საპარლამენტო უმცირესობის წევრ გიორგი ბარამიძესა და მმართველი გუნდის დეპუტატ დავით საგანელიძეს შორის პარლამენტში დაპირისპირება მოხდა. ჩხუბი კვოტების გადანაწილების საკითხს მოჰყვა.
"ნუ იჯგიმები, ფეხებსაც ვერ მომჭამ", _ ამ ფრაზით ოპოზიციონერმა ვიცე-სპიკერმა გიორგი ბარამიძემ დავით საგანელიძეს მიმართა.
პარლამენტის მუდმივმოქმედ დელეგაციებში ფრაქციათა კვოტების ხელახლა გადანაწილების საკითხთან დაკავშირებით დაწყებული კამათი ჩხუბში და სიტყვიერ შეურაცხყოფაში გადაიზარდა.
კვოტების გადანაწილების საკითხთან დაკავშირებით, ბარამიძემ დღეს ისიც გააპროტესტა, რომ ამ საკითხის განხილვა პარლამენტის თბილისის შენობაში გაიმართა. მან მმართველი გუნდი კონსტიტუციის დარღვევაში კიდევ ერთხელ დაადანაშაულა.
თავის მხრივ, საგანელიძემ ოპოზიციონერ კოლეგას მიმართა, რომ ის მთელი ცხოვრება კონსტიტუციას არღვევს, მისი ზემოთ აღნიშნული ფრაზის გამო კი, საგანელიძემ ბარამიძეს თავხედი და უზრდელი უწოდა.
დეპუტეტების დაწყნარება მანდატურებმა მოახერხეს.
ცნობისთვის, “თავისუფალი დემოკრატების” დამოუკიდებელ, ოპოზიციურ საპარლამენტო ფრაქციად ჩამოყალიბების შედეგად პარლამენტის მუდმივმოქმედი დელეგაციების შემადგენლობაც იცვლება.
ცვლილება დელეგაციებში ფრაქციათა პროპორციული წარმომადგენლობის კვოტებზე აისახა.
საკითხი გუშინ პარლამენტის საპროცედურო საკითხთა და წესების კომიტეტის სხდომაზე განიხილეს, რომელშიც ფრაქცია “ერთიანი ნაციონალური მოძრაობის” წარმომადგენლებმაც მიიღეს მონაწილეობა.
მათ პროტესტი ევროსაბჭოს დელეგაციებში კვოტების განაწილებასთან დაკავშირებით გამოთქვეს. კერძოდ, აღნიშნულ დელეგაციაში საპარლამენტო უმცირესობისათვის განსაზღვრული იყო ორი ადგილი, რომელიც ფრაქცია “ერთიანი ნაციონალური მოძრაობის” წევრებს ეჭირათ. დელეგაციის ახალ შემადგენლობაში კი, ოპოზიციის კვოტას ერთი წარმომადგენლით ფრაქცია “თავისუფალი დემოკრატები” დაიკავებს.
ფრაქცია “ნაციონალური მოძრაობის” წევრებმა კონსულტაციების გასამართად საკითხის გადადება მოითხოვეს, რასაც კომიტეტის წევრები არ დაეთანხმნენ და დელეგაციების შემადგენლობის წარმოდგენილ ვარიანტს უყარეს კენჭი.
უმრავლესობიდან “თავისუფალი დემოკრატების” გასვლით იცვლება და იზრდება საპარლამენტო კომიტეტების შემადგენლობაც. ამჟამად მოქმედი 15-წევრიანი კომიტეტების შემადგენლობა 17 პარლამენტის წევრით, ხოლო 17-წევრიანი კომიტეტების შემადგენლობა კი, 19 წევრით განისაზღვრა.
