“მსაჯული და მტყუან-მართალის გამრჩევი ხალხი უნდა იყოს და არა ჩინოვნიკი“

ქალაქ ოზურგეთს საკრებულოს დეპუტატი თამარ ნადირიძე ოზურგეთის მუნიციპალიტეტის მერიაში საჯარო მოხელეთა კონკურსისა და გასაუბრების შემდეგ, დაკომპექტებული საჯარო მოხელეების სიასთან დაკავშირებით, რომელიც სხვადასხვა მედიასაშუალებებით გავრცელდა, განმარტებას აკეთებს.

"გურია ნიუსი“ ნადირიძის განცხადებას უცვლელად გთავაზობთ:

“თუკი პრობლემას მართლა იპოვით, თქვენ ემსგავსებით დედაბერს, რომელმაც საკუთარ ცხვირზე იპოვა სათვალე, რომელსაც დიდი ხანია ეძებდა ოზურგეთის მერიაში თანამდებობებზე გამწესებასთან დაკავშირებულ ინფორმაციის გავრცელებას ამჯერადაც სერიოზული გაუგებრობები მოყვა. ამასთანავე ჩემდა გასაკვირად სკანდალს აგორებს და სიტუაციას ძაბავს არა ჟურნალისტები არამედ მერიის თანამშრომლები. მიჭირს იმაზე მსჯელობა თუ რა სათავისო ან საზოგადოებრივ სიკეთეს ელის ამით მერია, თუმცა არც იმას გამოვრიცხავ, რომ მერიაში ჩემთვის მიუწვდომელი აზრები და ზემიზნები აქვთ დასახული. ვაპირებდი ამ საკითხთან მიმართებაში პოლიტიკური განცხადება გამეკეთებინა, მაგრამ ამის აზრს ვერ ვხედავ, რადგანაც უკვე მერამდენედ სიტუაცია იმდენად არასერიოზულია მისი პოლიტიკური, ეთიკური ან სხვა კუთხით შეფასება ფაქტიურად შეუძლებელია და საერთოდ მიმაჩნია, რომ არ არსებობს ტერმინოლოგია, რომელიც ზრდილობიან ადამიანს მისცემდა საშუალებას ყველაფერ ამასთაან დაკავშირებით საკუთარი მოსაზრება გამოეთქვა საჯარო სივრცეში“

“როგორც მოგახსენეთ ახალი ამბავი არ არის, ის რომ მერიის მოქმედებებს თან ახლავს სერიოზული გაურკვევლობები, დავი-დარაბა და მერიის თანამშრომლების მხრიდან არასერიოზული განცხადებები სოციალურ ქსელებში. მაგრამ მთავარი ისაა, რომ მერია ყოველთვის პრობლემის სათავეს სხვაგან ეძებს და არა საკუთარ წინდაუხედავ და გაუთვლელ მოქმედებებში.

“ძალიან ცუდია თუ კი მერიის მაღალჩინოსნები ფიქრობენ, რომ საზოგადოების თვალში შეძლებენ საკუთარი უუნარობის გადაფარვას ჟურნალისტების ან სხვა პირების ლანძღვით ან მათ არაკვალიფიციურობაზე მითითებით. ნებისმიერ შემთხვევაში ჟურნალისტის მრწამსი ან მისი კეთილსინდისიერება ჩემთვის უფრო ნაკლებად მნიშვნელოვანია ვიდრე საჯარო მოხელეების წინდახედულობა, კვალიფიკაცია და საზოგადოებასთან კომუნიკაციის ფორმა, რადგანაც ხელფასს ხალხისაგან საჯარო მოხელეები იღებენ და არა ჟურნალისტები. ვფიქრობ ამ შემთხვევაში მსაჯული და მტყუან -მართალის გამრჩევი ხალხი უნდა იყოს და არა ჩინოვნიკი.“

“ საზოგადოებამ უნდა იმსჯელოს რამდენად მისაღებია ჩვენთვის თუნდაც ჟურნალისტის მიერ არასწორად გავრცელებულ ინფორმაციაზე რეაგირების ის ფორმები, რომელსაც პერმანენტულად ადგილი აქვს მერიის მხრიდან, ასევე უნდა იმსჯელოს ეხსნება თუ არა საჯარო მოხელეს მისი სამოხელეო ეთიკის ტვირთი 18 საათსა 00 წუთზე, ანუ სამსახურის დამთავრების შემდეგ და შეიძლება თუ არა ეს ტვირთი პიჯაკივით ჩამოკიდო კაბინეტში, საკიდზე და ასე ამჩატებულმა, რაც გინდა ის გააკეთო. თქვენი არ ვიცი მე კი ვფიქრობ, რომ ეს არ შეიძლება, უფრო სწორედ ეს კარგს არაფერს არ მოგვიტანს. და ბოლოს მერიას უბრალოდ მოვუწოდებ, რომ პრობლემა საკუთარ შენობაში მოძებნონ და არა ჟურნალ-გაზეთების რედაქციებში.“ “ასევე მინდა ვთქვა, რომ საზოგადოებისათვის უფრო მნიშვნელოვანი უნდა იყოს ის, რომ მერია მნიშვნელოვნად ზრდის ხელფასებს ხალხის ხარჯზე და მომავალი ბიუჯეტის თითქმის სამოცი პროცენტი ამაზეა გათვლილი, ასევე მნივნელოვანია ის რომ წინასაარჩევნო დაპირებების – მოსახლეობის დასაქმებაზე და ბიზნესის განვითარებაზე მერიაში არავის არანაირი გეგმა არ გააჩნია და ეს საკითხები მთლიანად დავიწყებულია. ხალხზე იზრუნეთ ბატონებო! ხალხზე! და იმის ანგარიში მაინც ჩააბარეთ საზოგადოებას თუ რა გააკეთეთ ხელისუფლებაში მოსვლის შემდეგ იმაზე მეტი ვიდრე წინა ხელისუფლება აკეთებდა! პ.ს. არ მინდა დადასტურდეს გავრცელებული ინფორმაცია იმასთან დაკავშირებით, რომ მერიაში თანამდებობაზე ინიშნებიან ტესტირება გაუვლელი ან შესაბამისი ქულების არ მქონე პირები, რომელთაც სხვა, რომ არაფერი წერა-კითხვის პრობლემები აქვთ, ასევე იმედია არც ნაციონალური მოძრაობის მოსამსახურე არჩევნების გამყალბებლებს ვიხილავთ ხალხის სამსახურში“, _ ნათქვამია თამარ ნადირიძის მიერ გავრცელებულ განცხადებაში.