გახმაურებული სპეცოპერაციის დეტალები

ერთ-ერთი დაკავებული, რომელსაც პოლიციამ იარაღი ამოუღო, წარსულში სამჯერ ნასამართლევი დავით ხუნდაძეა. მაშინ, როცა ის დააკავეს, პრობაციის ბიუროში ხელის მოსაწერად მიდიოდა. სწორედ ამიტომ ხდება საეჭვო მისთვის იარაღის აღმოჩენა _ ლოგიკით, პრობაციის ბიუროში მიმავალ ადამიანს ჯიბეში იარაღი არ უნდა ჰქონოდა.

28 წლის დავით ხუნდაძისთვის ბოლო სასამართლოზე ყაჩაღობის დამტკიცებას ეცადნენ, მაგრამ ვერ დაუმტკიცეს _ ციხეში ის “სპორტული შარვლის საქამრედან” (?!) ამოღებული იარაღის გამო გაუშვეს, ხოლო იქიდან, 5-წლიანი პირობითი მსჯავრით, გასული არჩევნების წინ გაათავისუფლეს. როგორც ჩვენი წყარო ამბობს, არჩევნების გამო:

_ ხუნდაძის გათავისუფლების პირობა მხოლოდ ერთი იყო _ მას თვითმმართველობის არჩევნებზე გუთურელების ხმები “ნაციონალების” სასარგებლოდ უნდა მიემართა. ასეც მოხდა _ გუთურში საკმაოდ დიდი პროცენტული მაჩვენებლით გავიდა “ნაციონალური მოძრაობა” და მისი კანდიდატიც, _ გვითხრა წყარომ.

გასული წლის თვითმართველობის არჩევნებზე, ოფიციალური დოკუმენტების თანახმად, ჩოხატაურში “ნაციონალებმა” ხმების 70,65 % აიღეს. კონკრეტულად, გუთურში, არჩევნებზე გამოცხადებული 485 ამომრჩევლიდან 345-მა ხმა “ნაციონალებს” მისცა, უშუალოდ “ნაცების” კანდიდატს, გიორგი ცინცაძეს კი, ამომრჩეველთა 67,42%-მა _ 360 ადამიანმა დაუჭირა მხარი.

საარჩევნოდ ციხეში მყოფ ადამიანებთან ვაჭრობა ახალი თემა არ არის _ ბოლო რამდენიმე წელია, ამ მეთოდს წარმატებით იყენებს ხელისუფლება. ამასთან ერთად, წარმატებითვე, არჩევნებამდე ცოტა ხნით ადრე, ისევ აპატიმრებს ამ ადამიანებს და მერე, არჩევნების წინ ისევ გარეთ უშვებს. “გურია ნიუსი” რამდენიმე ყოფილ პატიმარს შეხვდა და ყველა მათგანმა პირად საუბრებში დაუდასტურა, რომ ისინი პირობითი მსჯავრით არჩევნების მოსაგებად გამოუშვეს.

ფაქტია, რომ ხელისუფლება, რომელიც ე.წ “ძველბიჭურ” ინსტიტუტს ხმამაღლა, ტელე-ეთერით ებრძვის, კულისებში ამავე ინსტიტუტს წარმატებით იყენებს. როგორც ჩვენი რესპონდენტები ამბობენ (მათ გასაგები მიზეზების გამო, არ სურთ ვინაობის გამხელა), ახლაც იგივე მოხდება. მით უმეტეს, რომ პოლიტიკურ ჰორიზონტზე ახალი ფიგურა გამოჩნდა, რომლისაც ხელისუფლებას ნამდვილად ეშინია და არჩევნებიც არ უნდა იყოს მარტივი მოსაგები. შესაბამისად, ძველი და ახალი მეთოდების გამოყენება არჩევნებში გასამარჯვებლად ლოგიკას მოკლებული არ არის.

სწორედ მოახლოებულ არჩევნებს უკავშირებენ ხუნდაძის დაკავებასაც. ჩვენი წყარო ამბობს, რომ დავით ხუნდაძეს არჩევნების წინ აუცილებლად გამოუშვებენ, მანამდე კი პირს მოიბანენ _ აქაოდა, კრიმინალებს ვებრძვითო.

ამ ინფორმაციას არ ეთანხმება დავით ხუნდაძის დედა, ირინა სიმონიშვილი, რომელიც ჩვენთან საუბრისას ამბობს, რომ მისი შვილი ამ ავანტიურაში მონაწილეობას არასოდეს მიიღებს:

_ მე არასდროს მსმენია მსგავსი რამ. ჩემი შვილი ძალიან მორწმუნე ადამიანია და ის მხოლოდ უფლის მსახურია, _ გვითხრა სიმონიშვილმა, რომელიც დარწმუნებულია, რომ მის შვილს იარაღი ჩაუდეს.

დაკავებულის დედას პასუხი არ აქვს კითხვაზე, როგორ მოხდა, რომ სამჯერ ნასამართლევი შვილი, ხუთწლიანი პირობითი მსჯავრით, მაინცდამაინც არჩევნების წინ გამოუშვეს. თუმცა, ადასტურებს, რომ დავით ხუნდაძეს გუთურში ახალგაზრდები პატივს სცემენ:

_ ჩემი შვილობით არ ვამბობ, მაგრამ დათო მართლა ბევრს უყვარს და პატივს სცემენ. შეგიძლიათ, ნახოთ რა აქვს მას გუთურელი ახალგაზრდებისთვის გაკეთებული _ ნახეთ, როგორი სტადიონი გაუკეთა.

ირინა სიმონიშვილი 10 შვილის დედაა. აქედან ერთი გარდაცვლილი ჰყავს. გვიყვება, რომ ციხიდან გამოშვების შემდეგ, მისი შვილით პოლიცია მხოლოდ ერთხელ დაინტერესდა: _ ყოფილმა პოლიციის უფროსმა ბესო სიხარულიძემ პოლიციელები გამოგზავნა დათოსთან, უბრალოდ, გასაუბრება და გაცნობა მინდაო. დათო იმ დროს ცუდად იყო, არ შეეძლო და მთხოვა, მე წავსულიყავი. ოთხჯერ ვიყავი, თუმცა, სიხარულიძის ნახვა ვერ მოვახერხე, _ თქვა “გურია ნიუსთან” საუბრისას სიმონიშვილმა.

მისი თქმით, შვილის გამო არასდროს არავინ შეუწუხებია: _ 10 შვილი დამოუკიდებლად გავზარდე. 20 წლის უკან მომიკლეს მეუღლე. მე არ ვამბობ, რომ დათოს არაფერი შეშლია _ შეუცდომელი არავინ ვართ. დათოს როცა სჭირდებოდა, ვერ მივხედე სათანადოდ. ახლა იმას აბრალებენ, რაც არ გაუკეთებია. არ გვიჭირდა ეკონომიურად ისე, რომ ყაჩაღობა ჩაედინა. თან ამის საშუალებას ჯანმრთელობაც არ მისცემდა _ ძალიან რთული ფორმით აქვს ტუბერკულოზი. მე სწორედ ამის მეშინია, მისი ჯანმრთელობისთვის ვიბრძვი, ციხეში მისი ყოფნა არ შეიძლება, ციხის პირობებს დათოს ჯანმრთელობა ვერ აიტანს, _ ამბობს სიმონიშვილი და აღნიშნავს, რომ იმ ჩოხატაურში, სადაც გამგებელი და პოლიციის უფროსი სხვა რაიონიდან მოჰყავთ, არაფერს აზრი არ აქვს:

_ რა აზრის აქვს, რომ მივიდე ვინმესთან და ჩემი გაჭირვება ვუთხრა? ვაი, მართლა საცოდავო ჩოხატაურო _ გამგებელი და პოლიციის უფროსი სხვა რაიონიდან მოჰყავთ! სიმართლე გითხრათ, არც კი ვიცი, ვინ არის ჩვენი რაიონის დეპუტატი, ან რომც ვიცოდე რა, რაიმეს გაკეთება შეუძლია?! არაფერი მაინტერესებს, გარდა იმისა, რომ ჩემი შვილის ჯანმრთელობა გადავარჩინო, _ ამბობს დაკავებულის დედა.

მისივე ინფორმაციით, ხუნდაძემ სასამართლოზე მხოლოდ ერთი კითხვა დასვა:

_ 4 დღე მშრალი შიმშილობა ჰქონდა და არავის ეკონტაქტებოდა. სასამართლოზე, რომელზეც ჩემი შეშვება არ უნდოდათ და ძალით, თითქმის წიხლით შევედი, მხოლოდ ერთი კითხვა დასვა _ მითხარით, რატომ დამაპატიმრეთო. გამომძიებელმა თავი ვერ აწია, ისე ჩაიბუტბუტა რაღაცა. პროკურორმა რაღაც კანონები წაუკითხა. გაეცინა _ კარგი ასე იყოს, მე ღმერთი ზევით გამასამართლებს, თქვენ კი იცოდეთ, რომ ჯოჯოხეთი გელითო. მხოლოდ ეს იყოს მისი კომენტარი, _ ამბობს სიმონიშვილი და აღნიშნავს, რომ სახლში ჩხრეკაზე მოსულ პოლიციელებს, დანაშაულის დამძიმება სურდათ:

_ 20-მდე პოლიციელი იყო მოსული. ინფორმაცია შემოვიდა, სახლში იარაღის არსენალს ინახავთო. ერთი პოლიციელი იცინოდა და იცინოდა. რა გაცინებს, რა არის სასაცილო,-მეთქი ვკითხე. ასე დამავალეს, მოქალაქეებს გაუცინე და მეც ვიცინიო. ბევრი ეძებეს, მაგრამ ვერაფერი ნახეს. ახალგაზრდა პოლიციელს ხელები უკან ჰქონდა წაღებული, შარვალი მძვრებაო(?!), იძახდა. მე მონაწილეობა არაფერში მიმიღია. მეზობლები იყვნენ გადმოსულები და მათ უთხრეს, რომ არაფერი ზედმეტი არ მოემოქმედათ. ალბათ, “პლანის” ჩადება უნდოდათ, რომ ბრალი დაემძიმებინათ, _ ამბობს დაკავებულის დედა, რომელიც დარწმუნებულია, რომ, როგორც ადრე, ახლაც ეცდებიან ყაჩაღობა დააბრალონ მის შვილს (შეგახსენებთ, რომ ორი წლის წინ, ხუნდაძეს ყაჩაღობას მართლაც ედავებოდნენ, მაგრამ ბრალის დამტკიცება ვერ შეძლეს. ავტ.).

_ სასამართლოზე ერთი სიტყვაც არ უხსენებიათ ყაჩაღობაზე, მაგრამ მასე იყო ორი წლის წინათაც, ქუთაისში რომ დააკავეს და სპორტული შარვლის საქამრედან(?!) იარაღი ამოუღეს. მერე გაახსენდათ და გაუჩნდათ ეჭვი, რომ ყაჩაღობაში მონაწილეობდა. ესენი ასე ხსნიან საქმეებს, ამდენი ხანია გაუხსნელი დანაშაულებები აქვთ. რატომ ერთხელაც არ იკითხეს, სად იყო ჩემი შვილი, რას აკეთებდა? ძალიან ნაცნობი სცენარია. ახლაც იგივეს ეცდებიან, მაგრამ ყველაფერს გავაკეთებ იმისთვის, რომ ჩემი შვილმა იმ დანაშაულისთვის არ აგოს პასუხი, რომელიც არ ჩაუდენია, _ გვითხრა ირინა სიმონიშვილმა.