13 დეკემბერს თბილისის ცირკში სპორტისა და ახალგაზრდობის საქმეთა სამინისტროსა და ქართული ჭიდაობის ფედერაციის ერთობლივი ორგანიზებით, ქართულ ჭიდაობაში 2014 წლის სეზონის შემაჯამებელი ტურნირი – ფალავნობა 2014 გაიმართება.
სამინისტროს პრეესამსახურის ინფორმაციით, ფალავნობაში საქართველოს ყველა რეგიონის 70-80 სპორტსმენი ჩაერთვება. ქართული ჭიდაობის ტურნირი 4 წონით კატეგორიაში – 80, 90, 100, მძიმე კატეგორიებსა და აბსოლუტურ ფალავნობაში ჩატარდება.
ქართული ჭიდაობის ტურნირის გამარჯვებულები თასებთან და მედლებთან ერთად ფულადი პრიზებით დაჯილდოვდებიან, აბსოლუტურ ფალავნობაში გამარჯვებულს კი სპეციალური ჯილდო – ავტომობილი „პორშე კაიანი" გადაეცემა. ტურნირის ჯამური საპრიზო ფონდი 70.000 ლარია.
ფალავნობის ტურნირში მონაწილეობას ტიტულოვანი ქართველი მოჭიდავეები მიიღებენ. აღსანიშნავია, რომ პირველად აბსოლუტურ ფალავნობაში ჩაერთვება 20-მდე უცხოელი სპორტსმენი, მათ შორის უზბეკეთიდან, აზერბაიჯანიდან, უკრაინიდან, ბელარუსიდან, ყაზახეთიდან.
ფალავნობის წლევანდელი ტურნირი, შინაგან საქმეთა სამინისტროსა და სპორტისა და ახალგაზრდობის საქმეთა სამინისტროს ქალთა მიმართ ძალადობის წინააღმდეგ მიმართული ერთობლივი კამპანიის ფარგლებში იმართება.
აღსანიშნავია, რომ 2014 წელს ქართულ ჭიდაობას არამატერიალური კულტურული მემკვიდრეობის ძეგლის სტატუსი მიენიჭა. ფალავნობა 09:00 საათზე დაიწყება, ფინალები კი 17:00 საათიდან საზოგადოებრივი მაუწყებლის პირდაპირ ეთერით გადაიცემა.
ღონისძიების ორგანიზატორები არიან ქართული ჭიდაობის ეროვნული ფედერაცია, სპორტისა და ახალგაზრდობის საქმეთა სამინისტრო და ეროვნული ოლიმპიური კომიტეტი.
ტურნირის დეტალებზე სპორტისა და ახალგაზრდობის საქმეთა სამინისტროში პრესკონფერენციაც გაიმართა, სადაც მედიასთან ქართული ჭიდაობის ფედერაციის პრეზიდენტმა გელა ბერუაშვილმა, სპორტისა და ახალგაზრდობის საქმეთა მინისტრის მოადგილე თამაზ თევზაძემ და სპორტის დეპარტამენტის უფროსმა ირაკლი დოლაბერიძემ ისაუბრეს.
