ჩვენი ექსკლუზიური ინფორმაციით, ქალაქ ლანჩხუთის ცენტრში მდებარე “აჯანყებული გურულის” ძეგლის დემონტაჟი ამაღამ განხორციელდება. როგორც იცით, მოსახლეობა ამის წინააღმდეგია, ამიტომაც იქნა შერჩეული ღამე. ამ წუთებში მიმდებარე ტერიტორიაზე სიმშვიდეა, მხოლოდ პოლიციის შენობიდან ისმის სარემონტო სამუშაოების ხმა. ჩვენი გამოჩენიდან მალევე, ძეგლთან პოლიციისა და ადგილობრივი ხელისუფლების წარმომადგენელთა ავტომობილებმა “პატრულირება” დაიწყეს.
“გურია ნიუსმა” ქალაქის ცენტრალურ უბანში, ერთ-ერთი კორპუსის მიმდებარედ აღმოაჩინა სპეცტექნიკა _ ე. წ. “ამწე” და ღია ტიპის სატვირთო ავტომობილი.
ჩვენს მიერ ფოტოების გადაღებისას ერთ-ერთი ავტომობილიდან მძღოლი გადმოვიდა:
_ რას უღებთ სურათს, რა ხდება? _ გვკითხა შუახნის მამაკაცმა.
_ მანქანებს გადავუღეთ. თქვენია?
_ დიახ.
_ ფოტოები გადავიღე მხოლოდ.
_ რატომ?
_ ჟურნალისტი ვარ.
_ ჩვენ რა შუაში ვართ?
_ არაფერში, რაიმე დაგაბრალეთ?
_ აბა, რატომ გადაიღეთ? ჩვენ არაფერს ვაშავებთ!
_ კარგია, თუმცა, ჩვენი ინფორმაციით, არც თუ კარგ საქმეზე უნდა იყოთ.
ჩვენი მოსაუბრე მანქანისკენ წავიდა და ბოლო კითხვა, გზაში მივაწიეთ: _ საიდან ხართ?
_ ფოთიდან.
“გურია ნიუსი” მთელი ღამის განმავლობაში დარჩება შემთხვევის ადგილზე და სიახლეების შესახებ ოპერატიულად გაცნობებთ.
