ოზურგეთის მუნიციპალიტეტის გამგებელმა, მერაბ ჭანუყვაძემ მოსახლეობასთან შეხვედრა, დილის 10 საათიდან დაიწყო.
გამგეობის მისაღებში, დილიდანვე მრავალი მოქალაქე იყო შეკრებილი. მათი პრობლემები სხვადასხვაგვარია, თუმცა ყველა ეკონომიური სიდუხჭირეს უკავშირდება. თითოეული მათგანი, გამგებელთან შეხვედრაზე დახმარების იმედით მივიდა.
მარო კაპანაძე: "ოზურგეთის მუნიციპალიტეტის სოფელ გურიანთაში ვცხოვრობ, შვილი მყავს საავადმყოფოში, მესაჭირეობა ფულადი დახმარება, 264 ლარი ათი დღის განმავლობაში უნდა გადავიხადო, ვიყავი დღეს გამგებელთან შეხვედრაზე და მითხრა, რომ დამეხმარება და ამ თანხას აუცილებლად გადამიხდის. მე პენსიონერი ვარ, მეუღლეს არ აქვს ჯერ საპენსიო ასაკი, ჩემი პენსია და სოციალური დახმარება წინასწარ მაქვს გამოტანილი, ძალიან გვიჭირს, არ გვაქვს არანაირი საშუალება, გამგებელი პირადად შემხვდა, მისი იმედი მაქვს."
მერი ხურციძე: "ვცხოვრობ ლიხაურში, 2 წელია ვითხოვ დახმარებას, ვარ სტიქიით დაზარალებულთა სიაში, სახურავი გადამიძრო ქარმა, ამდენი ხნის განმავლობაში დავდივარ გამგეობაში, ასჯერ მოვიდნენ, გადამიღეს ფოტოები, კომისია ვართო, მაგრამ არაფერი, – მომატყუეს, არ დამეხმარნენ. მოვედი ახალ გამგებელთან, კოკისპირული წვიმა ჩამოდის ჩემთან სახლში, პენსიონერი ვარ, 6 სული ვცხოვრობთ, ყველა უმუშევრები, ახლა ახალ გამგებელს უნდა ვთხოვო დახმარება გამიწიოს, იმედი მაქვს, რომ დამეხმარება, თუ არ დამეხმარება მერე თქვენ უნდა წაგიყვანოთ და განახოთ როგორ სახლში ვცხოვრობ."
ცისმარი გობრონიძე: "მეც სახლის სახურავის თაობაზე ვარ მოსული, წვიმს ჩემთან სახლში, უკიდურესს მდგომარეობაში ვართ, თხინვალში ვცხოვრობ, 5 შვილის დედა ვარ, მრავასულიანი ოჯახის პატრონი, სტიქიით დაზარალებულები ვართ, ქარმა სულ გადამიძრო სახურავი, მეორეჯერ მოვედი ახალ გამგებელთან, პირველად დამპირდა, რომ დამეხმარებოდა, ახლა მოვედი ამბის საკითხავად, ზამთარი მოდის და დახმარება ახლა მჭირდება. თითქმის 3 წელია დავსდევ ხელისუფლებას, წ ინა მთავრობამ სულ არ მომაქცია ყურადღება, ახალი ვნახოთ, რას იზამს, ჯერჯერობით იმედი მაქვს."
თამარ თოიძე: "ვარ ბახვის საბავშვო ბაღის მენეჯერი, ბაღში გვაქვს პრობლემები, რემონტის გაკეთებას ვითხოვთ, მაგრამ გამგებელმა ახალი აზრი შემომთავაზა, რაც ძალიან მიხარია, რომ ბახვში ახალი საბავშვო ბაღი აშენდება, ეს იქნება უდიდესი ბედნიერება."
ლიანა ლომთაძე: "მელექედურში ვცხოვრობ, შვილი ავარიაში მომიკვდა, სახლზე პრობლემები მაქვს, დამპირდა ახალმა გამებელმა რომ მასალით დამეხმარებოდა და დღეს მეორედ მოვედი, რომ ამბავი ვიკითხო"
თამაზ შათირიშვილი: "ავადმყოფობა დამიდგინდა, ექიმებმა ძლივს მიხვდნენ რა მჭირდა, ძალიან ცუდ მდგომარეობაში ვართ, პენსიონერი არ ვარ, ვარ უმუშევარი, წამლების ყიდვის საშუალება არ მაქვს, მოვედი გამეგბელთან შეხვედრაზე, გაახარებს ღმერთი დამპირდა, რომ საავადმყოფოსთვის საჭირო თანხებს აუცილებლად გადამირიცხავს."
ოზურგეთის მუნიციპალიტეტის გამგებელი მერაბ ჭანუყვაძე, "გურია ნიუსთან" აღნიშნულ საკითხზე კომენტარს აკეთებს:
"სტიიქიით დაზარალებულ ოჯახებს, ვისი განცხადებაც დევს გამგეობაში, რომლებზეც შედგენილია სადეფექტო აქტები, შესწავლილი ჰყავს კომისიას და დღემდე ვერ მოხერხედა ამ ოჯახების დახმარება, აუცილებლად, ეტაპობრივად ყველას დავეხმარებით.
მინდა გითხრათ ერთი რამ, არიან ოჯახები, რომლებსაც უმეტეს შემთხვევაში ერევათ სახლის სიძველე და სტიქიით დაზარალება ერთმანეთში, ის თანხები, რაც წამოსულია ინფრასტრუქტურის სამინისტროდან, მისი მიზნობრიობა სტიქიით დაზარალებულთა დახმარებაა, ამიტომ ყველა ეს თანხა მოხმარდება იმ ოჯახებს, ვინც სტიქიით დაზარალებულებთა სიაში არიან. ამასთანავე, სამწუხაროდ, არიან ოჯახები, რომლებსაც სიძველის გამო აქვთ პრობლემები, ასეთი ოჯახების დახმარებაც მოხდება ეტაპობრივად, მინდა რომ შეძლებისდაგვარად დავაკმაყოფილო ადამიანების მოთხოვნები"- ამბობს ჭანუყვაძე და დასძენს, რომ რამდენიმე დღეში, 5 ივნისს სტიქიით დაზარალებული ოჯახებს სახურავებს შეუძენენ.
"3 დღეში უკვე დავიწყებთ, ამ პროცესებს, 90 ოჯახს დაურიგდება სახლის სახურავი, ეს ეხება 5 ივნისის სტიქიას, 90 ოჯახში შედის 5 საერთო საცხოვრებელი, მათ შორის დაბა ლაითურსა და დაბა ნარუჯაში, ყველა დაკმაყოფილდება.
თუ დადგება ის მომენტი, რომ რომელიმე ოჯახს მართლა ეკუთვნოდა ხელისუფლებისგან დახმარება და ვერ მიიღო, ამ დროს სხვა მოხვდა მის მაგიერ სიაში, ყველა ის პასუხისმგებელი პირი, ძალიან მკაცრად აგებენ პასუხს ამაზე", _ აცხადებს " გურია ნიუსთან" ოზურგეთის მუნიციპალიტეტის გამგებელი მერაბ ჭანუყვაძე.
