ლარი კიდევ გაუფასურდა. დღევანდელი მონაცემებით, ერთ დოლარის ყიდვა 2 ლარად და 4 თეთრად არის შესაძლებელი.
ეროვნული ბანკის პრეზიდენტის გიორგი ქადაგიძის განცხადებით, ლარის გაუფასურებამ მიაღწია იმ ზღვარს, როდესაც არსებობს ინფლაციის საფრთხე, ასევე მოლოდინი ფასების ზრდასთან დაკავშირებით.
ამ პროცესებით განსაკუთრებით ზარალდება მოსახლეობა, რომელსაც შემოსავალი ლარში აქვს, სესხები კი დოლარის კურსით.
ბანკები ამ ეტაპზე თავს იკავებენ, გასცენ ინფორმაცია, თუ რამდენ ადამიანს აქვს სესხი დოლარში.
მაგალითად, "ლიბერთი ბანკის" ინფორმაციით, მსესხებლების უმნიშვნელო ნაწილს _ მხოლოდ 0.9%-ს აქვს სესხი დოლარში.
ეროვნულმა ბანკმა რამდენიმე დღის წინ მიიღო გადაწყვეტილება რეფინანსირების განაკვეთის გაზრდის თაობაზე. ეს იმას ნიშნავს, რომ სესხის საპროცენტო განაკვეთი მცირედ, მაგრამ მაინც გაიზრდება.
ბანკების წარმომადგენლები ამბობენ, რომ ლარში დენომინირებული არსებული სესხების მფლობელებს სესხის მომსახურება არ უძვირდებათ.
"ლიბერთის ბანკის" პრესცენტრში განგვიმარტეს, რომ მონეტარული პოლიტიკის განაკვეთზე მიბმულ სესხებზე, ამ ეტაპისთვის პროცენტის ზრდა არ იგეგმება, თუმცა, ექსპერტები და პოლიტიკოსები საწინააღმდეგო განცხადებებს აკეთებენ.
საბანკო გაურკვევლობის შესაბამისად, პროდუქტებზე ფასებმა საგრძნობლად მოიმატა. ჩვენ მიერ გამოკითხული მოსახლეობა ამბობს, რომ მთავრობამ დროულად უნდა მიიღოს ზომები მდგომარეობის გამოსასწორებლად.
2014 წლის ადგილობრივი თვითმმართველობის არჩევნებამდე რამდენიმე დღით ადრე G-News TV-ის ყოველკვირეულ გადაცემაში "კვირის თემა" ბევრი დაპირება მოვისმინეთ.
სწორედ ამ დაპირებების ეხებოდა დებატები გასულ კვირას, G-News Tv-ს გადაცემაში "კვირის თემა", რომელშიც ოზურგეთის მუნიციპალიტეტის გამგებელი მერაბ ჭანუყვაძე და საკრებულოს დეპუტატი ნაციონალური მოძრაობიდან დავით მჟავანაძე მონაწილეობდნენ.
მერაბ ჭანუყვაძის თქმით, მას კანონი არ დაურღვევია, როცა ავტომობილები მისთვის და საკრებულოს თავმჯდომარისთვის გადაუდებელი აუცილებლობიდან გამომდინარე პირდაპირი შესყიდვის წესით შეიძინეს:
_ ეს საკითხი საკრებულოზეც გავიტანეთ _ დამოუკიდებლად არაფერი გადაგვიწყვეტია. უფრო მეტს გეტყვით, "ნაციონალური მოძრაობის" ფრაქციის თავმჯდომარე, მიხეილ გოგოტიშვილი ახალი ავტომანქანის შესყიდვასაც ითხოვდა. ბატონმა დავითმა ეს თემა რატომღაც ახლა წამოწია, _ აღნიშნა ჭანუყვაძემ.
მჟავანაძის თქმით, მას მხარი არ დაუჭერია, რომ მუნიციპალიტეტს ავტომანქანები გადაუდებელი აუცილებლობის მოტივით, პირდაპირი შესყიდვით შეეძინა: _ ამისთვის ტენდერი უნდა გამოეცხადებინათ. მე გავაკეთე განცხადება და პროკურატურასაც მივმართე. იმედია, ამ გადაცემის შემდეგ, პროკურატურა ამ თემით აუცილებლად დაინტერესდება, _ აღნიშნა მჟავანაძემ.
ოზურგეთის გამგებლის თქმით, მჟავანაძემ მანქანების თემაზე განცხადებები პირადი განაწყენების გამო გააკეთა: _ მან მოგვმართა წერილით, რომ სოფელ ჭანიეთში მისი მეგობრისთვის 5-წლიანი უზურფრუქტით გადაგვეცა შენობა ინვესტიციის გასახორციელებლად. საუბარი იყო 400 ევროზე. როდესაც დეტალებით დავინტერესდით, კონკრეტული ვერაფერი გავიგეთ. ამიტომაც მიიღო უარი. ეს ხდებოდა ზაფხულში. ჯერ კიდევ გასულ წელს იცოდა ბატონმა დავითმა ავტომანქანების შეძენის შესახებ, უფრო მეტიც, მხარიც დაუჭირა პროექტს. მისი განცხადებები, გარდა იმისა, რომ რეალობას მოკლებულია, პირადი წყენის გამოა გაკეთებული, _ განაცხადა ჭანუყვაძემ გადაცემაში სტუმრობისას.
მჟავანაძე გამგებლის ამ კომენტარს არ დაეთანხმა და აღნიშნა, რომ ჭანუყვაძე ჭანიეთის მოსახლეობას (დავით მჟავანაძე ჭანიეთის მაჟორიტარი დეპუტატია) იმის გამო სჯის, რომ მათ ხმა "ნაციონალური მოძრაობის" წარმომადგენელს მისცეს.
ჭანუყვაძემ ამ ბრალდებებს ტყუილი უწოდა და აღნიშნა, რომ წელს, სოფელ ჭანიეთში ახალი საბავშვო ბაღი შენდება: _ გარდა ამისა, ვახორციელებთ უმნიშვნელოვანეს პროექტს სოფლის მეურნეობის კუთხით, მოეწყობა ლაბორატორია, დასაქმდება მოსახლეობა, _ დასძინა ჭანუყვაძემ.
მწვავე დებატებში ოპონენტებმა ერთმანეთს ბრალი მოსახლეობის მოტყუებაში დასდეს. მჟავანაძემ ოზურგეთი "გაბანძებულად" მოიხსენია, რამაც მუნიციპალიტეტის პირველი პირის აღშფოთება გამოიწვია. ჭანუყვაძემ "ნაციონალური მოძრაობის" წარმომადგენელს იმ ადამიანის დასახელებაც მოსთხოვა, რომელიც მჟავანაძის თქმით, "კონკურსის შედეგად შეირჩა" და რომელიც "შტერია".
_ როცა ასეთ განცხადებებს აკეთებთ, მინიმუმ, უნდა შეგრცხვეთ და პრეტენზია არაფერზე არ უნდა გქონდეს, _ მიმართა ჭანუყვაძემ მჟავანაძეს და ბოლო გაფრთხილებაც მისცა:
_ საჯაროდ გაფრთხილებ, რომ ჩემი ოჯახის წევრების ხსენებას თავი დაანებო. ეს იყოს უკანასკნელი და ბოლო გაფრთხილება, _ თქვა მერაბ ჭანუყვაძემ, რომლის განმარტებით, მჟავანაძის ბრალდებები ოზურგეთის მუნიციპალიტეტის გამგეობაში არსებული ნეპოტიზმის შესახებ აბსურდულია.
დავით მჟავანაძემ კი აღნიშნა, რომ ნეპოტიზმის დამადასტურებელ ფაქტებს უახლოეს დღეებში გამოაქვეყნებს.
G-News TV-ის გადაცემის "კვირის თემა" სრული ვერსიის ნახვა შეგიძლიათ აქ.
