საქართველო პირველი იქნება ნატო-ს არაწევრ ქვეყნებს შორის, სადაც ალიანსი წვრთნისა და შეფასების ცენტრს გახსნის. ცენტრის მთავარი დანიშნულება თანამედროვე სამხედრო შეიარაღების შესწავლაა.
იმაზე, რომ საქართველოში ნატო-ს საწვრთნელი ცენტრი უნდა გახსნილიყო, საუბარი გასულ წელს დაიყო, როცა უელსში, ნატო-ს სამიტზე, საქართველოს, მოლოდინის მიუხედავად, MAP-ზე უარი უთხრეს, თუმცა "MAP-ზე უკეთესი" – ალიანსთან თანამშრომლობის ახალი, გაძლიერებულ პაკეტი მივიღეთ.
მაშინ ამ პაკეტს, ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა ალექსი პეტრიაშვილმა, "ოქროს ბარათის ჯგუფში" მოხვედრა უწოდა,
რას ნიშნავდა ნატო-საქართველოს თანამშრომლობის ახალ ეტაპზე გადასვლა?
როგორც ახლა უკვე ყოფილი და მაშინ მოქმედი თავდაცვის მინისტრი ირაკლი ალასანია განმარტავდა, ახალი სამოქმედო პაკეტი გულისხმობდა ქვეყანაში ნატო-სთან ერთობლივი საწვრთნელი ცენტრის გახსნას.
აღნიშნულ თემას, დღეს, ბრიუსელში, საქართველო-ნატო-ს კომისიის სხდომის დასრულების შემდეგ, კიდევ ერთხელ შეეხო ნატო-ს გენერალური მდივანი იენს სტოლტერბენგი.
"ნატო-ს საწვრთნელი ცენტრი, სადაც ალიანსის, საქართველოსა და პარტნიორი ქვეყნების ჯარისკაცები ერთად გაივლიან წვრთნებს, მნიშვნელოვანია არა მხოლოდ საქართველოსთვის, არამედ ნატო-სთვისაც" – აღნიშნა ნატოს გენერალურმა მდივანმა.
ჩრდილოატლანტიკური გაერთიანების ამ გადაწყვეტილებას, ცხინვალის რეგიონის სეპარატისტული ხელისუფლების საგარეოს საქმეთა მინისტრი გამოეხმაურა და როგორც რუსული სააგენტოები წერენ, შემდგომ ნაბიჯად კავკასიის რეგიონში დესტაბილიზაციის საფრთხეებზე ისაუბრა.
"ცხადია, რომ ქართული სამხედროების სწავლება და ნატო-ს წვრთნების საქართველოში ჩატარება, დაძაბულობისა და დესტაბილიზაციის მიზეზი გახდება, რადგანაც ნატო-ს არაწევრ სახელმწიფოებს აიძულებს საქართველოსა და მისი მოკავშირეების მხრიდან აგრესიის წინააღმდეგ შესაბამისი ღონისძიებები მიიღოს."
თუმცა, შესაძლო დესტაბილიზაციასთან დაკავშირებით, განსხვავებული მიდგომები აქვთ საქართველოში.
როგორც ჟურნალ არსენალის რედაქტორი ირაკლი ალადაშვილი "გურია ნიუსთან" საუბარში აღნიშნავს, ქვეყნის ჩრდილოელ მეზობელს გაბრაზებისთვის საბაბი არ სჭირდება და სადაც სურს და რაც სურს იმას აკეთებს.
"რადგანაც ეს საწვრთნელი ცენტრია, იქ არ მოხდება საბრძოლო ტექნიკის, ან ახალი შეიარაღების დიდი რაოდენობით თავმოყრა, ასე რომ რაიმე დისბალანსს ვერ შემოიტანს.
რაც შეეხება რუსეთის პოზიციას, კრემლს როცა უნდა გაბრაზდება, როცა უნდა არ გაბრაზდება. მას ქმედითი ნაბიჯების გადასადგმელად საბაბი არ სჭირდება. რუსეთს სადაც სურს და რაც სურს იმას აკეთებს.
ნაკლებად აქცევს ყურადღებას დასავლეთის რეაქციას, რადგან ის არასათანადოა ისევე, როგორც ეს იყო 2008 წელს, როგორც ახლა უკრაინაშია და ამას კრემლში გრძნობენ", _ ამბობს ალადაშვილი.
მისივე შეფასებით, ზოგადად, საქართველოში ნატო-ს წვრთნისა და შეფასების ცენტრის ამოქმედება ნატო-სკენ წინ გადადგმული ნაბიჯია, რომელიც ქართული არმიისა და ნატო-ს სამხედროების დაახლოებას შეუწყობს ხელს.
რეგიონში დესტაბილიზაციის საფრთხეს ვერ ხედავს ყოფილი თავდაცვის მინისტრი, დავით სიხარულიძე. თუმცა არ გამორიცხავს, რომ საქართველოში ნატო-ს საწვრთნელი ცენტრის გახსნამ ჩრდილოელი მეზობლის გაღიზიანება გამოიწვიოს.
როგორც სიხარულიძე "გურია ნიუსთან" აღნიშნავს, რუსეთს საქართველოს დემოკრატიულობისკენ სწრაფვა, ქვეყნის მთავარი ამოცანა – ნატო-ში გაწევრიანება აღიზიანებს, რადგან ჩრდილოატლანტიკურ ორგანიზაციაში გაწევრიანება, კრემლს იმ ბერკეტებს შეუზღუდავს, რომლებსაც ბოლო წლებია საქართველოში დესტაბილიზაციისთვის იყენებს.
თავდაცვის ყოფილი მინისტრი, დადებითად აფასებს საქართველოში ნატო-ს წვრთნისა და შეფასების ცენტრს გახსნას და აღნიშნავს, რომ ეს ქართულ ქვედანაყოფებს საშუალებას მისცემს თავისი ფუნდამენტური ფუნქციის უკეთ შესრულებაში.
"ვფიქრობ ესაა მხოლოდ პოზიტიური ნაბიჯი. რაც შეიძლება უკეთ უნდა ვიმუშაოთ ყველამ, განსაკუთრებით მნიშვნელოვანია, რომ მთავრობა იყოს ადეკვატური და ხელი შეუწყოს ამის განხორციელებას.
წარმოიდგინეთ ნატო-ს ცენტრში რამდენად უკეთ შეიძლება მომზადდეს ქართული ქვედანაყოფები, რათა მათ უკეთ შეძლონ თავიანთი ფუნდამენტური ფუნქციის – საქართველოს უსაფრთხოებისა და თავდაცვითი პოტენციალის განმტკიცებაში წვლილის შეტანა.
ამას პოზიტიური გავლენა ექნება ჩვენი ნატო-ში ინტეგრაციისთვის", _ განმარტავს სიხარულიძე "გურია ნიუსთან".
