რა იმალება “საახალწლო ბუმების” უკან

(გურია ნიუსი, ლანჩხუთი) _ ჩვენ უკვე გესაუბრეთ იმის შესახებ, თუ როგორ ირღვევა მომხმარებლის უფლებები “ელიტ-ელექტრონიკსში”. ამ ამბიდან რამდენიმე დღეში ის ადამიანები დაგვიკავშირდნენ, რომლებიც უკვე მაღაზიათა მეორე მსხვილი ქსელის _ “ტექნობუმის” რეკლამებზე “წამოეგნენ”. არადა, მომხმარებელს ეს კომპანია მშვენიერ პირობებს სთავაზობს _ ორწლიანი განვადების შემთხვევაში, ბანკის სარგებელი 30 პროცენტს არ აღემატება და თვიურად 1,25 პროცენტი გამოდის.
სანამ ისევ ბათუმს მივაშურებდით, “ტექნობუმის” “ცხელ ხაზთან” სამი დღის მანძილზე დეტალებს ვარკვევდით. ყველაფერი ისე იყო, როგორც რეკლამებში _ ტელევიზორი თვეში 37 ლარად, კომპიუტერი _ 56 ლარად, სარეცხი მანქანა _ 45 ლარად, გაზქურა _ 40 ლარად და ა.შ. თან რაც არაერთხელ დავაზუსტეთ, განვადებისას არ მოითხოვდნენ წინასწარ თანამონაწილეობას.
პირველად მაშინ გავვოცდით, როცა “ბუმელებმა” გვითხრეს, აქცია მხოლოდ ტელევიზორზე იყო. ამასთან, დილით, თბილისის მთავარ ოფისში გავარკვიეთ და ბათუმის ოფისთან გადავამოწმეთ ინფორმაცია, რომ ძველი ტექნიკის მიტანის შემთხვევაში, 200 ლარს დაგვიკლებდნენ. ერთ საათში, რაც ჩვენს ბათუმში ჩასვლას დასჭირდა, ეს აქცია აღარ მოქმედებდა! მოგვიანებით მხოლოდ ის გაირკვა, რომ განვადებით ნებისმიერ ნივთს ვიყიდდით.
უფრო დიდი სიურპრიზი წინ გველოდა _ გარეკლამებული ტელევიზორის ყიდვა თვეში 37 ლარად კი არა, გაცილებით უფრო ძვირად მოგიწევთ: 37X24 თვეზე არის 888 ლარი, ანუ ღირებულებაზე, 699 ლარზე 189 ლარით მეტი, რაც თვეში ბანკის სარგებლის სახით 8 ლარამდეა, თუმცა აქ იმალება 20% ანუ 140 ლარი, რომელიც წინასწარ, ანუ დამატებით უნდა გადაიხადო! ეს თანხა კი რეკლამაში არსად არ ჩანს! როცა ამის შესახებ გამყიდველს ვკითხეთ, სიცილით მოგვიგო, ცოტა ინტრიგა ხომ უნდა იყოს რეკლამაშიო(?!). საინტერესო ინტრიგაა _ ადამიანი სხვა ქალაქიდან ჩაიყვანო ბლეფი რეკლამით.
როცა კომპანიის “ცხელ ხაზთან” დავრეკეთ, ოპერატორმა გვითხრა, რომ 20% ეს ბანკის მოთხოვნაა(?!). არადა, სარეკლამო ფურცლებზე წერია “თვეში 37 ლარად” და არსად არის მინიშნება 140 ლარზე (20%-ზე).
ამაზეც თანახმა ვიყავით, მაგრამ იქვე მყოფმა “ტაოპრივატბანკმა” 20%-იანი თანამონაწილეობა ყველა პროდუქტზე მოგვთხოვა. რადგან ორწლიანი განვადებისას ზედმეტად გადახდილი ბევრი თანხა გამოგვდიოდა, ერთწლიანზე შევიტანეთ განაცხადი. 509-ლარიანი სარეცხი მანქანის შეძენისას პროცენტის სახით გვახდევინებდნენ თითქმის 50%-ს _ 223 ლარს! როცა თვიური პროცენტი ვიკითხეთ, ბანკის წარმომადგენელმა გვითხრა, თვიური 3%-ია და პლუს კიდევ 3%-იო(?!). მოკლედ, რომ დავიანგარიშეთ გამოგვდიოდა 3,5%-ზე ბევრად მეტი! რა თქმა უნდა, ნივთების შეძენაზე უარი ვთქვით და ისევ “ცხელ ხაზს” დავუკავშირდით:
_ ქალბატონო, თქვენ ხომ გვითხარით, რომ არანაირი წინასწარი შენატანი არ იყო საჭირო?
_ ეს ბანკის გადასაწყვეტია. ჩვენ რა შუაში ვართ?
_ მგონი, გასაგებად გეკითხებით _ თქვენ გვითხარით, თანამონაწილეობა არ სჭირდებაო. შეგეძლოთ, გეთქვათ, რომ ამას ბანკი წყვეტსო, მაგრამ ეს არ გითქვამთ!
_ ეს ბანკის გადასაწყვეტია, ბატონო და მე რას მეჩხუბებით?
_ აბა, ვისთან გავარკვიოთ? თქვენთან საუბრის შემდეგ გურიიდან ჩამოვედით ბათუმში…
_ გასაგებია, მაგრამ…
_ ნივთს განვადებით ყიდვის დროს, ღირებულების 20 პროცენტს წინასწარ რომ გვახდევინებთ, ამის შესახებ რეკლამებში რატომ არაფერს ამბობთ?
_ ეს ბანკი საქმეა…
_ ბანკი რა შუაშია? თქვენსავე დაბეჭდილ სარეკლამო ფურცლებზე არსად წერია 20 პროცენტი!
_ ჩვენ გვაქვს ტელევიზორი 37 ლარად თვეში…
_ სწორედ მაგას ვამბობ! 37 ლარად! ანუ 24 თვე უნდა ვიხადო 37 ლარი, ხომ ასეა?
_ დიახ!
_ მერე წინასწარ რომ 20%, ანუ 140 ლარს გვახდევინებენ, რატომ არ ჩანს რეკლამაში? ეს ჩვეულებრივი სარეკლამო აფიორაა?!
აქვე ერთი საინტერესო დეტალი _ “ელიტ ელექტრონიკსში” “ტაოპრივატბანკის” წარმომადგენელმა 629 ლარიან ნივთზე ზედმეტად გადასახდელი გაცილებით ნაკლები გვიანგარიშა _ 187 ლარი!