საქართველოს მთავარ პროკურატურაში სამართალწარმოების პროცესში ჩადენილი დანაშაულის გამოძიების დეპარტამენტი შეიქმნა. აღნიშნული დეპარტამენტი საჯარო მოხელის მიერ ჩადენილ დანაშაულებს გამოიძიებს, რომლის შედეგადაც მოქალაქეებს ფიზიკური და მატერიალური ზიანი მიადგათ.
რა კლასიფიკაციის მიხედვით დაყვეს საქმეები, სულ რამდენი განაცხადია შესული მთავარ პროკურატურაში და აქედან რამდენს გამოიძიებენ – ამ კითხვებზე საგამოძიებო უწყებაში კომენტარი არ კეთდება.
უწყების ცნობით კი, დეპარტამენტი ორიენტირებული იქნება 2012 წლის 1 ოქტომბრიდან მთავარ პროკურატურაში შესულ საჩივარ-განცხადებებში მითითებული დანაშაულებრივი ფაქტები გამოიძიოს.
"მათგან პრიორიტეტი მიენიჭება ისეთი დანაშაულების გამოძიებას როგორიცაა: ქონების უკანონოდ ჩამორთმევისა და ძალადობის ფაქტები, რომელიც მოიცავს ცემა-წამებას, არაადამიანურ და დამამცირებელ მოპყრობას და ყველა იმ დანაშაულს, რომლის ჩადენაშიც საჯარო მოხელე ან მასთან გათანაბრებული პირი იმხილება", _ აცხადებენ პროკურატურაში.
მათივე ინფორმაციით, აღნიშნული დეპარტამენტი დაკომპლექტდა დეპარტამენტის უფროსის, დეპარტამენტის უფროსის მოადგილის, 4 პროკურორის, 10 გამომძიებლის და 4 კოორდინატორის შტატით. გავრცელებული ინფორმაციით, დეპარტამენტს, სავარუდოდ, კოკა კაციტაძე უხელმძღვანელებს.
როგორც "გურია ნიუსს“ პროკურატურის პრესსამსახურში უთხრეს, პრეზენტაციაზე ყველა კითხვას გაეცემა პასუხი, მანამდე კი, დამატებითი განცხადება არ გაკეთდება.
"დეპარტამენტის დაკომპლექტების პროცესში გათვალისწინებული იქნა მაღალი საზოგადოებრივი ინტერესი და კადრების შერჩევა მოხდა განსაკუთრებული სიფრთხილით. დეპარტამენტში გამომძიებლებად და პროკურორებად დაინიშნენ პირები, რომელთა მიმართ, მთავარ პროკურატურაში შემოსულ საჩივარ-განცხადებებში სამართლებრივი პრეტენზია არ ფიქსირდება", _ აღნიშნავენ მთავარ პროკურატურაში.
დღესვე ცნობილი გახდა, რომ თბილისის საკრებულოს ფრაქცია გაერთიანებული დემოკრატიული მოძრაობის წევრის შალვა ოგბაიძის საქმე ერთ-ერთია, რომელიც ახალ დეპარტამენტში იქნება განხილული.
როგორც ოგბაიძე ამბობს, რომ მისი დევნა "ჰიბრიდული" მეთოდი იყო. მისი თქმით, ის მოიცავდა, როგორც რეპრესიებს, ასევე ფიზიკური ძალის გამოყენებას და წამებას.
"სპორტის დეპარტამენტში შემომთავაზეს, გადავმდგარიყავი საავტომობილო ფედერაციის პრეზიდენტობიდან, რაზეც უარი მიიღეს, ამის მერე სოდის ე.წ. შავ სიაში აღმოვჩნდი," _ განაცხადა ოგბაიძემ.
პროკურატურის განცხადებით, გამოსაძიებელი საქმეებისადმი მაღალი საზოგადოებრივი ინტერესიდან გამომდინარე, მიღებული იქნა გადაწყვეტილება დეპარტამენტში დაზარალებულთა კოორდინატორების დანიშვნის შესახებ, რომლებიც საქმის შედეგებით დაინტერესებულ დაზარალებულებს მუდმივ რეჟიმში მიაწვდიან ინფორმაციას გამოძიების მიმდინარეობის შესახებ და გაუწევენ კონსულტაციას სამართლებრივ საკითხებზე.
პროკურატურის ახალი დეპარტამენტის შექმნას იუსტიციის მინისტრი თეა წულუკიანი დადებითად აფასებს, თუმცა ამბობს, რომ ის მის მიერ შემუშავებული მოდელისგან განსხვავებულია. როგორც წულუკიანმა დღეს ჟურნალისტებთან საუბრისას აღნიშნა, ჩამორთმეული ქონებისა და უკანონო მსჯავრდების საკითხების შესწავლისთვის მას სულ სხვა მოდელი ჰქონდა, რომელიც არ გაიზიარეს.
"იმასთან დაკავშირებით, რომ 2012 წლის ოქტომბრიდან პროკურატურაში და არა მხოლოდ პროკურატურაში შემოსული საჩივრების სისტემატიზაცია, აღრიცხვა, კატეგორიების მიხედვით დახარისხება და შემდეგ მათი შესწავლა მოხდეს, არსებობს პოლიტიკური გადაწყვეტილება, პოლიტიკური ნება და სხვაგვარად ვერც იქნება, რადგან 2012 წლის ოქტომბრამდე ძალიან ბევრ ადამიანს ჩამოართვეს ქონება, ძალიან ბევრი ადამიანი უკანონოდ იქნა მსჯავრდებული, ამაზე მეც ძალიან ბევრს ვმუშაობდი, თუმცა სხვა იდეა და მოდელი მქონდა შემუშავებული. ეს მაშინ ვერ იქნა გაზიარებული, მაგრამ დღეს არის მიღებული პოლიტიკური გადაწყვეტილება, რომ ეს მოხდეს, ოღონდ სხვა ფორმით და ეს ფორმა არის პროკურატურის ორგანოებში შექმნილი სპეციალური დეპარტამენტი. არის ათასობით საჩივარი, მაგრამ კატეგორიზაცია მომხდარია და პროკურატურამ ეკონომიკის სამინისტროსთან ერთად შთამბეჭდავი სამუშაო ჩაატარა,” _ განაცხადა წულუკიანმა.
ფრაქცია "ქართული ოცნება – კონსერვატორების" წევრ ზვიად ძიძიგურის ინფორმაციით კი, შესაძლოა, უკანონოდ ჩამორთმეული ქონება, რომელიც ახლა სახელმწიფოს საკუთრებაშია, კანონიერ მფლობელებს დაუბრუნდეს. თუმცა, პროკურატურა გაყიდული ბიზნესების თემას არ ეხება.
"ეხება სამართლიანობის აღდგენის ნაწილში, სადაც სახელმწიფოს აქვს ის ქონება, რომელიც ჩამორთმეული იყო, ამ ქონების გადაცემაზეა საუბარი და არა იმ თემაზე, რომ ახლა ბიზნესები გადაყიდულია," _ განაცხადა ზვიად ძიძიგურმა.
პარლამენტის ფრაქცია "თავისუფალი დემოკრატების" წევრი შალვა შავგულიძე კი მიიჩნევს, რომ ახალი დეპარტამენტის შექმნის საკითხი მხოლოდ უმრავლესობის "ფორმატში არ უნდა ჩაიკეტოს."
"რამდენადაც ცნობილია საქმე ეხება მხოლოდ უკანონოდ ჩამორთმეული ქონების საკითხებს და ამ კუთხით სამართლიანობის აღდგენას, თუკი ეს ასე გადაწყდება ეს არ იქნება სამართლიანობის აღდგენა", _ განაცხადა შალვა შავგულიძემ.
მთავარ პროკურატურაში ახალი დეპარტამენტის შექმნას "ნაციონალური მოძრაობის წევრებიც ეხმაურებიან. როგორც ჩიორა თაქთაქიშვილი აცხადებს, მთავრობა ახალი დეპარტამენტის შექმნით ქვეყანაში არსებული სიტუაციის გადაფარვას ცდილობს.
"იმ უმძიმესი ეკონომიკური კრიზისის პირობებში, რომელშიც ამ მთავრობამ ჩაააგდო ქვეყანა, დღეს პროკურატურა ამ თემის გადაფარვას გაურკვეველი დეპარტამენტის შექმნით გვთავაზობს", _ აღნიშნავს თაქთაქიშვილი.
მისივე თქმით, ხელისუფლება ოპონენტების დევნითაა დაკავებული და არაფერს აკეთებს კრიმინალთან საბრძოლველად. თაქთაქიშვილი მიიჩნევს, რომ "დაუსჯელობის სინდრომი წახალისებულია," როდესაც დანაშაულს ხელისუფლების დავალებით სამართალდამცავი სტრუქტუერები ჩადიან.
პროკურატურაში ახალი დეპარტამენტის შექმნა 2014 წლის დეკემბრის ბოლოს გამართულ პრესკონფერენციაზე პრემიერმა ღარიბაშვილმა დააანონსა.
როგორც მან აღნიშნა მთავრობა წინასაარჩევნო დანაპირებს ასრულებს და "სამართლიანობის დამკვიდრებას და აღდგენას“ ამ დეპარტამენტით აპირებს.
"ბოლო ორი წლის მანძილზე ჩვენ შევისწავლეთ ყველა განაცხადი, რომელიც უკანონოდ ჩამორთმეულ ქონებას ეხებ – ბიზნესებს, სახლებს და ასევე ათასობით რეპრესირებულ ადამიანს, რომლებიც უკანონოდ იხდიდნენ სასჯელს ციხეებში. ადამიანებს, რომლებიც იყვნენ მსხვერპლი წამებისა და არაადამიანური მოპყრობის, გაუპატიურების.მაქსიმუმ თებერვლამდე ჩვენ საზოგადოებას წარვუდგენთ კონკრეტულ გეგმას იმის თაობაზე თუ როგორ მოხდება სამართლიანობის აღდგენის პროცესის დაწყებაც და დასრულებაც. ეს იქნება ხანგრძლივი პროცესი. შეიქმნება პროკურატურაში დეპარტამენტი, სამმართველო, ქონებების დაბრუნებასთან დაკავშირებით და მოხდება ამის კომპენსირება, _ განაცხადა პრემიერ-მინისტრმა.
შეგახსენებთ, რომ 2012 წლის არჩევნებამდე "ქართული ოცნება“ საზოგადოებას მართლმსაჯულების ხარვეზების დამდგენი კომისიის შექმნასაც ჰპირდებოდა, თუმცა ამ იდეის განხორციელება ვერ შეძლეს.
რაც შეეხება ახლადშექმნილ დეპარტამენტს, პროკურატურა მისი საქმიანობის შესახებ პრეზენტაციას 2015 წლის 4 მარტს გამართავს და საზოგადოებას დეპარტამენტის ფუნქცია-მოვალეობებისა და გეგმების შესახებ დაწვრილებით ინფორმაციას მიაწვდის.
