ლანჩხუთის ბაღების გაერთიანების ხელმძღვანელი დათო დობორჯგინიძე და მისი თანამშრომელი ზურაბ ჩხაიძე, რომელიც ფინანსური პოლიციის თანამშრომლებმა დღეს ლანჩხუთის ცენტრში დააკავეს, სავარაუდოდ, ბათუმში გადაიყვანეს.
დაკავება ლანჩხუთში დაახლოებით 13 საათზე მოხდა, მაშინ, როდესაც ჩხაიძე შესვენებაზე იყო გასული და თავისი მამიდის კუთვნილ ვეტერინარულ აფთიაქში შედიოდა.
"გურია ნიუსის“ კორესპონდენტის ცნობით, პოლიციის თანამშრომლებმა ჩხაიძეს ხელები აგადაუგრიხეს და საკმაოდ ხმამაღლა უყვიროდნენ: – ბიჭო, ფული სად წაიღე?!
ჟურნალისტს, რომელიც ლანჩხუთის ცენტრში ჩხაიძისა და დობორჯგინიძის დაკავებას შეესწრო, ფინანსური პილიციის თანამშრომელი კატეგორიულად სთხოვდა ტერიტორიის დატოვებას.
ჩვენი კორესპონდენტის ცნობით, ფინანსური პოლიციის წარმომადგენლებმა ჩხაიძეს ჯიბეები გადმოუქექეს და ქალაქის ცენტრში ხელებგადაგრეხილი დაახლოებით ორი წუთი ყავდათ გაჩერებული, რის შემდეგაც მოვიდა პოლიციის პიკაპი და ჩხაიძე ბაღების ცენტრში გადაიყვანა.
საგამოძიებო სამუშაოები ასევე მიმდინარეობდა ბაღების ცენტრის უფროსის, დავით დობორჯგინიძის კაბინეტში, სადაც ფინანსური პოლიციის წარმომადგენლები და თავად ცენტრის უფროსი იმყოფებოდნენ, სხვა თანამშრომლებს ოთახში არ უშვებდნენ.
როგორც თანამშრომლების ნაწილმა "გურია ნიუსს“ განუცხადა, წარმოდგენა არ ქონდათ რა საქმესთან დაკავშირებით დააკავეს ჩხაიძე.
დაკავების ადგილზე ასევე იმყოფებოდა ექსპერტიც.
დაახლოებით საათნახევრიანი საგამოძიებო სამუშაოების მიმდინარეობის შემდეგ ზურა ჩხაიძე და ცენტრის უფროსი დავით დობორჯგინიძე შენობიდან გამოიყვანეს და ცალკ-ცალკე მანქანებში ჩასვეს. გურია ნიუსის“ ინფორმაციით, ისინი, სავარაუდოდ, ბათუმის მიმართულებით წაიყვანეს.
თავად ფინანსური პოლიციის წარმომადგენლები მომხდართან დაკავშირებით კომენტარს არ აკეთებენ.
ცნობისთვის, საგამოძიებო ჯგუფი მოკვლევას ლანჩხუთში უკვე ერთი კვირაა აწარმოებს.
