"გურია ნიუსის" საკალანდო ლატარია, რომელიც მრავალშვილიანი ოჯახების 18-წლამდე ბავშვებისთვის იყოს განკუთვნილი, დასრულდა.
აქციაში მონაწილე საჯარო მოხელეებმა, ბიზნესმენებმა და სამართალდამცველებმა ლატარიის ყუთიდან ბავშვების საახალწლო სურვილებიანი წერილები თავად ამოიღეს.
აღსანიშნავია, რომ ლატარიაში მონაწილე ბავშვების დიდი ნაწილი საკმაოდ ძვირადღირებულ ნივთებს ითხოვდნენ _ ნოუთბუქები, პლანშეტები, ველოსიპედები, ტელეფონები _ ასეთი საჩუქრების მიღება სურდათ ბავშვებს "თოვლის ბაბუასგან".
"თოვლის ბაბუა, გვინდა, რომ წიგნები და ტკბილეული მოგვიტანო. ჩვენ გვჯერა თქვენი არსებობის!" _ ოზურგეთის მუნიციპალიტეტის სოფელ ჭანიეთში მცხოვრები მელი და მეგი დიასამიძეების ეს სურვილი გურიის გუბერნატორის მოვალეობის შემსრულებელმა ქეთევან მოისწრაფეშვილმა აასრულა.
მეგის და მელის 6 და-ძმა ჰყავთ. აქედან, პროექტის ფარგლებში, ხუთ და-ძმას გადაეცა წიგნები, სახატავი რვეულები და ფლომასტერების ნაკრები.
დიასამიძეების ოჯახის წევრებს გუბერნატორის მოვალეობის შემსრულებელმა საახალწლო ნობათიც გადასცა.
"მიხარია, რომ საკალანდო ლატარიის თანამონაწილე გავხდი. არაჩვეულებრივი ბავშვები გავიცანი და საახალწლოდ მათი სურვილების ასრულება შევძელი. მე მათ გვერდით მუდამ ვიქნები. პატარები ჩვენი ქვეყნის ნათელი მომავალია," _ აღნიშნა ქეთევან მოისწრაფეშვილმა.
"ჩემთვის არაფერს გთხოვ, დედაჩემისთვის მინდა პურის საცხობი ღუმელი!" _ ასეთი წერილი მიწერა გიორგი კაპანაძემ თოვლის ბაბუას, რომელიც ოზურგეთის მუნიციპალიტეტის გამგებელმა მერაბ ჭანუყვაძემ აასრულა.
"ბედნიერი ვარ, რომ გიორგის ნატვრა ავუხდინე. წერილში გიორგი წერდა, რომ დედამისისთვის საახალწლოდ პურის საცხობი ელექტრო ღუმელი შეგვეძინა. მადლობა ამ პროექტის ორგანიზატორებს," _ თქვა მერაბ ჭანუყვაძემ.
სოფელ შემოქმედში მცხოვრები მანუჩარ და მაკა სადრაძეები თოვლის ბაბუასგან ველოსიპედს, ტკბილეულს და წიგნებს ითხოვდნენ. მათი სურვილი ოზურგეთის მუნიციპალიტეტის საკრებულოს თავმჯდომარემ დავით დარჩიამ და საკრებულოს თავმჯდომარის მოადგილემ დიმიტრი კვერღელიძემ აასრულეს.
"სიმართლე გითხრათ, გაგვიხარდა, რომ ამ აქციის მონაწილეები გავხდით. არასდროს დამავიწყდება მანუჩარის გახარებული სახე, როდესაც მას ველოსიპედი მივუტანეთ. ყველას გილოცავთ 2015 წლის შემობრძანებას", _ გვითხრა დიმიტრი კვერღელიძემ.
"კარგია, როდესაც მსგავსი პროექტები ხორციელდება გურიაში. იმედია, მაკას საბავშვო ენციკლოპედია მოეწონება", _ თქვა დავით დარჩიამ.
ჩოხატაურის მუნიციპალიტეტის სოფელ ჯვარცხმაში მცხოვრებმა მარიამ ჯინჭარაძემ მისთვის და მისი სამი დისთვის ფოტოაპარატი, მაგნიტოფონი და ტკბილეული ითხოვა.
ჯინჭარაძეებს სურვილები ჩოხატაურის მუნიციპალიტეტის საკრებულოს თავმჯდომარემ ზაალ მამალაძემ აუსრულა: "მიხარია, რომ ვარ ამ აქციის მონაწილე. ვერაფერი შეედრება იმ ემოციებს და სიხარულს, რომლებიც იმ ბავშვებიდან მივიღეთ, ვისაც საჩუქრები მივუტანეთ. საკრებულო ყოველთვის მზადაა, მსგავს აქციებში აქტიურად ჩაერთოს", _ გვითხრა მამალაძემ.
"ჩემო საყვარელო თოვლის ბაბუა! მჯერა, რომ შენ არსებობ. ჩემი დიდი ხნის ნატვრა ამისრულე, ძალიან გეხვეწები. პლანშეტი მაჩუქე. დედიკოს და მამიკოს არ აქვთ შესაძლებლობა და ჩემი და-ძმა ინტერნეტისთვის მეზობელთან დარბიან. მინდა, რომ სახლში გვქონდეს!" _ წერილს ხელს ჩოხატაურში, ლესელიძის ქუჩაზე მცხოვრები 6 წლის ნინო ჩხიკვაძე აწერდა. წერილი ლატარიის ყუთიდან ჩოხატაურის მუნიციპალიტეტის გამგებელმა ირაკლი კუჭავამ ამოიღო.
"ძალიან დიდი მადლობა მინდა გადავუხადო "გურია ნიუსს" ამ აქციის ორგანიზებისთვის. ამ დღემ დაადასტურა, რომ ადამიანებს სიხარული სულ მცირედითაც შეიძლება მიანიჭო. მით უმეტეს, პატარებს. ბედნიერი ვარ, რომ ამ კარგი აქციის მონაწილე ვარ," _ გვითხრა ირაკლი კუჭავამ.
"თოვლის ბაბუა! მე ვარ ნიკოლოზი, 5 წლის. ძალიან მინდა ველოსიპედი მყავდეს. თუ შეგიძლია, ამისრულე ეს სურვილი!" _ ჩოხატაურის მუნიციპალიტეტის სოფელ სამებაში მცხოვრები ნიკოლოზ ბაზიარის ეს წერილი ლატარიის ყუთიდან საკრებულოს ფრაქცია "ქართული ოცნების" თავმჯდომარემ ზვიად მამალაძემ ამოიღო და პატარას სურვილი შეუსრულა.
ფარცხმაში მცხოვრებ 6 წლის გიორგი ცინცაძეს აიპადი უნდოდა, პატარა და-ძმისთვის კი _ ტკბილეული. ცინცაძეების ოჯახის "თოვლის ბაბუობა" ჩოხატაურის გამგებლის მოადგილეს მინდია ჟღერიას ერგო.
დაბლაციხეში მცხოვრები სოროზანიშვილების "ფიფქიები" ჩოხატაურის საკრებულოს საფინანსო-საბიუჯეტო კომისიის თავმჯდომარე მაია პაიჭაძე და კულტურის ცენტრის დირექტორი თამარ კეკელიძე იყვნენ. პატარები, "კალანდას" _ 14 იანვარს, ტელეფონით, წიგნებით, სათამაშოებით და ტკბილეულით დაჯილდოვდნენ.
გუთურში მცხოვრებ შაკო მეფარიშვილს დიდი ხნის ოცნება აუხდა _ კომპიუტერი მას ჩოხატაურის საკრებულოს ინფრასტრუქტურის კომისიის თავმჯდომარემ დავით გუდავაძემ შეუძინა.
ჩოხატაურის საკრებულოს იურიდიულ საკითხთა კომისიის თავმჯდომარემ მარინა ბერაძემ სოფელ ბასილეთში მცხოვრები ნინო ბარამიძის სურვილი შეასრულა და მას და მის დაიკოს ბარბის სახლი, თოჯინები და ტკბილეული მიუტანა.
ნინო, ლუკა და ნიკა წიქარიძეების სურვილი შეასრულა ოზურგეთის რაიონული პროკურატურის პროკურორმა დავით შვანგირაძემ _ პატარებს საოცნებო ველოსიპედი მან სახლში მიუტანა.
ჩოხატაურის მუნიციპალიტეტის სოფელ ქვენობანში მცხოვრები თევზაძეების "თოვლის ბაბუა" ჩოხატაურის გამგეობის საფინანსო სამსახურის უფროსი გელა ლომინეიშვილი იყო _ თევზაძეები თოვლის ბაბუას პულტიან მანქანას, "მაშხალებს" და ბევრ ტკბილეულს სთხოვდნენ.
პატარა, ლამაზი ფიფქია თაკო გიორგაძე იყო ყაველაშვილების პატარების სტუმარი. მამის, ლაშა გიორგაძის მიერ შეძენილი საჩუქრები თაკომ ლალუკას პირადად გადასცა.
რთულია სიტყვებით აღწერო ის ემოციები, რომლებიც პატარებს საჩუქრების მიღების დროს ჰქონდათ _ სიხარული, ცრემლი, მოულოდნელობა, გაკვირვება და კომენტარები, რომ თურმე ოცნებები მართლა ხდება _ ასეთი იყო ჩვენი ობიექტივით დაფიქსირებული 14 იანვარი.
სამწუხაროდ, აქციაში არ იაქტიურეს ლანჩხუთელმა პატარებმა, მაგრამ იმდეი გვაქვს, ისინი ჩვენ აქციებს მომავალში შემოუერთდებიან.
"გურია ნიუსი" მადლობას უხდის ყველას _ დიდებს და პატარებს, რომლებიც გამოგვეხმაურნენ და ახალი წელი სიხარულით, სიკეთით დაიბედეს.
ამ ყველაფრის ამსახველი ვიდეო კადრების ნახვა შეგიძლიათ აქ.
