ხალხი ხელისუფლების დახმარების მოლოდინში

4 დეკემბერს, ქალაქ ოზურგეთის მერთან შესახევდრად მოსახლეობა იყო შეკრებილი _ ხალხი ხელისუფლებისგან ყურადღების მიქცევასა და პრობლემების მოგვარებას მოითხოვდა.

ერთ-ერთი მათგანი ოზურგეთში, მეგობრობის ქუჩაზე მდებარე მრავალბინიანი საცხოვრებელი სახლის მცხოვრები იყო, რომელმაც " გურია ნიუსს" განუცხადა, რომ აღნიშნული ბინის 50 ოჯახი უდიდესი პრობლემის წინაშე დგას _ ისინი ბინის ფასადზე წყალდამცავი თუნუქის ფენის აკვრასა და სახურავის შეღებვას. მათ განცხადებით ქალაქ ოზურგეთის მერიას მიმართეს.

ლეილა სალუქვაძე: "ჩვენს სახლში 50 ოჯახი ცხოვრობს. მაქვს მოტანილი განცხადება, რომელსაც ბინის ყველა მცხოვრები აწერს ხელს. 50 წელია, ჩვენს ბინას რემონტი არ ჩატარებია. ახლა წვიმის დროს ოთახებში წყალი შემოდის, კედლებიდან აწვიმს, ამასთანავე, არის უწყლობის და სხვა უამრავი პრობლემა. მოკლედ, გაუსაძლის პირობებში ვცხოვრობთ. ზამთარი მოდის და არ ვიცით, რა გვეშველება _ აქ ძირითადად, პენსიონერები და უმუშევარი ადამიანები ცხოვრობენ. ჩვენ რის საშუალება გვაქვს? ვინ მოაგვარებს ჩვენს პრობლემებს, არ ვიცით. ვნახოთ, დღეს რას გვეტყვიან".

"გურია ნიუსი" ადგილზე გაეცნო აღნიშნულ ბინაში არსებულ პრობლემებს. როგორც იქ მცხოვრებლებმა გვითხრეს, ზამთარში აქ ყოფნა წარმოუდგენელია, თუმცა, მათივე თქმით, ხელისუფლების წარმომადგენლები პრობლემების მოგვარება შეჰპირდნენ.

მზია დარჩია: "ამ სახლში უმეტესად მარტოხელა პენსიონერები ცხოვრობენ. წვიმის დროს, სახურავიდან წვიმა ჩამოდის, ოთახებში წყალი შემოდის. მთელი ბინა ასეთ მდგომარეობაშია. სახლი, დაახლოებით, ხუთი წლის წინ გადახურეს, მაგრამ, როგორც ჩანს, სამუშაოები არაკეთილსინდისიერად ჩაატარეს. ახლა სახურავი დაჟანგულია და უნდა შეიღებოს. სახურავიდან ჩამოსულ წვიმის წყალს გასასვლელი არსად არ აქვს _ საწრეტი არხია გასაკეთებელი. დახმარებისთვის მივმართეთ მერიას. ვნახოთ, დაგვეხმარებიან თუ არა."

ლეილა აბაშმაძე: "გუშინწინ იმხელა "ტბა" იდგა კორპუსთან, მანქანა ვერ გადიოდა. დატბორილია ყველაფერი. გამგებლის ყოფილი მოადგილე ირაკლი სირაძე დაგვპირდა, რომ მოაგვარებდნენ პრობლემას, მაგრამ არაფერი გაუკეთებიათ. ვნახოთ, ახალი ხელისუფლება რას იზამს. მიგვიღეს, დაგვპირდნენ და ვნახოთ _ იმედი გვაქვს, თორემ ასე ცხოვრების გაგრძელება არ შეიძლება".
"ამ სახლში ცხოვრება არ შეიძლება _ სულ დახეთქილი და გაბზარულია კედლები, ოთახებში წვიმა ჩამოდის, წყალს გასასვლელი არ აქვს და ეზოში ტბა დგება", _ ამბობდნენ "გურია ნიუსთან" აღნიშნული ბინის მცხოვრებლები.

ქალაქ ოზურგეთის მერიაში, პასუხისმგებელი პირები ამ თემაზე, ჩვეულებისამებრ, ჟურნალისტებთან კომენტარს არ აკეთებენ და მხოლოდ შაბლონური ოფიციალური პასუხით შემოფარგლებიან:
"განცხადებით მომართვის საფუძველზე, ქალაქ ოზურგეთის მუნიციპალიტეტის მერიის ინფრასტრუქტურის სამსახურის თანამშრომლები მეგობრობის ქუჩაზე მრავალბინიანი საცხოვრებელი სახლის მცხოვრებთა პრობლემებს ადგილზე გაეცნენ. მოსახლეობა ბინის ფასადზე წყალდამცავი თუნუქის ფენის აკვრასა და სახურავის შეღებვას მოითხოვდა. სპეციალისტთა მიერ მოხდა ჩასატარებელი სამუშაოების მოცულობის განსაზღვრა. აღნიშნულ სახლში გასახორციელებელი სარეაბილიტაციო სამუშაოები 2015 წლის ბიუჯეტში იქნება გათვალისწინებული".-