ოზურგეთის რაიონულმა სასამართლომ ა. (ა) ი.პ. „ ქალაქ ოზურგეთის მუნიციპალიტეტის ცენტრალური სტადიონის " ყოფილი დირექტორის, მურთაზ აბაშიძის სარჩელი დააკმაყოფილა.
სასამართლომ ბათილად სცნო ქალაქ ოზურგეთის მერის 2014 წლის # 84 ბრძანება მურთაზ აბაშიძის სამუშაოდან განთავისუფლების შესახებ და აღადგინა თანამდებობაზე.
ქალაქ ოზურგეთის მერმა, ბეგლარ სიორიძემ, # 301 ბრძანება 1 დეკემბერს გამოსცა.
"2014 წლის 30 ოქტომბრის # 354 -14 საქმეზე ოზურგეთის რაიონული სასამართლოს გადაწყვეტილებისა და არასამეწარმეო (არაკომერციული ) იურიდიული პირის " ქალაქ ოზურგეთის მუნიციპალიტეტის ცენტრალური სტადიონის" დირექტორის თანამდებობაზე აღდგენილი იქნას მურთაზ აბაშიძე და აუნაზღაურდეს სამსახურიდან განთავისუფლების დღიდან დღემდე იძულებით განაცდური ხელფასი."
თუმცა, მომდევნო დღეს, 2 დეკემბერს, მურთაზ აბაშიძე სამსახურიდან ისევ გაათავისუფლეს.
ქალაქ ოზურგეთის მერის, ბეგლარ სიორიძის მიერ გამოცემულ # 306 ბრძანებაში ვკითხულობთ:
"შიდა აუდიტის სამსახურის მოსაზრებით, ა. (ა) ი.პ. „ ქალაქ ოზურგეთის მუნიციპალიტეტის ცენტრალური სტადიონის" 2014 წლის 1 იანვრიდან 1 სექტემბრის ჩათვლით ფინანსური ანგარიშგება ყველა არსებითი ასპექტით შემოწმების აქტით გამოვლენილი დარღვევების, შეუსაბამობის და შენიშვნების გათვალისწინებით შეფასებულია მაღალი რისკის შემცველად, ზემოთ აღნიშნული დარღვევებისა და შიდა აუდიტის აქტით შეფასებული სხვა დარღვევების საფუძველზე ა.(ა)ი ..პ " ქალაქ ოზურგეთის მუნიციპალიტეტის ცენტრალური სტადიონის" დირექტორი მურთაზ აბაშიძე განთავისუფლდეს ა.(ა) .პ. დირექტორის თანამდებობიდან."
თავად მურთაზ აბაშიძე, მისი სამსახურიდან უკვე ხელმწორედ განთავისუფლებას აპროტესტებს და ამბობს, რომ მის მიმართ პოლიტიკური დევნა ხორციელდება.
"ქალაქ ოზურგეთის მერმა 1 დეკემბერს აღმადგინა სამსახურში და 2 დეკემბერს გამათავისუფლა. გამაგებინეთ, რა დავაშავე მე ერთ დღეში?
თუ რაიმე დანაშაული მქონდა ამდენი ხნის განმავლობაში, სად იყვნენ აქამდე? ან ვინ არის აუდიტი ქალაქ ოზურგეთის მერიაში? ნაციონალი კობა ხაბალაშვილი, რომელიც ამდენი წელია, ლაითურის დეპუტატი იყო და "ქართული ოცნების" მომხრეებს აშანტაჟებდა. დღეს ის ბეგლარ სიორიძის მარჯვენა ხელია და აუდიტის სამსახურს ხელმძღვანელობს.
ფულით დაინტერესებული არ ვარ, ეს არ არის ჩემი ინტერესი, რომ ხელფასისი გამო ვიბრძვი, არა, სამართლას ვეძებ!
სასამართლო გადაწყვეტილება ფეხებზე დაიკიდეს, "მრჩევლები" რომ ჰყავს გარშემო, არ ვიცი, ასეთი რა უბედურება ურჩიეს, რომ ვერ ხვდებიან, რა ცუდად დაუბრუნდებათ უკან ჩემი საქმე _ უპირობოდ აღმადგინა სასამართლომ თანამდებობაზე.
ესაა ჩემი პოლიტიკური დევნა, რადგან ყველანი არიან „ქართულ ოცნებაში" გადაპორტირებული "ნაციონალები". მას აქვს ჩემი პირადი მტრობა!" _ აღნიშნავს აბაშიძე " გურია ნიუსთან" და დასძენს, რომ ბრძოლას აგრძელებს:
"სისხლის უკანასკნელ წუთამდე ვიბრძოლებ, არ დავნებდები! კანონის ფარგლებში მივყვები ჯერ ამ ყველაფერს! ვნახოთ რა იქნება! ქალაქის მერმა, თავდაპირველად მან მესროლა, ამაცილა, ახლა ჩემი ჯერია! ან ბეგი სიორიძე და ან მე! თუ უკვე დაღუპული არაა, თუ არა და მალე დაღუპავენ! "
ადვოკატი კახა ჩავლეშვილი მიიჩნევს, რომ არსებული ვითარებიდან გამომდინარე, საქმეში სახალხო დამცველი და უფლებადამცველი ორგანიზაციები უნდა ჩაერთონ:
"სასამართლო გადაწყვეტილების მურთაზ აბაშიძე სამსახურში აღადგინეს 1 დეკემბერს, 2 დეკემბერს კი გაანთავისუფლეს, ამის შესახებ თავად აბაშიძეს აცნობეს 8 დეკემბერს. განთავისუფლების შესახებ აქტში მითითებულია, რომ იგი განთავისუფლებულია მერიის შიდა აუდიტის დასკვნის საფუძველზე.
ასეთ "ფინტებს" იყენებდა "ნაციონალური მოძრაობა" არასასურველი ადამიანების მოსაშორებლად, რის საშუალებასაც, დღევანდელისგან განსხვავებით, მაშინდელი კანონმდებლობა იძლეოდა. მიმაჩნია, რომ მოცემულ შემთხვევაში, ადგილი აქვს ადამიანის დევნას საჯარო ხელისუფლების წარმომადგენლის მხრიდან, რომელიც დაუშვებლად ხელყოფს მურთაზ აბაშიძის შრომით უფლებას. მერიამ არ დაუშვა ის, რომ აბაშიძე თუნდაც ერთი დღით სამსახურში მისულიყო.
რაც შეეხება შიდა უდიტის დასკვნას, მინდა ვთქვა, რომ შემოწმება და შემდეგში დასკვნა გაკეთებულია სახელმწიფო შიდა ფინანსური კონტროლის მარეგულირებელი ნორმების სერიოზული დარღევით, რაც გვაძლევს იმის თქმის საშუალებას, რომ აბაშიძის ხელახალი უკანონო განთავისუფლებას მეორე სერიოზული დარღვევა დაემატა და კანონის დამრღვევ პირთა წრე მნიშვნელოვნად გაიზარდა. საზოგადოება მალე დარწმუნდება იმაში, რაც ახლა მოგახსენეთ" _ აცხადებს იურისტი.
მისივე თქმით, "ოზურგეთის მერია ბოლო რამდენიმე თვის განმავლობაში, ძალიან დიდ ძალისხმევას და ენერგიას ანდომებს თავისი არასწორი გადაწყვეტილებების ან მოქმედებების გასწორებას, რასაც გარდა სამუშაო დროისა, მმართველის პარტიის და მერიის ავტორიტეტი ეწირება, რომელიც თავისთავად ხარჯვადი რესურსია და ამოუწურავი არ არის.
დარწმუნებული ვარ, აბაშიძე კვლავ დაბრუნდება თავის სამუშაო ადგილზე, რადგანაც ამის ყველა წინასამართლებრივი პირობა არსებობს. ასევე, ვფიქრობ, რომ დღეს არსებული ვითარებიდან გამომდინარე, საქმეში უნდა ჩაერთოს სახალხო დამცველი და უფლებადამცველი ორგანიზაციები".
ქალაქ ოზურგეთის მერიაში აღნიშნულ საკითხთან დაკავშირებით ასეთ კომენტარს აკეთებენ:
"1 დეკემბერს, სასამართლოს გადაწყვეტილების თანახმად, მურთაზ აბაშიძე აღდგა სტადიონის ხელმძღვანელის თანამდებობაზე, 2 დეკემბერს კი შიდა აუდიტის სამსახურის უარყოფითი მოსაზრების საფუძველზე განთავისუფლდა დაკავებული თანამდებობიდან. შიდა აუდიტორული შემოწმება სტადიონის ამჟამინდელი ხელმძღვანელის მოთხოვნით ჩატარდა, რის შედეგადაც, მნიშვნელოვანი დარღვევები გამოვლინდა."
