ოფიციალური მონაცემების თანახმად, საქართველო იმ ქვეყნებს შორისაა, სადაც პენსია ძალიან დაბალია.
მაგალითად ლუქსემბურგში პენსია 7 700 ლარის ეკვივალენტია, ნორვეგიაში _ 3 872 ლარის, დანიაში _ 3 104-ის, საფრანგეთში _ 2 437-ის, გერმანიაში _ 1 740-ის, პოლონეთში _ 961-ის, ლატვიაში _ 567-ის, ლიტვაში _ 448-ის, რუსეთში _ 438-ის, ესტონეთში _ 660-ის, ყაზახეთში _ 585 ლარი ეკვივალენტი.
საქართველოში პენსია 150 ლარს შეადგენს.
პენსიების ზრდა "ქართული ოცნების" წინასაარჩევნო დაპირებებიდან ერთ-ერთი იყო. საპარლამენტო უმრავლესობის წევრი გუბაზ სანიკიძე 2012 წელს ამომრჩეველს კამერების წინ პირდებოდა, რომ 2013 წლის იანვრიდან პენსიები მოიმატებდა:
_ პენსიები გადაისინჯება და საარსებო მინიმუმს გაუტოლდება.. .მინიმუმი 160 ლარია, მაგრამ გადაიხედება და 220 გახდება, _ ამბობდა სანიკიძე,
ამ განცხადების შემდეგ 2 წელზე მეტი გავიდა, თუმცა, პენსია ჯერაც არ გაზრდილა როგორც ამბობენ, პენსიის მატება მომავალი წლის სექტემბერში მოხდება და 150 ლარის ნაცვლად 160 ლარი იქნება.
ოპოზიცია ამ ინფორმაციას კრიტიკულად შეხვდა და "ქართული ოცნება" ამომრჩევლის მოტყუებაში დაადანაშაულა. თუმცა, ასე არ ფიქრობს ხელისუფლება, რომელიც პირობას დებს, რომ პენსიების მატება მომდევნო წლებშიც გაგრძელდება.
ჩვენს მიერ გამოკითხული მოსახლეობის უმრავლესობისთვის კი, მთავრობის დაპირება არადამაჯერებელია:
_ ამდენი ხანია პენსიების მომატებას ველოდებით. ჩვენი პატრონი არავინაა. არც ძველი ხელისუფლებისთვის ვყოფილვართ მნიშვნელოვანი ფენა და არც ამჟამინდელისთვის ვართ. გვეგონა რომ მოგვიმატებდნენ, მაგრამ მოვტყუვდით. ახლა გვითხრეს, მომავალი წლის ბოლოს ათ ლარს დაგიმატებთო. როცა ოჯახს პენსიის მეტი შემოსავალი არ აქვს, 160 ლარი როგორ უნდა გვეყოს, ამაზე არავინ ფიქრობს. ამას დაცინვა ჰქვია! _ ასეთია პენსიონერების კომენტარები.
საპარლამენტო უმრავლესობის წევრი ზურაბ ტყემალაძე ფიქრობს, რომ ათი ლარით პენსიის გაზრდა დაცინვა არ არის:
_ ეს ის დანამატია, დღეს ბიუჯეტი რის საშუალებასაც გვაძლევს. ამ ეტაპზე პენსიის 10 ლარზე მეტი ოდენობით ზრდა არ ხერხდება. ამას შეიძლება სოციალური დახმარება უფრო ეწოდოს. არ მგონია, პენსიონერები იმას ფიქრობდნენ, რომ 10 ლარი დაცინვა იყოს. 10 ლარი დაცინვა ნამდვილად არ არის, თუმცა, მეტით გაზრდა რომ მოხერხებულიყო, უკეთესი იქნებოდა. პენსია საარსებო მინიმუმს გაუთანაბრდა. რაც შეეხება მოლოდინსა და დაპირებას, შეგახსენებთ, რომ პენსიის საარსებო მინიმუმამდე გაზრდა "ქართულმა ოცნებამ" წინასაარჩევნო პერიოდში დააანონსა. ნუ დაგვავიწყდება, რომ პენსიის მომატების გარდა, სოციალური პროექტებიც ამუშავდა, რომლითაც პენსიონერებიც სარგებლობენ, რითაც მათ ხარჯი შეუმსუბუქდათ. სკოლის მოსწავლეებისთვის ოჯახს სახელმძღვანელოებში თანხა აღარ ეხარჯება; უმაღლესი სასწავლებლების 19 ფაკულტეტი სახელმწიფო დაფინანსებაზეა; ამუშავდა სოფლის მეურნეობის პროექტები; დახმარებები სოციალურად დაუცველებს გაეზარდათ. პედაგოგების ხელფასები იზრდება და პენსიონერ პედაგოგს პენსიის მიღების საშუალებაც აქვთ. ყველაფერი ეს ერთად რომ დავიანგარიშოთ, მხოლოდ 10 ლარით კი არა, სერიოზული ზრდა გამოდის. _ ამბობს ტყემალაძე gzapress.ge-სთნ საუბრისას.
კითხვაზე, მას პირადად რამდენ დღეს ეყოფა 160 ლარი, ტყემალაძე მუშნი ზარანდიასავით პათეტიკურად პასუხობს: "160 ლარი კი არ უნდა მეყოს, მე უნდა ვეყო 160 ლარს. ეს სწორად დასმული შეკითხვა არ არის"
არადა, ამ განცხადების ავტორის ქონებრივი დეკლარაცია საკმაოდ მსუყეა.
2013 წელს, დეკლარაციის შევსების დროს ზურაბ ტყემალაძეს "ლიბერთი ბანკის" სახელფასო ანგარიშზე 2 200.00 ლარი ჰქონდა; "ბაზის ბანკის" მეგობარათზე _ 900.00 ლარი, "თი ბი სი ბანკის" სახელფასო ანგარიშზე _ 500.00 GEL, ამავე ბანკის კორპორატიულ ანგარიშზე _ 7 000.00 ლარი.
დეკლარაციის შევსების დროს ტყემალაძეს ხელზე ფულის სახით 20 000 დოლარი, 5 000 ევრო და 85 000 ლარი ჰქონდა.
ტყემალაძის კოლეგები მის ზემოთ აღნიშნულ განცხადებაზე კომენტარებს არ აკეთებენ, თუმცა, საპარალამენტო უმრავლესობაში განმარტავენ, რომ პენსია იმაზე მეტია, რაც ადრე იყო.
პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარე დიმიტრი ხუნდაძე "გურია ნიუსთან" საუბრისას ამბობს, რომ "დღევანდელი პენსია, ფაქტობრივად, შემწეობაა:
_ ჩემი მოსაზრება და სურვილი თანხვედრაში უნდა იყოს იმ ფინანსურ შესაძლებლობებთან, რაც ქვეყანას გააჩნია. თავიდან იყო შემოთავაზებები ფინანსთა სამინისტროს მხრიდან, რომ საპენსიო განაკვეთი გრადაციის სისტემით თანხვედრაში ყოფილიყო სოციალურ დაუცველთა კრიტერიუმებთან. ვისაც ძალიან უჭირს, სოციალურ დაუცველებზე მაქვს საუბარი, მათ მიეღოთ უფრო მეტი, სხვას შედარებით _ ნაკლები და ეს უნდა ყოფილიყო მაქსიმუმ 25 ლარი, მაგრამ კომიტეტის აქტიური ჩართულობით და პრემიერის მხარდაჭერით, ასევე დეპუტატებიც აქტიურად იყვნენ ჩართულები ამ განხილვაში, გადაწყდა, რომ ყველა ასაკის პენსიონერს 2015 წლის სექტემბრიდან პენსია 10 ლარით მოემატება. ასევე, მკვეთრად გამოხატული შეზღუდული შესაძლებლობების პირთათვისაც იქნება მატება. პენსიების ზრდა 2016 წლიდან გაგრძელდება. პარალელურად, უნდა ამოქმედდეს დაზღვევითი საპენსიო სისტემა, რადგან დღევანდელი პენსია შინაარსობრივად არ არის პენსია, ეს არის სახელმწიფო დახმარება, ანუ შემწეობა,
_ ზურაბ ტყემალაძე ამბობს, რომ 160 ლარი კი არ უნდა ჰყოფნიდეს პენსიონერებს, არამედ ისინი უნდა ეყონ 160 ლარს. თქვენ რას ფიქრობთ ამ განცხადებაზე და რამდენი გყოფნით პირადად თქვენ ყოველთვიურად?
_ ჯერ ერთი, მე არ ვარ პენსიონერი.
_ თუმცა, ძალიან ბევრი ოჯახი სწორედ პენსიის იმედზეა…
_ მესმის, მაგრამ პენსიონერებთან ერთად, იმ ოჯახებს აქვთ სოციალურ დაუცველთა სტატუსი, სოციალური დახმარება გაორმაგდა. რა თქმა უნდა, მოხარული ვიქნებოდი, რომ პენსია გაზრდილიყო 500 ლარით, მაგრამ ეს არის სურვილი, რომელიც რეალობისგან შორსაა _ სახელმწიფოს ამ ეტაპზე არ აქვს ამდენი ფინანსური რესურსი. რა თქმა უნდა, ეს ცუდია, მაგრამ პენსია არის იმაზე მეტი, რაც მანამდე იყო _ უკვე მესამდე ხდება პენსიის მატება.
ჩვენ შევეცადეთ ამ საკითხზე საპარლამენტო უმრავლესობის ერთ-ერთი წევრის, ოზურგეთის მაჟორიტარი დეპუტატის ზვიად კვაჭანტირაძის აზრიც გაგვეგო, თუმცა, მან ჩვენთან საუბარი არ ისურვა.
