ადგილობრივი თვითმმართველობის არჩევნებიდან 6 თვე გავიდა.
"ახალი მოსული ვარ"; "ძველი ბიუჯეტით მოგვიხდა მუშაობა"; "სულ ცოტაც და ყველაფერი დალაგდება" _ ასეთი იყო გამგებლებისა და საკრებულოს თავმჯდომარეების კომენტარები გასულ წელს.
თანამდებობის პირები არსებული პრობლემების ერთ-ერთ მიზეზად საკადრო პოლიტიკასაც ასახელებდნენ და აღნიშნავდნენ, რომ ადგილობრივ თვითმმართველობის მოხელეთა შესარჩევი კონკურსი ყველაფერს დაალაგებდა. გურიის სამივე მუნიციპალიტეტში კონკურსები უკვე დასრულდა, დანიშნული ჩინოვნიკების ვინაობაც ცნობილია.
ყველაზე ბოლოს საკუთარი გადაწყვეტილება ლანჩხუთის გამგეობის საკონკურსო კომისიამ გაახმოვანა _ კომისიის წევრებს გადაწყვეტილების მიღება რამდენიმე თანამდებობაზე გაუჭირდათ.
კომისიის სხდომას, რომელსაც მედიასაშუალებებიდან მხოლოდ "გურია ნიუსი" ესწრებოდა, ხმაურის გარეშე არ ჩაუვლია _ საკრებულოს იურიდიულ საკითხთა კომისიის თავმჯდომარემ რომან ბიწაძემ პროტესტის ნიშნად კენჭისყრაში მონაწილეობაზე უარი განაცხადა და სხდომა დატოვა.
მისი თქმით, სხდომაში მონაწილეობის მიღებას აზრი არ აქვს, რადგან მაინც იმ ადამიანებს ნიშნავენ, რომლებიც "ნაციონალების" დროს დღევანდელი ხელისუფლების წარმომადგენლებს დასდევდა, ფოტოებს უღებდა და "ნაციონალების" გასამარჯვებლად ყველაფერს აკეთებდა.
აღსანიშნავია, რომ კომისიის სხდომას კურიოზების გარეშე არ ჩაუვლია _ სხდომის მიმდინარეობისას, კედელზე განთავსებულ ტელევიზორის ეკრანზე, რამდენიმე წუთის განმავლობაში ეროტიული სცენები გადიოდა.
გასული წლის ბოლოს ყველაზე დიდი ხმაური სახელმწიფო აუდიტის სამსახურის დასკვნამ გამოიწვია _ ოზურგეთსა და ჩოხატაურში ჩატარებული აუდიტის შედეგად ბევრი დარღვევა გამოვლინდა.
ოზურგეთში ეს საკითხი საკრებულოს სხდომაზე განიხილეს და დებატებიც მოაწყვეს.
ჩოხატაურის საკრებულოს, მიუხედავად ოპოზიციური პარტიის მოთხოვნისა, ამ საკითხზე ჯერ არ უმსჯელია.
როდის აპირებს საკრებულო დოკუმენტის განხილვას, ისევ ავსებენ თუ არა დოკუმენტაციას ფანქრით, რატომ ვერ მოახერხეს წლევანდელი ბიუჯეტით უპოვართა დაპურება _ ამ და სხვა თემებზე ისაუბრა G-News TV-ის ყოველკვირეულ გადაცემაში ჩოხატაურის მუნიციპალიტეტის საკრებულოს თავმჯდომარემ ზაალ მამალაძემ, რომელსაც დებატებში არავინ დაუჯდა.
მამალაძის თქმით, აუდიტის დასკვნას, რომლის საკრებულოში განხილვა "ნაციონალური მოძრაობის" დეპუტატმა მამუკა ბარამიძემ მოითხოვა, უახლოეს სხდომაზე განიხილავენ.
_ კომისიები ამ საკითხზე მუშაობენ და უახლოს სხდომაზე ამ საკითხზე მსჯელობა აუცილებლად გაიმართება, _ აღნიშნა საკრებულოს თავმჯდომარემ, რომელმაც კითხვაზე _ დადგება თუ არა იმ ადამიანების პასუხისმგებლობის საკითხი, რომლებიც დოკუმენტაციას ფანქრით ავსებდნენ და რომლებიც დღეს ისევ მუშაობენ, გვიპასუხა, რომ "ამაზე განხილვის შემდეგ გაკეთდება კომენტარი".
ზაალ მამალაძემ, ჩვენ გადაცემაში ვრცლად ისაუბრა იმ პრობლემებზე, რომლებიც ბიუჯეტიდან უპოვართა დაპურების საკითხს შეეხებოდა და დასძინა, რომ დაწყებული კამპანია _ "გავხადოთ ქველმოქმედება ჩვენს ყოველდღიურობად!" აქტიურ ფაზაში შევიდა.
საკრებულოს თავმჯდომარემ მიმდინარე პროექტებზეც ისაუბრა:
_ არც ერთი მოხელე არ არის ბიუჯეტით ბოლომდე კმაყოფილი და ვერ ვიტყვი, რომ იდეალური ბიუჯეტი გვაქვს, თუმცა, წელს ბევრი კარგი პროექტი გაკეთდება, _ აღნიშნა მამალაძემ.
მისივე თქმით, უკვე მიღწეულია შეთანხმება, რომ ჩოხატაურის კულტურის სახლის მშენებლობა წელს აუცილებლად დაიწყება:
_ ამ საკითხზე საუბარი გვქონდა ინფრასტრუქტურის მინისტრის მოადგილესთან, რომელიც რამდენიმე დღის წინ სტუმრობდა ჩოხატაურს. მაისიდან მშენებლობა დაიწყება, თანხა უკვე გამოყოფილია და ამ ეტაპზე პროექტში კორექტივების შეტანა მიმდინარეობს, _ გვითხრა საკრებულოს თავმჯდომარემ.
ზაალ მამალაძის თქმით, აქტიურად მიმდინარეობს მუშაობა სოციალური მომსახურების სააგენტოს შენობის შეჩერებული მშენებლობის განახლებაზეც:
_ რამდენადაც გვაქვს ინფორმაცია, მშენებლობა შეჩერდა იმის გამო, რომ ძალიან ძვირი ჯდებოდა, _ დასძინა მამალაძემ.
