ლანჩხუთში, კუპრეიშვილის #12 მდებარე მრავალბინიანი საცხოვრებელი სახლის მობინადრეები უკვე წლებია, ცდილობენ, მუნიციპალიტეტის ხელმძღვანელობის ყურადღება მიიქციონ, თუმცა, როგორც თავად ამბობენ, დღემდე მათ მცდელობას შედეგი არ მოჰყოლია.
_ "არაერთხელ მივმართეთ ხელმძღვანელობას განცხადებით, რომ როგორმე დაგვხმარებოდნენ, მაგრამ კაციშვილი ყურადღების ღირსადაც არ გვთვლის. დღემდე არავინ მოსულა ჩვენთან და არ დაინტერესებულა ჩვენი პრობლემით. მარტო არჩევნების დროს ახსენდებათ ჩვენი არსებობა. ბოლო არჩევნების წინ თავად ბატონი ზაზა ურუშაძე იყო მოსული. გავაცანით ჩვენი სატკივარი, მანაც დიდი გულისყურით მოგვისმინა, პირობა მოგვცა, რომ აუცილებლად დაგვეხმარებოდა. თუმცა, არჩევნები დამთავრდა, ყველამ თავისი გაინაღდა და ჩვენც არავის გავხსენებივართ. კარგი იყო, ჩაგვეწერა, რაც მაშინ დაგვპირდა და ახლა საბუთად დაგვედო მისთვის.
თავიდან ჩვენს სახლს ბინა არ ჯობდა, თუმცა, ახლა რა დღეში ვართ, კი ხედავთ. შეცდომა თავშივე იქნა დაშვებული მშენებლების მიერ. იმდენი აუთვისებელი ტერიტორია იყო მაშინ ლანჩხუთში და გაუგებარია, რატომ ააშენეს აქ სახლი, პირდაპირ "საცივის ფეხზე"? სარდაფი სულ წყლითაა სავსე, ზამთარ-ზაფხულს წყალი დგას საძირკველში. ახლა გაზაფხული მოდის და საშიშროებაც უფრო მეტად იზრდება. როგორც კი ათბება, ქვეწარმავლებით ივსება აქაურობა, გველების მოკვლას ვერ ავუდივართ, მორიელებსა და ვირთხებს ნუღარ იკითხავთ, იმდენია. მოდიან, ვითომ შეწამლავენ, აქა-იქ მიასხამენ წამალს და წავლენ. ხომ უნდა მიხვდეს ვინმე, რომ მარტო ეს არ კმარა, რომ კორპუსის სახურავიც შესაწამლია და მთლიანად სადარბაზოები. მე, პირადად, მეხუთე სართულზე ვცხოვრობ. ზაფხულში, კონსერებს რომ ვაკეთებდი, აივანზე კარადიდან ქილა გამოვიღე და შიგ უშველებელი მკვდარი ხვლიკი იყო", _ საკმაოდ ემოციურად გამოხატავდნენ საკუთარ გულისტკივილს აღნიშნული ბინის მცხოვრებლები.
_ "გაიგეთ ყველამ, ამ სახლში ჩვეულებრივი ადამიანები ვცხოვრობთ, ბავშვებიც გვყავს და მოგვაქციეთ ყურადღება! მაინც და მაინც უნდა დაინგრეს კორპუსი, რომ მოგვხედონ?! სადაც ეს წყალი ამოდის, იმ სადარბაზოში, პირველ სართულზე ვცხოვრობ ორ მცირეწლოვან ბავშვთან ერთად, თან სახლში, ეტლში მჯდომი ინვალიდი მაზლი მყავს. სულ შიშის კანკალი მაქვს, სადმე ღრიჭოდან ქვეწარმავლები სახლში არ შემოძვრნენ და ბავშვები ან ინვალიდი, უმწეო ადამიანი არ დაკბინონ. კარს ვერ ვაღებ ნორმალურად, მწერებისგან დამცავ ბადეებს ვაფარებ ფანჯრებსა და კარებზე, რომ რაიმე არ შემოვიდეს სახლში", _ გვითხრა ბინის ერთ-ერთმა ბინადარმა.
_"ყველა მხრივ უკიდურეს მდგომარეობაში ვართ, დაბლა წყალი გვითხრის საძირკველს, მაღლა ქარი ჭერს გვხდის, წინა ეზოც ნაგვითაა სავსე. ვისაც კი მოეხალისება, ყველა აქ ყრის სამშენებლო მასალების ნარჩენებს. ხომ არსებობს შესაბამისი სამსახურები, ვისაც ამის კონტროლი ევალება?! მაინცდამაინც ხალხი უნდა გადაგვკიდოს ერთმანეთს? ერთხელ მაინც დაინტერესდნენ და ნახონ, რა დღეში ვართ, როგორ პირობებში გვიწევს ცხოვრება. ის მაინც გაგვაგებინონ, ვეკუთვნით თუ არა ლანჩხუთს, იქნებ სხვა პლანეტაზე ვცხოვრობთ და ტყუილა ვიჩემებთ ლანჩხუთელობას. არ ვიცით, რა გზას დავადგეთ და ვის მივმართოთ, ამიტომაც გადავწყვიტეთ, თქვენ დაგკავშირებოდით და საჯარო გაგვეხადა ჩვენი პრობლემა. იქნებ ამის შემდეგ მაინც ჩაგვთვალონ ყურადღების ღირსად და მოგვაქციონ ყურადღება. ნამდვილად არ ვაპირებთ გაჩერებას. ყველა ღონეს მივმართავთ, რომ მიზანს მივაღწიოთ და რამე საშველს მივაგნოთ, თორემ სახლი გვენგრევა და მთლად ღია ცის ქვეშ დარჩენის საშიშროება გვემუქრება.
რამდენი მთავრობა უნდა შეიცვალოს, რომ ჩვენი ხმა გაიგონ! წლების წინ იყვნენ მოსულები, ვითომ რაღაც გააკეთეს, სარდაფის ნაწილში ბეტონი მოასხეს, თუმცა, ამან უფრო უარესი შედეგი გამოიღო _ წყალს გარეთ გასასვლელი აღარ დაურჩა და შიგ საძირკველში დაგუბდა. მოკლედ, თუ კორპუსის ძირიდან წყალი არ ამოიტუმბა, კორპუსი თავზე დაგვემხობა და შიგ მოვირაგვებით ეს უმწეო ხალხი. კეთილი ინებონ, სპეციალისტები მოიწვიონ და გამონახონ საშუალება, რომ ერთხელ და სამუდამოდ დაგვადგეს საშველი", _ ამბობენ აქაურები.
საკითხთან დაკავშირებით კომენტარი ვთხოვეთ ლანჩხუთის მუნიციპალიტეტის გამგეობის ინფრასტრუქტურისა და არქიტექტურის სამსახურის უფროსს, ლევან ჩხაიძეს. რომლის თქმითაც, მუნიციპალიტეტის ხელმძღვანელობა საქმის კურსშია და მდგომარეობის გამოსასწორებლად სათანადო ზომების გახორციელებაც აქვს დაგეგმილი
_ "ამ საკითხს ძალიან კარგად ვიცნობთ, სიტუაცია, მართლაც რთულია. ველოდებით გეოლოგების ჩამოსვლას, ანალოგიური სიტუაცია სხვაგანაც გვაქვს. აქ წყალი პირდაპირ სახლის ქვეშ ამოდის და თუ სპეციალისტებმა არ მოგვცეს დასკვნა და შემდგომი სამოქმედო გეგმა, ისე ჩვენ ვერაფერს ვიზამთ", _ ამბობს ჩხაიძე.
