პარლამენტის საგაზაფხულო სესიის პირველ სხდომაზე დიდი ნაწილი დეპუტატთა განცხადებებს დაეთმო.
დეპუტატთა ერთმა ნაწილმა ყურადღება ქვეყანაში შექმნილ ეკონომიკურ მდგომარეობაზე, კრიმინოგენულ ვითარებაზე, ეროვნული ვალუტის კურსის ცვალებადობაზე, ბუნებრივი გაზის ფასის ზრდასა და ეკონომიკის გამოცოცხლების აუცილებლობაზე გაამახვილა.
საპარლამენტო უმცირესობის წარმომადგენლებმა შექმნილი პრობლემების მოუგვარებლობასა და ლარის გაუფასურებაში ქვეყნის დღევანდელი მთავრობა დაადანაშაულა, თუმცა პარლამენტარმა საპარლამენტო უმცირესობიდან, ზურაბ მელიქიშვილმა ლარის გაუფასურების ერთ-ერთ ფაქტორად საერთაშორისო ბაზარზე დოლარის გამყარების ფაქტიც დაასახელა.
"თუ ლარის კურსის გაუფასურება ფინანსთა მინისტრ ნოდარ ხადურის ბრალია, გამოდის, რომ მას გაცილებით უკეთესად უმუშავია, ვიდრე ევროკავშირის ნებისმიერი ქვეყნის ფინანსთა მინისტრს, რადგანაც მათ ქვეყნებში ევრო კიდევ უფრო მეტადაა გაუფასურებელი“, – განაცხადა ზურაბ მელიქიშვილის საპასუხოდ, საპარლამენტო უმრავლესობის წევრმა თამაზ მეჭიაურმა.
მისი თქმით, ბუნებრივია, ლარის გაუფასურება დოლართან მიმართებაში კარგი არ არის, განსაკუთრებით, მათთვის, ვისაც სესხები დოლარში აქვთ აღებული და შემოსავალს ლარში იღებენ, ეს პრობლემებს ქმნის, მაგრამ ანალოგიურ სიტუაციაში არის ევროკავშირის ნებისმიერი ქვეყანა, რამდენადაც ევრო ზუსტად იმდენით და ცოტა მეტითაც კი გაუფასურდა დოლართან მიმართებაში, ვიდრე ლარი.
"ლარი ევროსთან მიმართებაში გამყარებულია. ასევე, ნებისმიერი ქვეყნის, თუნდაც ჩვენ გარშემო, ვალუტები უფრო მეტადაა გაუფასურებული.
ამის დასტურია თუნდაც ის, რომ ფასები მხოლოდ გაძვირდა იმ პროდუქტებზე, რომელთა შემოტანაც დოლარში ხდება. ყველა დანარჩენზე ძირითადად, შემცირებულია, მათ შორის, ნავთობზე და სხვადასხვა პირველი მოთხოვნილების საქონელზე", – განაცხადა თამაზ მეჭიაურმა. მისი თქმით, ახლა მნიშვნელოვანია როგორ მუშაობს დღეს ხელისუფლება იმისათვის, რომ არსებული პრობლემების ლიკვიდაცია თუ არა, შემცირება მაინც მოახდინოს.
საპარლამენტო უმრავლესობის წევრ ნუკრი ქანთარიას განცხადებით, სესია სრულიად სხვა რეალობაში დაიწყო.
"ყარაფილაზე განხორციელებულმა ტერაქტმა ახალი ათვლის წერტილი გააჩინა. ეს არის დარტყმა ყველა ჩვენგანზე, ხელისუფლებაზე.
ქვეყანა ახალი გამოწვევების წინაშე აღმოჩნდა.
მივმართავ შინაგან საქმეთა მინისტრს, რომ აუცილებლად დაიწყოს ანტიტერორისტული, ანტიკრიმინალური პრევენციული ღონისძიებები, ვინაიდან მიმდინარეობს მიზანმიმართული კამპანია, ერთი მხრივ ბიძინა ივანიშვილის ლიკვიდაციისთვის, მეორე მხრივ ძალოვნების მიმართ“, – განაცხადა ნუკრი ქანთარიამ და იმედი გამოთქვა პროკურატურა ძალისხმევას არ დაიშურებს და დაიწყება სამართლიანობის აღდგენა, რაც არის ახალი ხელისუფლების ვალდებულება.
"მინდა საზოგადოებამ იცოდეს, რომ ჩვენ არ გავჩერდებით და ბოლომდე მივიყვანთ ამ პროცესს, თუკი საჭირო იქნება, შესაძლებელია ამას ვადამდელი არჩევნები დაჭირდეს და ჩვენ ამაზეც კი უნდა წავიდეთ.
ჩვენ უნდა ვიყოთ ერთიანი, ვინაიდან ჩვენს წინააღმდეგ მიმდინარეობს მიზანმიმართული კამპანია“, – განაცხადა ნუკრი ქანთარიამ.
საპარლამენტო უმცირესობის წევრი გიორგი ღვინიაშვილი შინაგან საქმეთა ახალი მინისტრის საგაზეთო ინტერვიუს გამოეხმაურა, მოსალოდნელ კონკრეტულ საფრთხეებთან დაკავშირებით მისგან განმარტებების გაკეთება ითხოვა და პარლამენტში მინისტრის მოწვევის საკითხი დასვა.
