პოლიტოლოგი ნიკა ჩიტაძე გაზაფხულისთვის ქვეყანაში დესტაბილიზაციის საფრთხეებზე საუბრობს, რითაც შინაგან საქმეთა მინისტრის გუშინდელ განცხადებას ეხმაურება.
ვახტანგ გომელაურის თქმით, გარკვეული ძალებს ქვეყანაში დესტაბილიზაციის მოწყობა სურთ.
ჩიტაძის განმარტებით, რეალურად, საფრთხე რუსეთიდან მომდინარეობს. თუმცა, ამ მხრივ ისლამური სახელმწიფოც მნიშვნელოვანია, რამდენადაც მათი მხრიდან ჩრდილოკავკასიელ მოძმეებთან დაკავშირების სურვილი დიდია. ჩიტაძე ბოლო პერიოდში აჭარელი მუსლიმი რადიკალების მიერ გავრცელებულ ვიდეო მიმართვებსაც იმოწმებს, მაგრამ ძირითად საფრთხეს მაინც რუსეთის მხრიდან ხედავს.
"რუსეთმა შესაძლოა ოკუპირებული რეგიონების სიახლოვეს ადამიანთა გატაცება გააგრძელოს და უარეს შემთხვევაში, ცხინვალისა და აფხაზეთის რეგიონში არსებული ბანდფორმირებების საშუალებით, საქართველოს ინფრასტრუქტურულ ობიექტებზე დივერსიული აქტები განახორციელოს," _ ამბობს ჩიტაძე "გურია ნიუსთან".
იგი ქვეყნის შიგნით პრორუსული ძალების გააქტიურებასაც პროგნოზირებს, რაც ძირითადად, პროდასავლური ძალების დისკრედიტაციის მცდელობის გზით გამოვლინდება. ამ პროცესში მონაწილედ პოლიტოლოგი როგორც პრორუსული არასამთავრობო და მედია ორგანიზაციებს, ისე მართლმადიდებლური ეკლესიის შიგნით არსებულ ანტიეროვნულ ძალებს მიიჩნევს.
მისი თქმით, სასულიერო პირთა შორის რუსეთის აგენტები არიან მოკალათებულნი და რუსეთის სასარგებლოდ ანტიდასავლურ განცხადებებს აკეთებენ. ჩიტაძე მათ მიერ გაკეთებულ იმ განცხადებებს იხსენებს, რომლითაც საქართველოში მოქმედი, დასავლეთისგან დაფინანსებული არასამთავრობოების წინააღმდეგ გამოდიან.
ექსპერტი არ გამორიცხავს საგაზაფხულოდ ამ ძალების მეტად გააქტიურებას, რაც "ერთმორწმუნე ერთან" მეგობრობის გზით "მართლმადიდებლური ღირებულებების დაცვის" იდეით იქნება გაჯერებული.
"ეს ძალები უკვე გააქტიურებულია, მაგრამ არ არის გამორიცხული, ისინი გარკვეული დესტაბილიზაციისთვის გამოიყენონ. მაგალითად, კოალიციაში გარკვეული ექსტრემისტული ძალების მხრიდან რესპუბლიკური პარტიის წინააღმდეგ შეურაცხმყოფელი განცხადებები გაისმის. ასევე, თავისუფალი დემოკრატებზეც ხდება თავდასხმები.
თუნდაც, გავიხსენოთ განცხადებები, რომლებიც ყოფილმა პრემიერმა არასამთავრობოების წინააღმდეგ გააკეთა. ამასთან, მოქმედი პრემიერი პროდასავლურ არასამთავრობო ორგანიზაციებს აკრიტიკებს და არაფერს ამბობს პრორუსულზე. ასევე, საპატრიარქოს წარმომადგენლების გამოსვლები, რომ არასამთავრობო ორგანიზაციები დასავლურ გრანტებზე არ უნდა გაიყიდონ ა.შ.
ვგულისხმობ ჯგუფებს ეკლესიაში, რომლებიც ანტიდასავლური და პრორუსული განცხადებებით გამოდიან, რითაც ეკლესიისა და თვითონ პატრიარქის დისკრედიტაციას ახდენენ," _ ამბობს ჩიტაძე.
პოლიტოლოგი მთავრობას მოუწოდებს განსაკუთრებული ყურადღება დაუთმოს დასავლეთის, ნატოსა და ევროკავშირის შესახებ მოსახლეობის ცნობიერების ამაღლებას.
"მთავრობამ უნდა დააფინანსოს საინფორმაციო კამპანია მედიასაშუალებებში ნატოსა და ევროკავშირის შესახებ მეტი ინფორმაციის გავრცელებისთვის".
ჩიტაძე ხაზს ისლამური სახელმწიფოს მხრიდან მოსალოდნელ საფრთხეებზე საქართველოს ანტიტერორისტული სტრუქტურების მუშაობის გააქტიურების აუცილებლობასაც უსვამს.
