“კვირის თემა” _ ციებ-ცხელება გასაუბრების მოლოდინში

ადგილობრივ თვითმმართველობებში არსებული ვაკანტური ადგილების დასაკავებლად ჩოხატაურში, ოზურგეთსა და ლანჩხუთში ათასზე  მეტმა ადამიანმა გამოსცადა თავი. გამსვლელი ქულა გურიის მუნიციპალიტეტებს შორის ყველაზე დაბალი ჩოხატაურში იყო, თუმცა, როგორც აღმოჩნდა, ბევრმა მინიმალური კომპეტენციის ზღვარი ვერ გადალახა.

ჩაჭრილების უმრავლესობა სოფლებში გამგებლის წარმომადგენლები აღმოჩნდნენ. ჩაჭრილებს შორისაა გამგეობების მოქმედი თანამშრომლებიც, მათ შორის, ოთხი ადამიანი განყოფილების უფროსი იყო.

როგორ ჩაიარა ტესტირებამ და რა ელით წინ კონკურსანტებს _ ამ თემაზე ისაუბრეს  G-News TV-ის გადაცემაში _ "კვირის თემა"  საკონკურსო/საატესტაციო კომისიის თავმჯდომარეებმა: ლანჩხუთის მუნიციპალიტეტის გამგებელმა ზაზა ურუშაძემ, ლანჩხუთის მუნიციპალიტეტის საკრებულოს თავმჯდომარის მოადგილე გელა კილაძემ, ოზურგეთის მუნიციპალიტეტის გამგებელმა მერაბ ჭანუყვაძემ და ჩოხატაურის მუნიციპალიტეტის გამგებლის მოადგილე მინდია ჟღერიამ.

როგორც გაირკვა, ტესტირებაზე ყველაზე მაღალი შედეგი ოზურგეთის მუნიციპალიტეტში აჩვენეს.

მერაბ ჭანუყვაძის თქმით, ოზურგეთის მუნიციპალიტეტის გამგეობასა და საკრებულოს აპარატში 137 ვაკანტური თანამდებობების დასაკავებლად განაცხადი შეიტანა 488 კანდიდატმა. მათ შორის, გამგეობაში _ 416 კანდიდატმა 123 ვაკანსიაზე, ხოლო საკრებულოს აპარატში _ 72 კანდიდატმა 14 ვაკანსიაზე.

24 ნოემბრის კომისიის სხდომაზე 392-მა აპლიკანტმა სრულად დააკმაყოფილა საკვალიფიკაციო მოთხოვნები და გადავიდა კონკურსის მეორე ეტაპზე _ ტესტირებაზე. ხოლო, 98 კანდიდატს მიეცა ორი სამუშაო დღის ვადა ხარვეზების აღმოსაფხვრელად. აქედან, 18-მა აპლიკანტმა აღმოფხვრა ხარვეზი და, საერთო ჯამში, კონკურსის ტესტირების ეტაპზე გადავიდა 410 კანდიდატი.

2014 წლის 13-14 დეკემბერს ტესტირება ჩატარდა. ტესტირებაში მონაწილეობა მიიღო 368 კანდიდატმა, ხოლო ტესტირებაზე არ გამოცხადდა 42 კანდიდატი.
გასული კონკურსანტებიდან კი მხოლოდ 25 ჩაიჭრა. აქედან, როგორც ჭანუყვაძემ აღნიშნა, სამი მათგანი გამგებლის წარმომადგენელი იყო სოფლებში, ხოლო რამდენიმე _ გამგეობის მოქმედი სპეციალისტი.

ჩოხატაურში 220 მოქალაქე გავიდა ტესტირებაზე, აქედან ზღვარი, რომელიც 33 ქულას შეადგენდა, გადალახა 137-მა, 19 არ გამოცხადდა, დანარჩენებმა საჭირო ქულები ვერ დააგროვეს. მინდია ჟღერიას თქმით, ჩაიჭრა გამგებლის 9 წარმომადგენელი, განყოფილების 4 უფროსი, ორი_ სამხედრო კომისარიატში, ერთი _ ადმინისტრაციულ სამსახურში, ერთი კი _ სოციალური სამსახურში.  ჩაჭრილებიდან 15 გამგეობის და საკრებულოს მოქმედი სპეციალისტები არიან.

ზაზა ურუშაძის თქმით, ლანჩხუთის მუნიციპალიტეტის გამგეობის მიერ გამოცხადებულ ვაკანსიაზე 243-მა აპლიკანტმა შეიტანა განაცხადი. აქედან, ტესტირების ეტაპზე 205 ადამიანი გადავიდა.18 აპლიკანტი ტესტირებაზე არ მივიდა. გამოცხადებულთაგან კი მხოლოდ 37 ადამიანი ჩაიჭრა. იქიდან გამომდინარე, რომ ტესტირების შედეგები ჯერ ოფიციალურად არ გამოცხადებულა, გადაცემის სტუმრებს კონკრეტული სახელი და გვარები არ დაუსახელებიათ, თუმცა, როგორც ურუშაძემ აღნიშნა, ჩაჭრილებიდან 3 გამგებლის წარმომადგენელი იყო, რამდენიმე კი გამგეობის მოქმედი წარმომადგენელი.

_ მათ აქვთ გასაჩივრების ვადა. ამიტომ, არ დავასახელებთ კონკრეტულ გვარებს, _ აღნიშნა ურუშაძემ.

აღსანიშნავია, რომ ოზურგეთისგან და ჩოხატაურისგან განსხვავებით,  ლანჩხუთში საკრებულოსა და გამგეობას ცალ-ცალკე აქვთ კომისიები შექმნილი. მიუხედავად იმისა, რომ ლანჩხუთის საკრებულოში სულ 5 ვაკანსიაზე იყო კონკურსი გამოცხადებული.

ლანჩხუთის საკრებულოს საკონკურსო/საატესტატო კომისიის თავმჯდომარის, გელა კილაძის განცხადებით, ცალკე კომისიის გაკეთების უფლება მათ კანონით ჰქონდათ.
_ თქვენი კითხვა, რომ კომისია გამგეობისადმი უნდობლობამ შეგვაქმნევინა, არ არის სწორი. კანონი გვაძლევდა ამის საშუალებას და ამიტომ გავაკეთეთ. ცალკე კომისიის შექმნას ხარჯების ზრდა არ გამოუწვევია, _ აღნიშნა კილაძემ.

მისივე ინფორმაციით, საკრებულოს 5 ვაკანსიაზე განაცხადი 92 პირმა შეიტანა, აქედან, ტესტირების ეტაპზე 58 გადავიდა, ხოლო  ზღვარი 46-მა გადალახა.

უნდა ითქვას ისიც, რომ ლანჩხუთის საკრებულო საკონკურსო/საატესტაციო კომისიამ თავი იმითაც გამოიჩინა, რომ კომისიის წევრად სასულიერო პირი, დეკანოზი მირიანი მიიწვია.
კილაძე ამბობს, რომ დეკანოზი მირიანის კომისიის წევრობით კანონი არ დარღვეულა და არც არავის უფლებები შელახულა. მათ შორის, არც რელიგიური უმცირესობების, რომლებმაც თავიანთი უკმაყოფილება ამ ფაქტთან დაკავშრებით, "გურია ნიუსთან" რამდენჯერმე დააფიქსირეს და აღნიშნეს, რომ ამით მათზე ფსიქოლოგიური ზეწოლა მოხდებოდა.

როგორც კილაძემ აღნიშნა, ატეხილი აჟიოტაჟის გამო, დეკანოზმა მირიანმა, სამშაბათს დილით, კომისიას განცხადებით მიმართა და წევრობაზე უარი თქვა: _ ვეკითხები იმ ადამიანებს, რომლებიც ამ თემაზე განცხადებებს აკეთებდნენ და ამბობდნენ, რომ სასულიერო პირის კომისიაში ყოფნით მათი უფლებები ირღვეოდა, ახლა ვისი უფლებებია დარღვეული, მათი თუ მამა მირიანის? _ აღნიშნა კილაძემ, რომლის განმარტებით, ამ ფაქტის გამო, ძალიან შეწუხებულია.

გადაცემის ოთხივე სტუმარს ვკითხეთ, დაუშვებდნენ თუ არა გასაუბრებაზე მედიის წარმომადგენლებს. მინდია ჟღერიას თქმით, რომელსაც გასაუბრებაზე დასწრების სურვილით "გურია ნიუსმა" ოფიციალური განცხადებით წინა კვირას მიმართა, ამ საკითხს კომისიასთან ერთად გადაწყვეტს.

ზაზა ურუშაძემ აღნიშნა, რომ თუკი მედიის წარმომადგენლებს სურვილი ექნებათ, ამაში პრობლემას ვერ ხედავს და ჟურნალისტებს დაასწრებს, გელა კილაძის თქმით, მედიის წარმომადგენლებს მათთვის ჯერ არ მიუმართავთ, თუმცა არასამთავრობო ორგანიზაციებს კომისიამ უარი უთხრა იმ მოტივით, რომ ეს დაძაბულობას გამოიწვევს. გასაუბრებაზე მედიის დასწრების წინააღმდეგია მერაბ ჭანუყვაძე, რომელსაც არგუმენტად ის აქვს, რომ ეს ზოგიერთ კონკურსანტს დაძაბავს და არიან ადამიანები, რომლებსაც არ სურთ. თუმცა, რამდენიმე ათეულმა კონკურსანტმა "გურია ნიუსს" უკვე მიმართა გასაუბრებაზე დასწრების  და მოვლენებზე დაკვირვების თხოვნით.

როგორც გავარკვიეთ, გასაუბრების ეტაპზე გადასული კონკურსანტების უმრავლესობა ყოფილი ხელისუფლების აქტიური სახეა.  მათ შორის, ის ადამიანები არიან, რომლებიც თვითმმართველობის არჩევნების წინ (აღარაფერს ვამბობთ 2012 წლის საპარლამენტო არჩევნებზე) "ქართულ ოცნებას" ღიად რომ უპირისპირდებოდნენ. როგორც გადაცემის სტუმრებმა აღნიშნეს, გასაუბრების დროს პარტიულ კუთვნილებას ყურადღება არ მიექცევა და კადრები ობიექტურად იქნება შერჩეული. მათივე ინფორმაციით, ტესტირებაზე მიღებულ ქულებს გადამწყვეტი მნიშვნელობა არ ექნება და აქცენტი გამოცდილებაზე, პროფესიულ ცოდნაზე გაკეთდება. მერაბ ჭანუყვაძის თქმით, ოზურგეთის მუნიციპალიტეტის გამგეობა მუშაობის საშუალებას ახალგაზრდებსაც მისცემს:

_ ძალიან ბევრი ახალი სახეა. ახალგაზრდებმა ტესტირებაში ძალიან კარგი შედეგები აჩვენეს. ჩვენ მათ აუცილებლად მივცემთ სამსახურის დაწყების შანსს, _ აღნიშნა ჭანუყვაძემ.

გადაცემის – "კვირის თემა" სრული ვერსიის ნახვა შეგიძლიათ აქ .