ოზურგეთის მუნიციპალიტეტის საკრებულომ, ოზურგეთს მუნიციპალიტეტის გამგეობას 2015 წლის ბიუჯეტის პროექტი შენიშვნებით დაუბრუნა. ჩვენს მიერ მოპოვებული ინფორმაციით, პროექტის შესწორებულ ვარიანტს, გამგეობა საკრებულოს 10 დეკემბრამდე წარუდგენს.
"თქვენს მიერ წარმოდგენილი 2015 წლის პრიორიტეტის დოკუმენტი და ბიუჯეტის პროექტი განიხილეს ოზურგეთის მუნიციპალიტეტის საკრებულოს მუდმივმოქმედმა კომისიებმა და ფრაქციებმა, საკრებულოს წევრებმა, საზოგადოებრივმა ორგანიზაციებმა, იურიდიულმა პირებმა და საკრებულოსთან არსებულმა საზოგადოებრივმა დარბაზმა.
საქართველოს ორგანული კანონის „ადგილობრივი თვითმართველობის კოდექსის 91-ე მუხლი მე-4 პუნქტის და ოზურგეთის მუნიციპალიტეტის საკრებულოს რეგლამენტის 86-ე მუხლის მე 4 პუნქტის შესაბამისად გიგზავნით ოზურგეთის მუნიციპალიტეტის 2015 წლის ბიუჯეტის პროექტს მისი საჯარო განხილვის პროცესში შემოსული სათანადო შენიშვნებით, წინადადებებითა და რეკომენდაციებით", _ ნახსენებია ოზურგეთის მუნიციპალიტეტის საკრებულოს თავმჯდომარის დავით დარჩიას ტექსტში, რომელიც ოზურგეთის მუნიციპალიტეტის გამგებელს, მერაბ ჭანუყვაძეს მიწერა.
"გურია ნიუსი" უცვლელად გთავაზობთ იმ შენიშვნებს, რომელიც საკრებულომ გამგეობას მიწერა.
1. მიზანშეწონილად მიგვაჩნია 2015 წლის ბიუჯეტის პროექტი მომზადდეს სრულყოფილი პროგრამული ფორმატით, რომელშიც კლასიფიკაციის კოდისა და პროგრამის დასახელებასთან ერთად მოცემული იქნება ყველა პროგრამის, მასში შემავალი ქვეპროგრამების და ღონისძიებების აღწერა შესაბამისი პრიორიტეტების ფარგლებში, მოსალოდნელი საბოლოო ან შუალედური შედეგით, ამ შესრულების შეფასების ინდიკატორებით და მათი საშუალოვადიან პერიოდში დაფინანსების მოცულობით.
2. ბიუჯეტის პროექტში გასათვალისწინებელია ფრაქცია "ქართული ოცნების" ინიციატივები: მშენებლობის ნებართვის მოსაკრებლის ტარიფის, აგრეთვე საწარმოებისა და ორგანიზაციებისათვის დასუფთავების მოსაკრებელის გაზრდის თაობაზე;
აღნიშნული მოსაკრებლების დღეს მოქმედი მინიმალური განაკვეთების ზრდის შედეგად ბიუჯეტში მოხდება დამატებითი თანხების აკუმულირება.
3. არასაკმარისადაა დაგეგმილი ინფრასტრუქტურის მშენებლობის, რეაბილიტაციისა და ექსპლოატაციის ხარჯები იმ პირობებში, როცა აღნიშნული სფერო, პრიორიტეტების დოკუმენტში პირველ რიგშია წარმოდგენილი.
4. წარმოდგენილი შენიშვნების თანახმად, მუნიციპალური ავტოტრანსპორტის მუდმივი სუბსიდირება, მუნიციპალიტეტის ბიუჯეტისთვის არამომგებიან ფისკალურ შედეგს იძლევა. ამდენად მიზანშეწონილად მიგვაჩნია, გამოცხადდეს ტენდერი შესაბამის მომსახურების შესყიდვაზე, ხოლო მოსახლეობის სხვადასხვა სოციალური ჯგუფების (პედაგოგები, არასრულწლოვნები, პენსიონერები და ა.შ.) მგზავრობა დაფინანსდეს ბიუჯეტიდან.
5. ზოგადი განათლების ხელშეწყობის პროგრამა დაფინანსდეს 50.0 ათ. ლარით და მიემართოს უმაღლეს სასწავლებელში ჩარიცხულ, 100%-იან სახელმწიფო გრანტის მიმღებ სტუდენტთა და მათი სკოლების ფინანსურ მხარდაჭერისთვის.
6. "სპორტის განვითარების ხელშეწყობის" პროგრამით პროექტში გათვალისწინებულია საცხენოსნო კლუბ "მარულას" დაფინანსება. წლების განმავლობაში გაწეული ხარჯის შესაბამისად ვერ იქნა მიღწეული ეკონომიკური და სოციალური ეფექტი. საჯარო განხილვების შედეგად წარმოგიდგენთ რეკომენდაციას, რომ არ მოხდეს სათანადო არგუმენტაციისა და დასაბუთების გარეშე საცხენოსნო კლუბ "მარულას" დაფინანსება.
7. იმის გათვალისწინებით, რომ მუნიციპალიტეტის სპორტული სკოლების დაფინანსება 2015 საბიუჯეტო წლის დასაწყისიდან ქალაქ ოზურგეთის მუნიციპალიტეტის ბიუჯეტიდან აღარ განხორციელდება, აუცილებლად გასათვალისწინებელია ამ მიზნით „სპორტის განვითარების ხელშეწყობის" მუხლის დაფინანსება გაიზარდოს 65, 0 ათასი ლარით.
8. სახელმწიფო ბიუჯეტის დაფინანსებაზე მყოფი დღის ცენტრის თანადაფინანსება მუნიციპალიტეტის 2015 წლის ბიუჯეტის პროექტში განსაზღვრულია 25,0 ათასი ლარით. ხარჯის მოცულობა უნდა შეესაბამებოდეს კონტიგენტსა და თვითმმართველ ერთეულში მცხოვრებ ბენეფიციართა რაოდენობას.
9. არსებული რეალობისა და სოციალური ფონის გათვალისწინებით, მიზანშეწონილად მიგვაჩნია შეჭირვებულ მოქალაქეთა სამედიცინო მომსახურების პროგრამით გათვალისწინებული ერთჯერადი სოციალური დახმარების პაკეტი 100 ლარიდან გაიზარდოს 150 ლარამდე.
10. ბინათმესაკუთრეთა აღრიცხვის რეგულაციისა და მათი საქმიანობის განვითარების ხელშეწყობის მიზნით, ორგანიზაციულ ინსტიტუტებად ჩამოყალიბებისა და საკუთრებითი საკითხის გადაწყვეტის შემდეგ, ბიუჯეტის პროექტში გათვალისწინებულ იქნას ოზურგეთის მუნიციპალიტეტის. ბინათმესაკუთრეთა ამხანაგობების თანადაფინანსება.
11. 2015 წლის ბიუჯეტის პროექტში წარმომადგენლობითი და აღმასრულებელი ორგანოების დაფინანსებაში გათვალისწინებულია პრემიალური თანხები 151,9 ათასი ლარის ოდენობით.
საკრებულოს მიაჩნია, რომ წარმომადგენლობითმა და აღმასრულებელმა ორგანოებმა უარი უნდა თქვან პრემიალურ თანხებზე, თუმცა უნდა მიიღონ ღირსეული შრომის ანაზღაურება.
მიზანშეწონილად მიგვაჩნია, აღნიშნული თანხიდან 48,0 ათასი ლარი დაემატოს წარმომადგენლობითი და აღმასრულებელი ორგანოების შრომის ანაზღაურებას, ხოლო დანარჩენი 103.9 ათასი ლარით დაფინანსდეს ბიუჯეტის სხვა მუხლები.
ოზურგეთის მუნიციპალიტეტის გამგეობის საფინანსო-საბიუჯეტო სამსახურის უფროსის, გია მამაკაშვილის თქმით, ბიუჯეტის პროექტის ჩასწორებულ ვარიანტს საკრებულოს 10 დეკემბრამდე წარუდგენს:
"რა თქმა უნდა, საკრებულოს მიერ წარმოდგენილ შენიშვნებს უკვე გავეცანით და მინდა გითხრათ, რომ შენიშნების უმრავლესობა გავითვალისწინეთ. შესასწორებელი რაც იქნება ის შესწორდება და ეს პროცესი დასრულებისკენ არის წასული", _ გვითხრა გია მამაკაიშვილმა.
