მათ “გურია ნიუსს” არაერთხელ მომართეს დახმარებისთვის და ითხოვდნენ, გაგვერკვია, რამდენად კანონიერად იყო გაცემული ტერიტორია. როგორც მოვაჭრეები “გურია ნიუსთან” საუბარში ამბობენ, იმ ეტაპზე, როცა გაზეთში მასალა გამოქვეყნდა, თითქოს, დაწყნარდა სიტუაცია, მაგრამ რამდენიმე დღის წინ აბრა დახვდათ გაკრული. ბაზრის მოვაჭრეები სასამართლოში მისვლას აპირებენ.
_ ხომ დაიჭირეს გამგებელი? ყველა დასაჭერია ეგენი. ჩვენთან ჯერ ჩინელები მოვიდნენ. გვითხრეს, 1500 ლარს გადავიხდით ამ ტერიტორიაში და მოგვეცითო. არ ვქენით. აქ ამდენი ხალხი მუშაობს და შენობა რომ დაიდგმება, დაიხურება ყველა მხარე. თხოვნით მივმართეთ გია ტაკიძეს, თუკი ამ მიწას გასცემდნენ, ჩვენ შევისყიდდით, აქ არაფერს არ ავაშენებდით და ეს ხალხიც ივაჭრებდა, მაგრამ უარით გამოგვისტუმრა. ერთი და ორი ადამიანის ინტერესს უნდა შეეწიროს ამდენი კერძო მესაკუთრის ლუკმა-პური? ამ ტერიტორიაზე 40 ადამიანია დასაქმებული. “აწყობთ” ახლა, ამ საარჩევნოდ ამდენი ადამიანის განაწყენება და პურის ფულის წართმევა? თუ ტერიტორია კანონიერად გაიყიდა, ჯერ განცხადება უნდა ყოფილიყო გაზეთში, რომელსაც ჩვენც ვნახავდით, შევისყიდდით და არ ავაგებდით შენობას. აქ შენობის დადგმა უსაფრთხოების მიზნითაც არ არის მიზანშეწონილი.
თუ ყველაფერი კანონიერად ხდება, რატომ დღისით, მზისით არ მოვიდნენ და დაასვეს ეს ჯოხი? გამოვედით დილით და გამოკრული დაგვხვდა ინფორმაცია. გვაჩვენონ ნებართვის და რეგისტრაციის ნომერი, ნახაზი. ეს უნდა იყოს გამოკრული ბანერზე, თორემ ასე სახლში გაკეთებულ ჯოხზე დაწერილ ინფორმაციას რა ძალა აქვს? იცით, ვინ მფარველობს მაგათ? ურუშაძის ცოლი რესურსცენტრის უფროსია, მისი დაქალი გუბერნატორის მოადგილე და ჩვენ უპატრონოები ასე უნდა დავიჩაგროთ? ბოლომდე ვიბრძოლებთ, ავიყვანთ ადვოკატებს და სასამართლოში ვიჩივლებთ.
ვინ უნდა დაიცვას ადამიანების ინტერესები, რომ ულუკმაპუროდ არ დავრჩეთ? ჩვენნაირ ხალხსაც უნდა მოუსმინონ, დაბალ დონედ რომ გვთვლიან. ხომ ხედავთ, ივანიშვილს რას უშვრებიან და ჩვენ დაგვინდობენ? _ ამბობენ მოვაჭრეები.
ამის შემდეგ მოვაჭრეებმა ახალი სავაჭრო ცენტრის დირექტორის ოთახში გადაინაცვლეს.
_ მივესალმებით, თუ გალამაზდება ბაზარი და ლამაზი ნაგებობები დაიდგმება, მაგრამ ახლა დაგვხვდა აბრა გამოკრული, ჩვენ მივიჩნევთ, აქ შენობის აშენება უკანონოა. ხართ თუ არა თქვენ საქმის კურსში, რომ ჩვენი კერძო საკუთრების გზას, ვიღაცა უკანონოდ უნდა დაეპატრონოს. ეს ტერიტორია გაყიდულია? _ ჰკითხეს მოვაჭრეებმა ზაზა გოგუაძეს.
_ არ არის გაყიდული, იჯარით არის გაცემული.
_ რამდენი ხანია, რაც გაცემულია?
_ ზუსტად არ მახსოვს, დიდი ხანია.
_ გამგეობაში რომ ვიყავით, გვითხრეს, ჯერჯერობით არაა გაცემულიო. ვისზეა გაცემული?
_ ომარ ვაშალომიძესა და კაკო ურუშაძეზე.
_ ვის მიერაა გაცემული?
_ ქონება ვისიცაა _ მუნიციპალიტეტის მიერ. გრძელვადიანი იჯარაა გაფორმებული. მე თქვენი მესმის, მაგრამ სად იყავით ამდენ ხანს, თუ გული ასე შეგტკიოდათ? ტერიტორია რომ უნდა მოაწესრიგოთ, არ იცით? გეუბნებით, კანონიერად არის გაცემული,-მეთქი. ბოლო ხელწერა ჩემია გაკეთებული. შესაბამისმა კომისიამ იმსჯელა და ასე გადაწყვიტა, საკრებულომ გადაწყვიტა. ამ ბაზარში ბევრი რამის გაკეთება მინდა, მაგრამ ვერ ვაკეთებ იმის გამო, რომ ბევრი რამ უკანონოდაა გაცემული თავის დროზე და ხელი მეშლება. ნახეთ ყველაფერი კარგად და მერე მოგვმართეთ. თქვენ ყველაფერი თქვენს ნებაზე გინდათ.!
_ ბატონო ზაზა, თუ შეიძლება, რომ ერთი ადამიანის ინტერესს შეეწიროს ამდენი ადამიანის სამუშაო ადგილი?
_ მე თქვენ ძალიან დიდ პატივს გცემთ და არ მათქმევინოთ ახლა ყველაფერი, რა! სადაც თქვენ ვაჭრობთ, რას ჰგავს იქაურობა? მოგწონთ თქვენ? თუ მოაწესრიგეს ბაზარი და კარგი რამ დადგეს, ამაში რაიმე გასამტყუნია? _ თქვა ბაზრის დირექტორმა.
ერთ-ერთი მოვაჭრის თქმით კი, 300-ჯერ მაინც იყო სამხარეო ადმინისტრაციაში და გუბერნატორი ვერ ნახა: _ ყველა სამშაბთს დავდიოდი და გუბერნატორი ვერ დავიჭირე ოთახში, ვერც მისი მოადგილე. გლეხები და უპატრონოები რომ ვართ, ამისთვის დავიჩაგროთ? თუ თქვენ ვერ წყვეტთ, სასამართლოს მივმართავთ, ხალხს ვერავინ ვერ დაუდგება წინ. მითუმეტეს, ახლა არჩევნები მოდის. პსპ-ს კლინიკა კანონიერად შენდება? მაგრამ ამ მთავრობისგან ყველაფერია მოსალოდნელი. მაშინ ტაკიძემ გვითხრა, ეს გადაწყვეტილი საკითხიაო და უარით გამოგვიშვა. მაგი საქმე “ზევით” წყდება.
ახალი სავაჭრო ცენტრის დირექტორი ზაზა გოგუაძე “გურია ნიუსთან” საუბარში ამბობს, რომ მშენებლობის დაწყება კანონიერად მოხდება:
_ მშენებლობის ნებართვა ყოველგვარი წესების დაცვით გაცემულია ომარ ვაშალომიძესა და კაკო ურუშაძეზე.
_ ანუ ამ ადამიანების მოთხოვნები არაკანონიერია და არ გაითვალისწინებთ?
_ ვერაფერს ვერ გავითვალისწინებთ, ყველაფერი კანონიერადაა გაკეთებული, მოვაჭრეთა მოთხოვნები კი უკანონოა.
“გურია ნიუსი” ამ საკითხს აუცილებლად დაუბრუნდება.
