განათლებისა და მეცნიერების სამინისტროს გადაწყვეტილებით, ის ბავშვები, რომლებსაც სწავლის დაწყებამდე არ აქვთ შესრულებული 6 წელი, სკოლაში ვერ შევლენ. გადაწყვეტილება საბოლოოა და გადახედვას არ ექვემდებარება. სამინისტროს ამ ნაბიჯს იწონებენ ფსიქოლოგები, რადგან მიიჩნევენ, რომ 5 წლის ბავშვები მზად არ არიან სკოლისთვის. ადრე მშობლის ნებაზე იყო დამოკიდებული, შეიყვანდა თუ არა 5 წლის შვილს სკოლაში. უმრავლესობა სწორედ ასეთ არჩევანს აკეთებდა.
ნანი ჩუბინიძემაც 5 წლის ასაკში შეიყვანა შვილიშვილი პირველ კლასში. ნიკას 6 წელი სკოლაში შესვლიდან 4 თვეში, 1 იანვარს შეუსრულდა. ნანი ახლა ნანობს, რომ პატარა ასაკის ბავშვი დაამძიმეს იმ დიდი პასუხისმგებლობით, რასაც სკოლის რეჟიმში ჩადგომა ჰქვია.
"ვიფიქრეთ, ბიჭია და სკოლის დასრულებისთანავე ჯარში გაწვევა რომარ მოსვლოდა, ადრევე შეგვეყვანა სკოლაში. თუმცა სწავლა 12-კლასიანია და მაინც წაიყვანენ, მაშინვე თუ არ ჩააბარებს უნივერსიტეტში. იმის თქმა მინდა, რომ ძალიან შევცდით, ბავშვმა თავიდან კი აუღო ალღო სწავლას, მაგრამ მერე და მერე ძალიან გაუჭირდა თავის კლასელებთან შედარებით, რომლებიც 6 წლისანი შევიდნენ სკოლაში. ნეტა, მაშინაც ყოფილიყო აკრძალული, ხომ აღარ ჩამორჩებოდა ბავშვი პროგრამას!", _ ამბობს ნანი.
განათლების სამინისტროს გადაწყვეტილება მიზანშეწონილად მიაჩნია დავით ტატანაშვილს, თუმცა მიიჩნევს, რომ მის შვილს პრობლემა ექმნება ამით:
"მე, პირადად, 100% ვეთანხმები, რომ სკოლაში ბავშვის ადრე შეყვანა არ არის მიზანშეწონილი, მაგრამ აქ საქმე სხვა პრობლემასთან გვაქვს! მშობლები აუცილებლად ერთი ან ორი წლით ადრე უნდა ყოფილიყვნენ ინფორმირებულნი! რათა მათ დაებალანსებინათ ბავშვის სკოლისთვის მომზადების გრაფიკი! ჩემი შვილი 30 სექტემბერს ხდება 6 წლის! იგი დადიოდა სერიოზული დონის ბაღში და ახლა ირიცხება გამოსაშვებ ჯგუფში, სადაც უშუალოდ სკოლისთვის ამზადებენ! ისმის კითხვა: თუ ჩემ შვილს სკოლაში არ მიიღებენ, რა ვუყოთ ბავშვს, როდესაც სასწავლო წელი დაიწყება? სახლში ვერ დავსვამთ! იგივე გამოსაშვებ ჯგუფში დატოვება ბავშვისთვის სერიოზული ტრამვა იქნება! ამ კანონის ასე უცბად მიღება დაუშვებელია! ეს უფრო დიდ ტრავმას გამოიწვევს ბავშვებში, ვიდრე იმ ბავშვების არ მიღება, რომლებსაც რამდენიმე დღე აკლიათ 6 წლამდე!", _ ამბობს დავით ტატანაშვილი.
გარდა იმისა, რომ განათლების სამინისტროს გადაწყვეტილება მოულოდნელი იყო მშობლებისთვის და ვერც მოასწრეს ბავშვები ფსიქოლოგიურად შეემზადებინათ ამ პროცესისთვის, თავს იჩენს თავად ბაღების გადატვირთულობის პრობლემაც. რადგან ის ბავშვები, რომლებსაც სკოლა არ იღებს, ისევ რჩებიან ბაღებში.
ფართის ნაკლებობა და გადატვირთულობა ისედაც პრობლემა იყო სკოლამდელი აღზრდის დაწესებულებებში. ახალი მთავრობის მიერ ბაღის გადასახადის გაუქმებამ გამოიწვია ის, რომ შვილები იმ მშობლებმაც წაიყვანეს ბაღში, რომლებსაც ადრე ამის საშუალება არ ჰქონდათ.
მერიამ ამის გამო ახალი ბაღების მშენებლობა დაიწყო თბილისში. განათლების სამინისტროს ახალი გადაწყვეტილების გამო კი დამატებით 4700 ბავშვისთვის მოუწევს ფინანსების მოძიება. თბილისის ბაგა-ბაღების მართვის სააგენტოს დირექტორის თემურ თორდინავას თქმით, დაახლოებით ამდენია იმ ბავშვების რიცხვი, რომლებსაც ბაღებში იგივე ჯგუფებში დარჩენა მოუწევთ.
"ბავშვებისთვის, რომლებსაც 15 სექტემბრამდე არ უსრულდებათ 6 წელი, არავითარი პროგრამა, ჩამოყალიბებული, ან პილოტირებული ჯერ არ არის. თბილისის ბაღებში ინფრასტრუქტურის თვალსაზრისით, თავისუფალი ადგილების პრობლემა გვაქვს. ახალი ნაკადია მისაღები. თან ეს ბავშვებიც რომ დარჩებიან, ესეც ცალკე პრობლემაა. კონსულტაციები მიმდინარეობს აღმზრდელების, ფართის, ფინანსების კუთხით მათთან, ვისაც ბაღების საკითხი მეტ-ნაკლებად ეხება და გამოიკვეთება, როგორი გადაწყვეტილების მიღება იქნება ოპტიმალური", _ აცხადებს თორდინავა.
განათლების სამინისტროში კი ამბობენ, რომ სასკოლო მზაობის პროგრამა შემუშავებული აქვთ და ამ ეტაპზე თვითმმართველობებისთვის მისი გაცნობა მიმდინარეობს:
"სასკოლო მზაობის პროგრამა მზად აქვს სამინისტროს, რომელიც ადგილობრივ და უცხოელ ექსპერტებთან ერთად შეიმუშავა. ამ ეტაპზე მიმდინარეობს თვითმმართველობებთან მისი განხილვა. სექტემბერში უკვე დაინერგება და იმუშავებს არამარტო თბილისში, არამედ რეგიონებშიც", _ აღნიშნავენ სამინისტროში.
