვცხოვრობთ, ამ პატარა "კუხნაში", სადაც გვაწვიმს თავზე, ღმერთს ვთხოვთ რომ 40 -ზე არ გაწვიმდეს, რომ მესაფლვეებს გავუმასპინძლდეთ, ადამიანმა ხომ მოკლა ჩვენი შვილი? სად გაქრა? პასუხი არ უნდა აგებინოს ვინმემ?"
ოჯახის წევრები და ახლობლები "გურია ნიუსთან" აღნიშნავენ, რომ თითქმის ერთი თვეა ოფიციალური წერილით მიმართეს ოზურგეთის რაიონის დეპუტატ ზვიად კვაჭანტირაძეს, რომლისგანაც პასუხი არ აქვთ.
"ზვიად კვაჭანტირაძეს, იმიტომ მივმართეთ, რომ საქართველოს პარლამენტის საგარეო ურთიერთობათა კომიტეტის თავმჯდომარის პირველი მოადგილეა, აქვს საელჩოსთან ყველაზე დიდი წვდომა, არის ჩვენი რაიონის დეპუტატი, რომელიც წარმოშობით გურიანთიდანაა. დავწერეთ განცხადება, არ ვიცით ვინ არის მკვლელი, არის თუ არა დაკავებული, რა მუხლით აქვს აღძრული საქმე, არანაირი ინფორმაცია არ გვაქვს, არის თუ არა რაიმე სახის კომპენსაცია, დარჩა ორი მცირეწლოვანი ბავშვი უპატრონოდ, ელემენტარულად ქათამი რომ მოკლას ვინემ, იმას მოითხოვ და სიცოცხლით სავსე დედა მოუკლეს შვილებს და ცოდვა არ არის ოჯახი?
თან როგორც ჩვენ გვაქვს ინფორმაცია, ის მარშრუტი, რომელშიც გარდაცვლილი იჯდა, არასწორად გაჩერდა, უნდა გაეჩერებინა 50 მეტრით იქეთ, პირველი დამნაშავე ის მძღოლია და შემდეგ მეორე მარშრუტი, რომელმაც გაიტანა.
იქ იყო ვიდეოთვალიც, ჩვენ გვაქვს ასეთი ინფორმაცია, მაგარამ წვდომა არ გვაქვს. პირველად როცა ოჯახის წევრები მივიდნენ ზვიადთან ბიუროში, დაელაპარაკეს ტელეფონზე და მან უთხრა, რომ მომეცით ზარი, როცა გადახვალთ თურქეთში და დაგეხმარებითო, მაგრამ როცა გოგოს მამა და მეუღლე ჩავიდა თურქეთში, არავინ ყურადღება არ მიაქცია, ვერაფერს ვერ მიაგნეს, არავინ არ შეხვდა, გამწარებულები უკან წამოვიდნენ, ზვიადთან არ მოხერხდა საუბარი. ამის შემდეგ შევიტანეთ ოფიციალური განცხადება დეპუტატის ბიუროში, ჯერ ასე არ ვარგაო გვითხრეს, მერე დავაწერინეთ იურისტს განცხადება და ისე შევიტაენთ.
გავიდა უკვე 25 დღე და პასუხი არ გვაქვს. გავიგეთ კიდეც რომ ჩამოსულიც ყოფილა აქეთ, ამის მეტად არ დაეხმაროს თავის რაიონს? ან მით უმეტესად მისი სოფლის მკვიდრს? , – ამბობენ დაზარალებული ოჯახის ახლობლები და აღნიშნავენ, რომ ტირილი მის სახლში არ იყო, იქ მიცვალებულს ვერ დაასვენებდნენ, ისე ღარიბულად ცხოვრობენ, ერთ "კუხნაში", მეზობელთან იტირეს, გადმოსვენების ხარჯები მუნიციპალიტეტმა გასწია.
" გურია ნიუსმა" ინფორმაციების დასაზუსტებლად ოზურგეთის მაჟორიტარი დეპუტატის ბიუროს მიმართა. ბიუროს თანამშრომლებმა ერეკლე ფასიეშვილმა და გიორგი დათუნაშვილმა გაგვიცხადეს, რომ დეპუტატმა კვაჭანტირაძემ აღნიშნულ ოჯახს დახმარება გაუწია.
ერეკლე ფასიეშვილი: "ეს ადამიანები ჩავიდნენ თურქეთში , მაგრამ ვერ გამოიკვლიეს ვერაფერი, უკან დაბრუნდნენ და ეს ზვიადის ბრალია? ზვიადი დაეხმარა მათ, ჩვენი მხრიდან ყველაფერი გაკეთებულია, საქმე შესრულებულია."
გიორგი დათუნაშვილი: "ჩვენ დავალაპარაკეთ ოჯახი ტელეფონით ზვიადთან და დახმარებას დაჰპირდა. ასე გვითხრა, მე მესმის მათი გაჭირვებაო, მაგრამ ზვიადი მისი ჯიბის ფულს ხომ არ მისცემდა მათ? ჩავიდნენ იქ და დამირეკონო და ვეტყვი, რა უნდა ქნანო. მე ვარ ამის მოწმე, ხმამაღალზე ჩავრთე ტელეფონი და მოვასმენინე მათ."
კითხტაზე თუ რა სახის დახმარება გაუწია დეპუტატმა დაზარალებულებს, გვპასუხობენ, რომ ვლადიმერ გურგენიძესთან გაუწია შუამდგომლობა.
ზვიად კვჭანტირაძე : "მე პირადად ვესაუბრე ამ საკითხთან დაკავშირებით საქართველოს გენერალურ კონსულს ტრაპიზონში ავთო მიქაცაძეს და ოფიციალური წერილითაც მივმართე საგარეო საქმეთა სამინისტროს, რომ მაქსიმალურად დაეხმარონ ამ ოჯახს და პრეტენზიები დაუკმაყოფილონ, ეს პრეტენზიები მე რამდენადაც ვიცი შეეხება, იმას, რომ არ იციან ვინ არის მკვლელი, აუცილებლად მივყვებით ამას ბოლომდე და ოჯახისა და ახლობლების ინტერესებს დავიცავთ."
