“ჩეიყოფენ ჯიბეში ხელს და სხედან თბილ კაბინეტში, შენ თუ გიჭირს, ვერ ხედავენ!”

ოზურგეთის მუნიციპალიტეტის დაბა ნარუჯაში სოფლის მხარდამჭერი პროგრამის ფარგლებში, 2014 წელს 44 450 ლარი გადაირიცხა. ოფიციალური დოკუმენტების მიხედვით, აღნიშნული თანხა ბავშვთა ბაღის რემონტს დასჭირდა, რომლის სამუშაოები შპს " პლაზმამ" შეასრულა.

ოზურგეთის მუნიციპალიტეტის გამგეობიდან მოწოდებული ოფიციალური დოკუმენტების თანახმად, "სოფლის მხარდამჭერი პროგრამით" გათვალისწინებული სამუშაოების შესრულებასთან დაკავშირებით, დაბა ნარუჯის მოსახლეობასთან შეხვედრის ოქმი 2014 წლის 9 მარტს შედგა.

ოქმში აღნიშნულია: "შეხვედრას ესწრებოდნენ ოზურგეთის მუნიციპალიტეტის გამგებლის მოვალეობის შემსრულებელი კონსტანტინე შარაშენიძე, დაბა ნარუჯის რწმუნებული ზვიად მიქელაძე, გამგეობის ადმინისტრაციული სამსახურის უფროსი გიორგი ინწკირველი, გამგეობის არქიტექტურისა და ურბანული დაგეგმარების სამსახურის უფროსი თემურ მურვანიძე. კრების თავმჯდომარე _ ზვიად მიქელაძე, მომხსენებელი _ კოტე შარაშენიძე".

ოქმში, ასევე, წერია, რომ აზრი გამოთქვეს: ნათელა მამულაძემ, რომელიც დაბა ნარუჯაში ბაღის შენობის სახურავის რემონტისა და ცენტრალური გათბობის მოწყობას ითხოვდა; ვაჟა აბაშიძემ _ ჩოლოქის დასახლებაში ხიდის რემონტზე; მანუჩარ გოგრიჭიძემ _ ბავშვთა ბაღის რემონტზე; მირა ბერიძემ კულტურის სახლის რემონტის სურვილი გამოთქვა; რიზა შავაძემ _ მეხუთე რაიონში მოსაცდელის მოწყობა; ვლადიმერ ტუტოიანმა ფეხბურთის მოედნის კეთილმოწყობა მოითხოვა.

კრების ოქმის თანახმად, დადგინდა, რომ დაბა ნარუჯაში 2014 წელს, სოფლის მხარდამჭერი პროგრამის ფარგლებში, ჩატარდეს საბავშვო ბაღის რემონტი.

"გურია ნიუსი" დაბა ნარუჯის მცხოვრებლების პრობლემებით დაინტერესდა. თავდაპირველად, სოფლის მხარდამჭერი პროგრამით გარემონტებულ საბავშვო ბაღში მივედით. პედაგოგმა ნარგიზ დოლიძემ გვითხრა, რომ ბაღი სრულადაა გარემონტებული: "უბრალოდ, ერთი ჯგუფია დარჩენილი რემონტის გარეშე, დანარჩენი ყველა ოთახი გარემონტებულია, თავისი სახურავით. ძალიან ბევრი რამ არის გაკეთებული და კმაყოფილები ვართ", _ ამბობს დოლიძე.

დაბა ნარუჯის მცხოვრებლები ამბობენ, რომ უმეტესობას ძალიან უჭირს, არის მძიმე სოციალური ფონი, დაბაში არც გზაა. როგორც მოსახლეობა "გურია ნიუსთან" ამბობს, წინა საარჩევნოდ გადახურეს სახლების უმეტესობა, მაგრამ ნაწილი დატოვეს და მოსახლეობა ზამთრის წინ უდიდესი პრობლემის წინაშე აღმოჩნდა.

_ იცით თუ არა, რა თანხა იყო გამოყოფილი 2014 წელს სოფლის მხარდამჭერი პროგრამით დაბა ნარუჯაში და რა გაკეთდა აღნიშნული თანხით? _ ამ კითხვით მივმართეთ დაბა ნარუჯის მცხოვრებლებს.

თამარ ანდღულაძე: "თუ წამოხვალთ და ნახავთ, რა გაჭირვება მაქვს, ნახავთ ჩემს სახლს და კარს, მერე ასეთ შეკითხვას აღარ დამისვამთ. აწი არჩევნები აღარ სჭირდებათ? არჩევნების წინ დაიწყეს სახლების გადახურვა და ჩემი დატოვეს, რახან უპატრონო ვარ. გუშინ მთლად გადამიძრო სახურავი ქარმა. ავედი მოხუცებულმა ქალმა და კრამიტები ჩემი ხელით დავაფარე, სულ დამპალია სიძველისგან. მეშინოდა, არ გადმოვვარდნილიყავი. ასჯერ მაქვს დაწერილი განცხადება ოზურგეთში. მეუბნებიან, შენსავით ყველას უჭირსო. დღეს უნდა მომაქციონ ყურადღება, თორემ ხვალ, როცა მოვკვდები, მაშინ კი არა!. რა ვიცი, რა გააკეთეს სოფლის მხარდამჭერი პროგრამით?! ამ კუთხეში ვერავინ გეტყვით. კომისია მოვაო. როდის მოვა, არ ვიცი, აწი თოვლიც მოვა. მეშინია მთლად არ ჩამოსკდეს და არ დამეცეს თავში სახურავი. ასე შეიძლება? მარტოხელა ქალი ვარ, პირველი ჯგუფის შეზღუდული შესაძლებლობის ბავშვი მყავს. სოციალური დახმარება გვაქვს 100 ლარი. მე თუ არ მომაქცევენ ყურადღებას, აბა, ვის უნდა მიაქციონ? ესაა მთავრობის დანაპირები _ სოციალურად დაუცველებს მეტს ყურადღებას მივაქცევთო? სახურავი როგორ ვიყიდო 100 ლარით? სხვა სახლები რომ გადახურეს, იმათ ასე არ უჭირდათ, მაგრამ იქ ვიღაც პატრონიანები ცხოვრობდნენ, ან არჩევნებზე მუშაობდნენ. არაფერი არ შეიცვლება ამ ქვეყანაში. რა გააკეთეს სოფლის ფულებით და ხალხს რა გაუკეთეს, უნდა კითხოთ ხელისუფლებას და გამოიძიოთ ეს საქმე. 45 000 ლარით გააკეთეს ბაღიო _ რა შეჭამეს, რა დახარჯეს, ჩვენ რაფერ გაგცემთ პასუხს? ჩეიყოფენ ჯიბეში ხელს და სხედან თბილ კაბინეტში, შენ თუ გიჭირს, ამას ვერ ხედავენ! იმიტომ აგირჩიე მე შენ, რომ შენ უნდა მომხედო მე! ამხელა ხელფასებს და პრემიებს რომ იღებენ, გაღარიბდება ბიუჯეტი, აბა, რა იქნება!" _ ამბობს "გურია ნიუსთან" თამარ ანდღულაძე.

ოთარ ბოლქვაძე: "არაფერი, რა გაკეთდა?! არც გზა გაუკეთებიათ და არც სახლები გადაუხურავთ. ბაღი გააკეთესო, მაგრამ რამდენი იყო გამოყოფილი და რაში დაიხარჯა, მაგ ინფორმაციაზე ჩვენ ხელი სად მიგვიწვდება, ვინ გვეტყვის?!"

სუსანა დარტიანი: "პირველად გვესმის თქვენგან. 44 500 ლარი იყო გადმორიცხული? ამხელა თანხა? რისთვის იყო ეს ფული? პირველად გვესმის!"

მაგული კოჩალიძე: "ვიცი, რომ, ბინები გადაიხურა ნაწილობრივ, ბაგა-ბაღი გაკეთდა, შეძლებისდაგვარად კეთდება ყველაფერი".

მერაბ კახაძე: "სახლების ნაწილი დაიხურა _ ეს ვიცით, მეტი არაფერი".

ავთანდილ კახაძე: "არ ვარ ინტრიგანი და დამტოვეს. არ მაქცევენ ყურადღებას იმიტომ, რომ ვარ კახაძე. უნდა იყო ცნობილი გვარის წარმომადგენელი, არიან მასეთები, რომ რეკომენდაცია გაგიწიონ და ხელისუფლება დაგეხმაროს. ორი წელია, დავდივარ გამგეობაში. დავიღალე და ხელი ჩავიქნიე. ნახეთ, როგორ სახლში ვცხოვრობ! ასჯერ გადაიღეს სურათები და მომატყუეს. ვისი უნდა მჯეროდეს?! არჩევნების წინ ისეთებს დაუხურეს სახლი, ვისიც ეშინოდათ, რომ უჩივლებდნენ. იციან, რომ მე არ ვარ ასეთი და არც მაქცევენ ყურადღებას! ეს სახლი სამი წლის წინ უნდა დახურულიყო და კი ხედავთ, რა მდგომარეობაცაა".

დაბა ნარუჯაში ოზურგეთის მუნიციპალიტეტის გამგებლის წარმომადგენლის ზვიად მიქელაძის თქმით, საბავშვო ბაღის რემონტი სოფლის მცხოვრებლების გადაწყვეტილება იყო:

_ საბავშვო ბაღი გავაკეთეთ, გამოვცვალეთ მთელი სახურავი, გარე ფასადი, შესასვლელში დაიგო მეტლახი, გაკეთდა სველი წერტილები, ჩაისვა მეტალო-პლასტმასის ფანჯრები, კიდევ ზუსტად არ მახსოვს, ხარჯთაღრიცხვით რა იყო გათვალისწინებული. კრებას ესწრებოდა ბევრი ადამიანი, ეს ნამდვილად მოსახლეობის სურვილი იყო, კი გამოთქვეს სხვადასხვა აზრი, მაგრამ, საბოლოოდ, მაინც ამაზე შევჯერდით.

_ ბატონო ზვიად, რას გვეტყვით ავთანდილ კახაძისა და თამარ ანდღულაძის საცხოვრებელი სახლების პრობლემებთან დაკავშირებით?

_ ავთანდილ კახაძე ჩასმულია სტიქიით დაზარალებულთა სიაში და წელს მის სახლს გადახურავენ აუცილებლად. რაც შეეხება თამარ ანდღულაძეს, სტიქიის შემსწავლელ კომისიას, ჯერჯერობით, არ შეუსწავლია ეს საქმე, მაგრამ მისი სახლი ნამდვილად უნდა გადაიხუროს, _ გვითხრა ზვიად მიქელაძემ.

აღნიშნულ საკითხთან დაკავშირებით "გურია ნიუსთან" ოზურგეთის მუნიციპალიტეტის გამგეობის პრესსამსახურში ასეთ კომენტარს აკეთებენ: "დაბა ნარუჯაში მცხოვრები თამარ ანდღულაძის განცხადება საცხოვრებელი სახლის დაზიანებული სახურავის შესახებ, ოზურგეთის მუნიციპალიტეტის გამგეობაში ამ თვის 11 რიცხვში შემოვიდა. მისი პრობლემა განხილვის პროცესშია. ინფრასტრუქტურის სამსახური წარმოადგენს პრობლემის დეტალურ აღწერას და ხარჯთაღრიცხვას, ამის შემდეგ გადაწყდება, თუ რომელი პროგრამით შევძლებთ მის დახმარებას. რაც შეეხება ნარუჯის მეორე რაიონში მცხოვრებ ავთანდილ კახაძეს, სამთავრობო კომისიის მიერ ჩასმულია პროგრამაში და მისი ბინა ამ წლის ბოლომდე გადაიხურება. გარდა ამისა, დაბა ნარუჯაში 10 საცხოვრებელი ბინის სახურავი გამოიცვლება", _ აცხადებენ პრესსამსახურში.

რამდენად მიზანშეწონილად მიაჩნია 45 000 ლარით საბავშვო ბაღის რემონტი დაბა ნარუჯაში, ამ კითხვაზე ოზურგეთის მუნიციპალიტეტის გამგებელი მერაბ ჭანუყვაძე გვპასუხობს:

"დაბა ნარუჯის საბავშვო ბაღის სარეაბილიტაციო სამუშაოები სოფლის მხარდამჭერი პროგრამის ფარგლებში ხორციელდება. ეტაპობრივად. რემონტდება სამყოფი ოთახები, საძინებლები, სველი წერტილები, მუსიკის ოთახი და სამზარეულო. ბავშვებს უნდა ჰქონდეთ კაპიტალურად გარემონტებული საბავშვო ბაღი და შესაბამისი ჰიგიენური პირობები", _ აღნიშნავს ჭანუყვაძე.

საბავშვო ბაღის 44 500 ლარით გარემონტებული შენობა

აქ ცხოვრობს თამარ ანდღულაძე

აქ ცხოვრობს ავთანდილ კახაძე